Maana 32nan

Tɔɔrɔko 10

E KA jaw lajɛ. Jehova ye tɔɔrɔko minnu bin Misira jamana kan, ja kelen-kelen bɛɛ bɛ o tɔɔrɔko dɔ jira. Ja fɔlɔ la, i ɲɛ bɛ Aron de la ka baji gosi ni a ka bere ye. O baji tɔgɔ ye ko Nil. Aron ye o kɛ tuma min na, baji yɛlɛmana ka kɛ joli ye. Jɛgɛw sara. Ji tolila, k’a kasa bɔ.

O kɔfɛ, Jehova y’a kɛ ntoriw bɔra Nil ji la, ka na sow kɔnɔ. Ntoriw tun bɛ yɔrɔ bɛɛ la. Nburu tun bɛ jeni yɔrɔ minnu na, ani nburu tun bɛ jeni minɛn minnu kɔnɔ, ntoriw donna o yɔrɔw bɛɛ la. Hali mɔgɔ bɛ da dalan minnu kan, ntoriw tun bɛ o yɔrɔw bɛɛ la fana. Ntoriw sara tuma min na, Misirakaw ye u ton ɲɔgɔn kan, k’u kɛ ton belebelew ye. U tolila, ka jamana yɔrɔ bɛɛ kɛ kasa goman ye.

Aron tilala ka dugukolo buguri gosi ni a ka bere ye. O buguri yɛlɛmana ka kɛ sosow ye minnu tun bɛ mɔgɔw kin. Sosow kɛra tɔɔrɔko sabanan ye min binna Misira jamana kan.

Tɔɔrɔko tɔw ye Misirakaw dɔrɔn de sɔrɔ. U ma Israɛlkaw sɔrɔ. Tɔɔrɔko naaninan kɛra dimɔgɔ belebelew ye minnu camanba tun bɛ don ɲɔgɔn fɛ Misirakaw ka sow kɔnɔ. Tɔɔrɔko duurunan binna baganw de kan. Misirakaw ka misiw, u ka sagaw ni u ka ba caman sara o la.

 O kɔfɛ, Musa ni Aron ye bugurinjɛ ta k’a fili sanfɛ. O kɛra sumuni belebelew ye minnu bɔra mɔgɔw ni baganw na. O kɛra tɔɔrɔko wɔɔrɔnan ye.

O kɔfɛ, Musa ye a bolo kɔrɔta sanfɛ tuma min na, Jehova ye sanpɛrɛnkanw bɔ, ka sanbɛlɛ lana. O sanbɛlɛ jugu ɲɔgɔn tun ma deli ka bin Misira jamana kan.

Tɔɔrɔko seginnan kɛra ntɔn camanba ye. Ntɔnw tun ma deli ka caya abada ka o ɲɔgɔn bɔ Misira. Sanbɛlɛ tun ma fɛn minnu tiɲɛ, ntɔnw ye o fɛnw bɛɛ dun.

Tɔɔrɔko kɔnɔntɔnnan kɛra dibi ye. Tile saba kɔnɔ, dibi kuruba kɛra jamana yɔrɔ bɛɛ la. Nka Israɛlkaw tun sigilen bɛ yɔrɔ minnu na, yeelen tun bɛ o yɔrɔw dɔrɔn de la.

O bɛɛ kɔfɛ, Ala y’a fɔ a ka mɔgɔw ye ko u ka bakɔrɔnin san kelen, walima sagajigi san kelen faga, ka o joli seri-seri u ka soda sanfɛ. O la sa, ni Ala ka mɛlɛkɛ bɛna tɛmɛ tuma min na Misira jamana yɔrɔ bɛɛ la, ni a ye joli ye soda minnu sanfɛ, a tɛna mɔgɔ si faga o sow kɔnɔ. Nka, ni a ma joli ye soda minnu sanfɛ, a bɛna hadamadenw ani baganw den fɔlɔ faga o sow kɔnɔ. O de kɛra tɔɔrɔko tannan ye.

O tɔɔrɔko tannan kɔfɛ, Faraon y’a fɔ Israɛlkaw ye ko u ka taa ka bɔ a ka jamana kɔnɔ. O tuma y’a sɔrɔ Ala ka jamakulu bɛɛ tun labɛnnen don taali kama. O don yɛrɛ la, Israɛlkaw bɔra Misira, ka u ka taama daminɛ ka taa.

Ekisode tilayɔrɔba 7 ka na 12 la.