Maana 77nan

U ma u kun biri duguma

E HAKILI bɛ nin kamalennin saba la wa? Daniɛl teriw don. Olu de ye u ban dumuniw na minnu tun ma ɲi u ma. Babilonɛkaw ye u tɔgɔ da ko Sadrak, Mesak ani Abɛd-Nego. Nka, e ka u lajɛ sisan. Mun na u ma u biri nin ja belebeleba dilannen kɔrɔ i n’a fɔ tɔw? An ka o lajɛ ɲɔgɔn fɛ.

Jehova yɛrɛ tun ye sariya minnu sɛbɛn, ni u bɛ wele ko Cikan Tan, yala i hakili bɛ o sariyaw la wa? O cikan fɔlɔ filɛ: ‘I man kan ka ala wɛrɛ si bato ne kelenpe kɔ.’ Nin kamalenninw ma sɔn ka o sariya sɔsɔ hali ni o tun man nɔgɔn.

Babilonɛ masakɛ Nebukadnezar ye ja dɔ dilan ka mɔgɔba caman wele u ka na bonya da o ja kan. A tilatɔla de filɛ nin ye ka kuma jama fɛ ko: ‘Ni aw ye buru ani nkɔni ni fɔlifɛn sifa wɛrɛw fɔkan mɛn, aw ka kan ka aw biri nin ja sanulama ɲɛkɔrɔ, k’a bato. Ni mɔgɔ o mɔgɔ ma sɔn k’a biri ka nin ja bato, o tigi na fili tasumaba la o yɔrɔnin bɛɛ la.’

Nebukadnezar y’a mɛn minkɛ ko Sadrak ni Mesak ani Abɛd-Nego ma u biri ja ɲɛkɔrɔ, a diminna kosɛbɛ. A ye u lana a ɲɛkɔrɔ ka cogo wɛrɛ di u ma walisa u ka u biri ja ɲɛkɔrɔ. Nka, kamalenninw ye u ka dannaya da Jehova kan. U ko Nebukadnezar ma: ‘An bɛ Ala min bato, o bɛ se ka an kisi, nka, hali ni a ma an kisi, an tɛna an biri i ka ja sanulama ɲɛkɔrɔ.’

Nebukadnezar ye o mɛn tuma min na, a diminna fo k’a dama tɛmɛ. Tasumaba mɛnɛnen yɔrɔ tun man jan u la. Nebukadnezar y’a fɔ a ka mɔgɔw ye ko: ‘Aw ka tasuma fanga bonya siɲɛ wolonwula ka tɛmɛ fɔlɔ kan.’ O kɔfɛ, fanga tun bɛ a ka sɔrɔdasi minnu na ka tɛmɛ tɔw bɛɛ kan, a y’a fɔ olu ye u ka Sadrak, Mesak ani Abɛd-Nego siri, k’u fili o tasumaba la. Tasuma barika tun ka bon fo tasuma mana ye o cɛ barikamaw faga. Nka, kamalennin minnu filila tasuma la, olu kɛra cogo di?

Masakɛ ye tasumaba kɔnɔna lajɛ tuma min na, a siranna kosɛbɛ. A  y’a ka mɔgɔw ɲininka ko: ‘Yala an ma cɛ saba de siri k’u fili tasumaba la wa?’

A ka baarakɛdenw ko: ‘Ɔwɔ.’

Nebukadnezar ko: ‘Nka, ne ɲɛ bɛ cɛ naani de la minnu bɛ ka taama tasuma kɔnɔ. U sirilen tɛ, tasuma tɛ ka fosi fana kɛ u la. Cɛ naaninan bɔlen bɛ mɛlɛkɛ dɔ cogo fɛ.’ Masakɛ gɛrɛla yɔrɔ da la, ka pɛrɛn ko: ‘Sadrak, Mesak ani Abɛd-Nego, aw minnu ye Sebagayabɛɛtigi Ala ka jɔnw ye, aw ye bɔ ka na kɛnɛ ma!’

U bɔra tuma min na, bɛɛ y’a ye ko fɛn fosi ma u sɔrɔ. Masakɛ y’a fɔ ko: ‘Sadrak, Mesak, ani Abɛd-Nego ka Ala ka tanu! A ye a ka mɛlɛkɛ ci ka na u kisi bawo u ma sɔn ka u biri, ka fɛn wɛrɛ si bato, fo ni a kɛra u ka Ala kelenpe ye.’

U ye kantigiya min jira Jehova fan fɛ, yala o tɛ misali ɲuman ye an ka kan ka min ladege wa?

Ekisode 20:3; Daniɛl 3:​1-30.