Maana 13nan

Ibrahima ye Ala teri ye

SANJIBA tɛmɛnen kɔfɛ, mɔgɔw taara sigi yɔrɔ minnu na, olu dɔ la kelen tun bɛ wele ko Ur. Ur kɛra duguba ye. A sow tun cɛ ka ɲi. Nka, mɔgɔ minnu tun bɛ Ur, olu tun bɛ boliw bato. Babɛl dugu kɔnɔmɔgɔw fana tun bɛ o de kɛ. Mɔgɔ minnu tun bɛ Ur ni Babɛl, olu tun tɛ i ko Nuhun ni a denkɛ Sɛm. Nuhun ni Sɛm ye baara kɛ Jehova ye. U ma o dabila abada.

Sanjiba kɔfɛ, san 350 tɛmɛnen, Nuhun sara k’a to a ka kantigiya la. I ɲɛ bɛ cɛ min na ja kan, o wolola san fila Nuhun salen kɔfɛ. O cɛ tun ye fɛnba de ye Ala bolo. A tɔgɔ ye ko Ibrahima. Ibrahima ni a ka denbaya tun sigilen bɛ Ur.

Don dɔ la, Jehova y’a fɔ Ibrahima ye ko: ‘I ka bɔ Ur, e ani i somɔgɔw, i ka taa sigi jamana na, ne bɛna min jira i la.’ Yala Ibrahima sɔnna Ala ka kuma ma, ka Ur fɛn dumanw bɛɛ to a kɔ, ka taa wa? Ɔwɔ. Ibrahima y’a kɛ i ko Ala tun y’a fɔ a ye cogo min na. A tun bɛ sɔn Ala ka kuma ma tuma bɛɛ. O de y’a to a fɔra Ibrahima ma ko Ala teri.

Ibrahima bɔra Ur kɔnɔ tuma min na ka taa, a somɔgɔ dɔw tugura a kɔ. A fa Tɛrak tugura a kɔ. A balimakɛ denkɛ Lɔti fana tugura a kɔ. A jɛlɛn don a muso Saran fana tugura a kɔ. U sera dugu dɔ la min tɔgɔ ye ko Haran. Ibrahima fa Tɛrak sara yen. O y’a sɔrɔ u ni Ur yɔrɔ ka jan kosɛbɛ.

Waati dɔ tɛmɛna. Ibrahima ni a ka denbaya bɔra Haran, u nana Kanan. O yɔrɔ la, Jehova y’a fɔ Ibrahima ye ko: ‘Ne na nin jamana di i denw ma.’ Ibrahima tora Kanan, ka a ka ɲɛnamaya kɛ finisow kɔnɔ.

Ala ye Ibrahima dɛmɛ fo a ye saga ni bagan caman sɔrɔ. A ye baaraden kɛmɛ caman fana sɔrɔ. Nka, Saran tun ma den sɔrɔ Ibrahima ye.

Ibrahima ye san 99 sɔrɔ tuma min na, Jehova y’a fɔ a ye ko: ‘Ne bɛ layidu ta i ye ko i bɛna kɛ siya caman fa ye.’ Nka, o tun bɛna se ka kɛ cogo di, k’a sɔrɔ Ibrahima ni Sara tun kɔrɔla kosɛbɛ den sɔrɔ ma?

Jenɛse 11:​27-32; 12:​1-7; 17:​1-8, 15-17; 18:​9-19.