Maana 17nan

Esau ni Yakuba

CƐNIN fila minnu bɛ yan ja kan, u bɔlen tɛ ɲɔgɔn fɛ hali dɔɔnin. O tɛ tiɲɛ ye wa? Yala i bɛ u tɔgɔ dɔn wa? Donsokɛ ye Esau ye, cɛnin min bɛ ka sagaw kɔlɔsi, o ye Yakuba ye.

Esau ni Yakuba tun ye Isaka ni Rebɛka ka filaninw ye. Esau tun ko ka di a fa ye kosɛbɛ, bawo a tun bɛ se donsoya la. A tun bɛ na ni sogo caman ye so kɔnɔ. Nka, Rebɛka tun bɛ Yakuba de fɛ, bawo mɔgɔ masumalen tun don.

U mɔkɛ Ibrahima tun ma sa fɔlɔ. A tun bɛ kuma minnu fɔ Jehova ko la, o barow tun ka di Yakuba ye kosɛbɛ, e ka miiri o la. Ibrahima labanna ka sa, k’a si to san 175 la, ka filaninw si to san 15 la.

Esau ye san 40 sɔrɔ tuma min na, a ye Kananmuso fila furu. O ye Isaka ni Rebɛka dusu kasi kosɛbɛ, bawo o musow tun tɛ Jehova bato.

Nka, don dɔ la, ko dɔ kɛra min ye Esau dusu bɔ kosɛbɛ a filaninɲɔgɔn Yakuba kɔrɔ. Isaka  tun ka kan ka dugawu kɛ a denkɛ kɔrɔbalen ye tuma min na, o waati tun sera. Ikomi Esau ka kɔrɔ ni Yakuba ye, a kɛra Esau kɔnɔ ko dugawu bɛna kɛ ale de ye. Nka, fɛn min tun ka kan ka kɛ Esau ka dugawu sɔrɔ, a tun ye o fɛn feere Yakuba ma kaban. Ka fara o kan, denkɛ fila wolotuma na, Ala tun y’a fɔ ko Yakuba de bɛna dugawu sɔrɔ. A kɛra ten. Isaka ye dugawu kɛ a denkɛ Yakuba de ye.

Esau y’a mɛn tuma min na ko Isaka ye dugawu kɛ Yakuba ye, a diminna kosɛbɛ Yakuba kɔrɔ, fo a y’a fɔ ko ale bɛna Yakuba faga. Rebɛka ye o mɛn tuma min na, a jɔrɔla kosɛbɛ. A y’a fɔ a cɛ Isaka ye ko: ‘Ni Yakuba fana ye Kananmuso furu, o bɛna kɛ kojuguba ye.’

O la sa, Isaka ye Yakuba wele k’a fɔ a ye ko: ‘I kana Kananmuso furu. Taa i mɔkɛ Bɛtuɛl fɛ Karan, i ka a denkɛ Laban denmuso dɔ furu.’

Yakuba ye a fa ka kuma lamɛn. O yɔrɔnin bɛɛ la, a ye taama jan daminɛ ka taa u ka mɔgɔw fɛ Karan.

Jenɛse 25:​5-11, 20-34; 26:​34, 35; 27:​1-46; 28:​1-5; Heburuw 12:​16, 17.