Maana 30nan

Tasuma bɛ ka mɛnɛ jiritu min na

MUSA nana se fo kulu dɔ la min tɔgɔ ye ko Hɔrɛb, walisa a ka sagaw ka bin sɔrɔ. A ye tasuma ye jiritu dɔ la, nka, o jiritu tun tɛ ka jeni.

Musa y’a fɔ a yɛrɛ kɔnɔ ko: ‘Nin ye kabako ye sa! I jɔ ne ka gɛrɛ ka o lajɛ koɲuman.’ A y’i gɛrɛ tuma min na, kumakan dɔ bɔra jiritu la, k’a fɔ a ye ko: ‘I kana i magɛrɛ ka tɛmɛ nin kan tun. Sabara bɔ i sen na, bawo i jɔlen bɛ yɔrɔ min na, o ye dugukolo senuma de ye.’ Ala de ye mɛlɛkɛ dɔ bila ka kuma Musa fɛ. O la sa, Musa y’a ɲɛda datugu.

Ala tilala k’a fɔ ko: ‘Tɔɔrɔ min bɛ ne ka mɔgɔw kan Misira, ne ye o ye. O kosɔn, ne bɛna u bɔ jɔnya la. Ne bɛ e de ci ka taa ne ka mɔgɔw ɲɛminɛ ka u labɔ Misira.’ Jehova tun bɛna a ka mɔgɔw lana Kanan dugukolo kan, min tun ye yɔrɔ cɛɲi ye.

Nka, Musa ko: ‘Ne tɛ fosi ye. Ne bɛna se k’o kɛ cogo di? Ni ne taara Israɛlkaw fɛ, ni u y’a fɔ ko: “Jɔn ye i ci?” Ne na mun fɔ?’

 Ala y’a jaabi ko: ‘I bɛna min fɔ, o filɛ: “JEHOVA, Ibrahima ka Ala, Isaka ka Ala, ani Yakuba ka Ala ye ne ci aw ma.” ’ Jehova y’a fɔ ka fara a kan ko: ‘O ye ne tɔgɔ de ye fo abada.’

Musa y’a jaabi ko: ‘Ni ne y’a fɔ u ye ko e de ye ne ci u ma, ni u ma da ne la dun?’

Ala ko: ‘Mun bɛ i bolo?’

Musa y’a jaabi ko: ‘Bere.’

Ala y’a fɔ a ye ko: ‘A fili duguma.’ Musa ye o fili duguma tuma min na, bere kɛra sa ye. Jehova tilala ka kabako wɛrɛ jira Musa la. A ko: ‘I bolo don i ka duloki kɔnɔ.’ Musa y’a kɛ ten. A y’a bolo bɔ tuma min na, a bolo jɛra pasi-pasi i ko neje, ka kɛ i ko ni kunan b’a la. Jehova tilala ka se di Musa ma ka kabako sabanan kɛ. A laban na, Jehova ko: ‘Ni i ye nin kabakow kɛ, Israɛlkaw na da a la ko ne de ye i ci u ma.’

O kɔfɛ, Musa seginna a ka so. A y’a fɔ Jɛtoro ye ko: ‘A to ne ka segin ne balimaw fɛ Misira, walisa k’a lajɛ u bɛ cogo min na.’ Jɛtoro y’a to Musa ka taa. Musa ye sira minɛ ka segin Misira.

Ekisode 3:​1-22; 4:​1-20.