Maana 81nan

U y’u jigi da ala kan

MƆGƆ ba caman de ye taama jan daminɛ ka bɔ Babilonɛ ka na Jerusalɛm. Nka, u sera yen tuma min na, Jerusalɛm yɔrɔ bɛɛ tun binna, ka tiɲɛ pewu. Mɔgɔ si tun tɛ yen. Israɛlkaw tun ka kan ka fɛn bɛɛ jɔ kokura.

U ye fɛn fɔlɔ minnu jɔ, sarakabɔlan tun bɛ u la. U tun bɛ se ka baganw saraka Jehova ye o kan. Kalo damadɔw o kɔfɛ, Israɛlkaw ye Alabatoso jɔli daminɛ. Nka, u jugu minnu tun sigilen bɛ u kɛrɛfɛ, olu tun t’a fɛ Israɛlkaw ka Alabatoso jɔ. O kosɔn, u y’a ɲini ka Israɛlkaw lasiran walisa u ka baara jɔ. A laban na, Israɛlkaw juguw ye Perse masakɛ bila a ka sariya bɔ walisa ka Alabatoso jɔli baara jɔ.

San caman tɛmɛna, wa nin ye a san 17 de ye ko Israɛlkaw seginna ka bɔ Babilonɛ. O la sa, Jehova ye kira Agize ni kira Zakari ci Israɛlkaw ma ko u ka Alabatoso jɔli daminɛ kokura. Olu ye u jigi da Ala ka dɛmɛ kan, ka kiraw lamɛn. U ye Alabatoso jɔli daminɛ kokura, hali ni sariya tun bɔra ko u tun man kan k’o jɔ.

O de la, Persekaw ka kuntigi dɔ nana Israɛlkaw ɲininka walisa k’a dɔn mɔgɔ min y’a fɔ u ye ko u ka Alabatoso jɔ. O kuntigi tun tɔgɔ ye ko Tatenai. Israɛlkaw y’a jaabi ko ka u to Babilonɛ, Masakɛ Sirus y’a fɔ u ye ko: ‘Aw ye taa Jerusalɛm, ka Jehova, aw ka Ala batoso jɔ.’

O la sa, Tatenai ye lɛtɛrɛ ci Babilonɛ ka ɲininkali kɛ ni Sirus tun ye o fɔ tiɲɛ na. O waati y’a sɔrɔ Sirus tun sara. Nka, a ma mɛn, lɛtɛrɛ jaabi nana ka bɔ Perse masakɛ kura yɔrɔ. O lɛtɛrɛ y’a jira ko Sirus tun ye o fɔ tigitigi. Masakɛ y’a sɛbɛn ko: ‘Aw ye Israɛlkaw to u ka u ka Ala batoso jɔ. Ne bɛ ci di aw ma fana aw ka u dɛmɛ.’ San naani ɲɔgɔn kɔnɔ, batoso jɔra ka ban. Israɛlkaw nisɔndiyara kosɛbɛ.

San caman tɛmɛna sisan. Bɛrɛ t’a jɛ san 48 na ko Alabatoso jɔra ka ban. Nka, Jerusalɛm kɔnɔmɔgɔw tun ye faantanw ye. Dugu ni Ala batoso tun cɛ man ɲi ten. Esdrasi min ye Israɛlka ye, a tun sigilen bɛ Babilonɛ. Yen, a y’a mɛn ko baara wɛrɛ ka kan ka kɛ Ala batoso la walisa ka a cɛɲɛ. I b’a dɔn a ye min kɛ wa?

 Esdrasi taara Perse masakɛ Artakserkses fɛ. O masakɛ ɲuman ye fɛn caman di Esdrasi ma walisa a ka taa ni u ye Jerusalɛm. Israɛlka minnu tun sigilen bɛ Babilonɛ, Esdrasi y’a ɲini olu fɛ, u ka ale dɛmɛ ka taa ni o fɛnw ye Jerusalɛm. Mɔgɔ 6 000 ɲɔgɔn sɔnna ka a bilasira ka taa Jerusalɛm. Warijɛ caman ani sanu caman ani fɛn sɔngɔ gɛlɛn caman wɛrɛw tun bɛ u bolo ka taa ni u ye Jerusalɛm.

Esdrasi jɔrɔla kosɛbɛ, bawo mɔgɔjugu caman tun bɛ sira kan. O mɔgɔjuguw tun bɛ se k’u ka warijɛ ni u ka sanu bɔsi u la, k’u faga. O kosɔn, Esdrasi ye mɔgɔw bɛɛ lajɛ i ko i ɲɛ b’a la cogo min na ja kan. O kɔ u ye Jehova deli a k’u lakana u ka taama jan kɔnɔna na ka segin Jerusalɛm.

Jehova ye u lakana. Kalo naani kɔfɛ, u sera hɛrɛ la Jerusalɛm. Yala nin ko t’a jira ko mɔgɔ minnu bɛ u jigi da Jehova kan, Jehova bɛ se ka olu lakana wa?

Esdrasi tilayɔrɔba 2nan ka na 8nan na.