Maana 31nan

Musa ni Aron taara Faraon fɛ

MUSA seginna ka na tuma min na Misira, kabako minnu kɛra, a ye olu bɛɛ kuma fɔ a kɔrɔkɛ Aron ye. Musa ni Aron ye o kabakow kɛ Israɛlkaw ɲɛkɔrɔ tuma min na, Israɛlkaw bɛɛ dara a la ko Jehova de bɛ ka Musa ni Aron dɛmɛ tiɲɛ na.

O kɔfɛ, Musa ni Aron taara Faraon fɛ. U y’a fɔ Faraon ye ko: ‘Jehova, Israɛl ka Ala ko: Ne ka jamakulu to a ka taa tile saba, ka ne bato kungokolon kɔnɔ. Nka Faraon ye u jaabi ko: Ne dalen tɛ Jehova la. Ne tɛna Israɛlkaw bila ka taa.’

Faraon diminna bawo Israɛlkaw tun b’a fɛ ale ka waati di u ma walisa u ka taa Jehova bato. O la sa, Faraon ye Israɛlkaw diyagoya k’u bila baara kologɛlɛn na min tun ka bon kosɛbɛ ni u ka baara fɔlɔ ye. Israɛlkaw ye Musa kɔrɔfɔ bawo ale de kosɔn Misirakaw juguyara u ma kosɛbɛ nin cogo la. O ko ye Musa dusu kasi kosɛbɛ. Nka, Jehova y’a fɔ Musa ye ko a dusu kana kasi. A ko: ‘Ne bɛna a kɛ Faraon bɛna ne ka mɔgɔw bila ka taa.’

Musa ni Aron taara Faraon fɛ kokura. Nin sen in na, u ye kabako dɔ kɛ. Aron y’a ka bere fili duguma, a kɛra sa belebeleba ye. Nka, Faraon ka dɔnbaaw fana ye u ka berew fili duguma, olu fana kɛra saw ye. Nka, a lajɛ Aron ka sa bɛ ka dɔnbaaw ka saw kunun! O bɛɛ n’a ta, Faraon ma sɔn ka Israɛlkaw bila ka taa.

Waati sera sisan walisa Jehova k’a jira Faraon la, ale ye jɔni ye. Yala i b’a dɔn Jehova ye o kɛ cogo min na wa? A ye tɔɔrɔko 10 walima kojuguba 10 bin Misira jamana kan.

O tɔɔrɔko caman kɔnɔna na, Faraon ye ci bila Musa ma k’a fɔ a ye ko: ‘A kɛ tɔɔrɔko ka jɔ. Ne bɛna Israɛl bila ka taa.’ Nka, ni o tɔɔrɔko tɛmɛna dɔrɔn, Faraon hakili bɛ yɛlɛma kokura. A tun t’a fɛ Israɛl ka taa. Nka, tɔɔrɔko tannan kɔfɛ, Faraon ye Israɛlkaw bila ka taa.

Yala i bɛ tɔɔrɔko tan ninnu kelen-kelen bɛɛ dɔn wa? I ka maana nata ta walisa k’a dɔn fɛn minnu tun don.

Ekisode 4:​27-31; 5:​1-23; 6:​1-13, 26-30; 7:​1-13.