Mɔgɔw ye sankansojanba jɔ
Maana 12nan
Mɔgɔw ye sankansojanba jɔ
SAN caman tɛmɛna. Nuhun denkɛw ye den caman sɔrɔ. Olu denw fana kɔrɔbayara ka den caman wɛrɛw sɔrɔ. A ma mɛn mɔgɔ cayara kosɛbɛ dugukolo kan.
O mɔgɔw la, Nuhun tulomasama dɔ tun bɛ yen min tɔgɔ ye ko Nimrɔd. Donsokɛ tun don. A tun ka jugu kosɛbɛ. A tun bɛ mɔgɔw ni baganw faga. Nimrɔd ye a yɛrɛ kɛ fana masakɛ ye walisa ka tɔw mara. Nimrɔd tun ko man di Ala ye.
O waati la, mɔgɔ bɛɛ tun bɛ kan kelen de fɔ. Nimrɔd tun b’a fɛ mɔgɔw ka to ɲɔgɔn kan, walisa a ka se k’u mara. I b’a dɔn a ye min kɛ wa? A y’a fɔ mɔgɔw ye k’u ka dugu sigi, ani ka sankansojanba jɔ a kɔnɔ. E ka u lajɛ birikidilan na ja kan yan.
O sankansojanba jɔli ma diya Jehova Ala ye. Ala tun b’a fɛ mɔgɔw ka jɛnsɛn, ka taa sigi dugukolo yɔrɔ bɛɛ la. Nka, o mɔgɔw ko: ‘Aw ye na, an ka dugu sigi ka sankansojanba jɔ min kundama bɛ se fo sankolo la. O la sa, an na tɔgɔba sɔrɔ.’ O mɔgɔw tun t’a fɛ ka Ala bonya, u tun b’a fɛ ka bonya da u yɛrɛ de kan.
O kosɔn, Ala y’u ka sankansojanba jɔli dabila. I b’a dɔn a ye min kɛ wa? Yɔrɔnin kelen a y’a kɛ mɔgɔw ye kanw fɔ minnu tɛ kelen ye. U tun tɛ kan kelen fɔ tun. Sankansojanba jɔbagaw tun tɛ ka ɲɔgɔn ka kuma faamuya bilen. O de y’a to u ka dugu welela ko Babɛl walima Babilonɛ, o min kɔrɔ ye ko ‘ɲagami.’
O la sa, mɔgɔw y’a daminɛ ka Babɛl dugu bila, walisa ka taa sigi yɔrɔ wɛrɛw la. Minnu tun bɛ kan kelen fɔ, olu taara sigi ɲɔgɔn fɛ dugukolo yɔrɔ wɛrɛw la.
Jenɛse 10:1, 8-10; 11:1-9.
