Maana 55nan

Cɛnin bɛ Ala ka baara la

I ka nin cɛnin lajɛ. A tɔgɔ ye ko Samuɛl. Cɛ min bolo bɛ Samuɛl kunna, o ye Israɛl sarakalasebaga kuntigi Eli ye. Cɛ tɔ kelen ye Samuɛl fa ye, a tɔgɔ ye ko Ɛlkana. Muso ye Samuɛl ba ye, a tɔgɔ ye ko Hana. Olu de nana ni Samuɛl ye Eli fɛ.

Samuɛl si ye san naani, walima san duuru ɲɔgɔn dɔrɔn de ye. Nka, ale ni Eli ani sarakalasebaga tɔw bɛna to ɲɔgɔn fɛ yan, Jehova ka finiso la. Mun na Ɛlkana ni Hana nana ni nin ɲɔgɔn denmisɛnnin ye walisa a ka baara kɛ Jehova ye finiso la? An ka o lajɛ ɲɔgɔn fɛ.

A san damadɔw dɔrɔn de filɛ nin ye Hana tun ɲɛnasisilen bɛ bawo a tun ma se ka den sɔrɔ. Nka Hana tun b’a fɛ kosɛbɛ ka den sɔrɔ. O la sa, don dɔ la, Hana nalen Jehova ka finiso la, a ye Ala deli ko: ‘O Jehova, i kana ɲinɛ ne kɔ. Ni i ye denkɛ di ne ma, ne bɛ layidu ta i ye ko ne bɛna o di i ma walisa a ka baara kɛ i ye a ka ɲɛnamaya bɛɛ kɔnɔ.’

Jehova ye Hana ka delili jaabi. Kalo damadɔw o kɔfɛ, Hana ye Samuɛl bange. Hana kɛra a denkɛnin fɛ kosɛbɛ. Kabini Samuɛl ye den fitininin ye, Hana y’a kalan Jehova ko la. Hana y’a fɔ a cɛ ye ko: ‘Ni Samuɛl da bɔra sin na, ne na taa ni a ye finiso la walisa a ka baara kɛ Jehova ye yen.’

An ɲɛ bɛ Hana ni Ɛlkana la ka o de kɛ yan. Ikomi Samuɛl bangebagaw tun y’a kalan ka ɲɛ, Samuɛl nisɔndiyara ka se ka baara kɛ finiso la Jehova ye. San o san, Hana ni Ɛlkana tun bɛ na Jehova bato o finiso kɛrɛnkɛrɛnnen na, ka u ka cɛnin fana lajɛ. San o san fana, Hana tun bɛ duloki bolontan dɔ kala ka na o di Samuɛl ma.

Sanw tɛmɛna. Samuɛl tora baara la Jehova ye finiso la. Jehova tun bɛ Samuɛl kanu, jama fana tun b’a kanu. Nka sarakalasebaga kuntigi Eli denkɛw Hofini ni Fineɛs tun man ɲi. U tun bɛ kojugu  caman kɛ, u tun bɛ tɔw fana bila u kana Jehova ka kuma mɛn. Eli tun ka kan k’u bɔ sarakalasebagaya la, nka a ma o kɛ.

Samuɛl kɛlen kamalennin ye, a m’a to kojugu minnu tun bɛ ka kɛ finiso kɔnɔ, olu k’a bila ka Jehova ka baara jɔ. Nka, ikomi o waati la, mɔgɔ minnu tun bɛ Jehova fɛ tiɲɛ na, olu tun man ca, Jehova ye waati jan kɛ k’a sɔrɔ a ma kuma hadamaden si fɛ dugukolo kan. Nka, Samuɛl kɔrɔbayara dɔɔnin tuma min na, nin ko kɛra:

Ka Samuɛl to sunɔgɔ la finiso kɔnɔ, kumakan dɔ y’a lakunun. Samuɛl ye o kumakan jaabi ko: ‘Ne filɛ.’ A wulila o la, ka boli ka taa Eli fɛ, k’a fɔ ko: ‘I ye ne wele, ne filɛ.’

Nka Eli y’a jaabi ko: ‘Ne ma i wele, segin ka taa i da.’ Samuɛl taara a da.

Welekan bɔra siɲɛ filanan na ko: ‘Samuɛl!’ Samuɛl wulila ka boli ka taa Eli fɛ, k’a fɔ a ye ko: ‘I ye ne wele, ne filɛ.’ Nka Eli ko: ‘Ne ma i wele, ne denkɛ. Taa i da.’ Samuɛl seginna ka taa a da.

Kumakan bɔra siɲɛ sabanan na tuguni ko: ‘Samuɛl!’ Samuɛl bolila ka taa Eli fɛ k’a fɔ ko: ‘Ne filɛ, i ye ne wele sisan kɔni.’ Eli y’a dɔn o tuma de la ko Jehova de bɛ sɔrɔ k’a wele. O kosɔn, a y’a fɔ Samuɛl ye ko: ‘Taa i da. Ni a ye i wele kokura, i k’a fɔ ko: ‘Kuma Jehova, i ka baarakɛden bɛ ka i lamɛn.’

Jehova ye Samuɛl wele kokura tuma min na, Samuɛl kumana i ko Eli y’a fɔ a ye cogo min na. Jehova y’a fɔ Samuɛl ye ko a bɛna Eli ni a denkɛw ɲangi. Kɔfɛ, Hofini ni Fineɛs sara Israɛl ni Filisitikaw ka kɛlɛ la. Eli ye o mɛn tuma min na dɔrɔn, a bɔra a ka sigilan kan ka bin, ka a kan kari. Ale fana sara. Jehova ye kuma min fɔ, o kɛra.

Samuɛl kɔrɔbayara tuma min na, a kɛra Israɛl kiritigɛla laban ye. A kɔrɔla tuma min na, jama y’a ɲini a fɛ ko: ‘Masakɛ dɔ ta k’a sigi an kunna.’ Samuɛl tun t’a fɛ k’o kɛ, bawo Jehova de ye u ka masakɛ ye tiɲɛ na. Nka, Jehova y’a fɔ Samuɛl ye ko a ka jama ka kuma lamɛn.

1 Samuɛl 1:​1-28; 2:​11-36; 4:​16-18; 8:​4-9.