Fangaba bɛ cɛ min na
Maana 54nan
Fangaba bɛ cɛ min na
CƐ MIN fanga ɲɔgɔn ma ye fɔlɔ, yala i bɛ o tɔgɔ dɔn wa? O tun ye kiritigɛla dɔ de ye min tɔgɔ ye ko Samsɔn. Jehova de ye o fanga di a ma. Sani Samsɔn tun ka wolo, Jehova y’a fɔ Samsɔn woloba ye ko: ‘I bɛna denkɛ dɔ sɔrɔ sɔɔni. A bɛna Israɛl ɲɛminɛ, k’a kisi k’a bɔ Filisitikaw bolo.’
Filisitikaw tun ye mɔgɔjuguw ye. U tun sigilen bɛ Kanan jamana na. Sɔrɔdasi caman tun bɛ u bolo. U tun ye Israɛlkaw tɔɔrɔ kosɛbɛ. Don dɔ la, Samsɔn tun bɛ ka taa Filisitikaw ka yɔrɔ la, a ni waraba belebele dɔ bɛnna min tun bɛ ka gɔrɔndɔ. O yɔrɔnin bɛɛ la, Samsɔn sinna ka o waraba faga ni a bolo dɔrɔn ye. A ye Filisitika kɛmɛ caman fana faga.
Kɔfɛ, Samsɔn ɲɛbɔra muso dɔ fɛ min tɔgɔ ye ko Dalila. Filisitikaw kuntigiw ye layidu ta Dalila ye ko ni a sera k’a fɔ u ye, Samsɔn barikaba bɛ bɔ fɛn min na, u kelen-kelen bɛɛ bɛna warijɛ 1 100 di a ma. Dalila tun b’a fɛ k’o wari bɛɛ sɔrɔ. Dalila tun tɛ Samsɔn teri sɛbɛ ye. A tun tɛ Ala ka jamakulu teri ye fana. O kosɔn, a tora ka Samsɔn ɲininka walisa k’a dɔn Samsɔn barika tun bɛ bɔ fɛn min na.
Dalila tun bɛ min ɲini na, a ye o sɔrɔ, bawo Samsɔn labanna k’a ka gundo fɔ a ye. A ko: ‘Ne kunsigi ma tigɛ abada. Kabini ne wolotuma, Ala ye ne ta ka kɛ a ka baarakɛden kɛrɛnkɛrɛnnen sugu dɔ ye, min bɛ wele ko Nazireɛn. Ni ne kunsigi tigɛra dɔrɔn, ne barika bɛ ban.’
Dalila ye o dɔn tuma min na, a ye Samsɔn lasunɔgɔ a kunbere kan. A tilala ka cɛ dɔ wele o ka na Samsɔn kunsigi tigɛ. Samsɔn kununna tuma min na, a y’a ye ko a barika banna. Filisitikaw nana Samsɔn minɛ, ka a ɲɛ fila bɛɛ ci, ka a kɛ u ka jɔn ye.
Don dɔ la, Filisitikaw ye ɲɛnajɛba kɛ walisa k’u ka ala bato min tɔgɔ ye ko Dagɔn. Filisitikaw ye Samsɔn labɔ kaso la walisa ka yɛlɛ a ma. Nka, sani o don tun ka se, Samsɔn tun kunsigi bɔra kokura. Cɛnin min tun y’a bolo minɛ, Samsɔn y’a fɔ o ye ko: ‘Samasen minnu bɛ so jukɔrɔ, a to ne ka maga olu la.’ O kɔfɛ, Samsɔn ye Jehova deli a ka barika di a ma. A ye a bolow da samasenw kan, ka pɛrɛn ko: ‘Ne ni Filisitikaw ka sa ɲɔgɔn fɛ.’ Filisitikaw 3 000 de tun bɛ o ɲɛnajɛ la. Samsɔn y’a biri, k’a fanga bɛɛ digi samasenw kan. So binna o mɔgɔjuguw bɛɛ lajɛlen kan, k’u bɛɛ faga.
Kiritigɛlaw tilayɔrɔba 13 ka na 16 la.