Maana 37nan

Finiso dilanna bato kama

FƐN min dilannen filɛ nin ye, i b’a dɔn mun don wa? Finiso kɛrɛnkɛrɛnnen dɔ don min dilanna Jehova Ala bato kama. O finiso bɛ wele  fana ko “tabernacle” tubabukan na. Israɛlkaw y’a dilan ka a ban san kelen u bɔlen kɔfɛ Misira. I b’a dɔn jɔni y’a fɔ u ye ko u ka nin finiso dilan wa?

Jehova de y’a fɔ u ye k’u k’a dilan. Musa tun bɛ Sinayi kulu kan tuma min na, Jehova y’a jira a la finiso ka kan ka dilan cogo min na. Jehova y’a fɔ a ye ko a ka dilan cogo la min b’a to finiso bɛ se ka waraka nɔgɔya la. O cogo la, a yɔrɔw bɛ se ka ta, ka taa yɔrɔ wɛrɛ la, ka tila ka don ɲɔgɔn na kokura. O la sa, ni Israɛlkaw tun bɛ bɔ yɔrɔ dɔ la ka taa yɔrɔ dɔ wɛrɛ la, kungokolon kɔnɔ, u tun bɛ taa ni finiso ye u bolo.

N’i ye soden fitinin lajɛ min bɛ fo finiso kɔnɔna na, i bɛ kɛsu dɔ ye a kɔnɔ. O kɛsu tun bɛ wele ko layidu wagande. Mɛlɛkɛ walima serubɛn fila bɛ a kunna. O serubɛn fila bɛɛ tun dilanna ni sanu ye. Ala tun ye Cikan tan sɛbɛn kabakurun fɔlɔ minnu kan, Musa tun ye olu ci. Nka, Ala tilala ka Cikan tan sɛbɛn kokura kabakurun pɛnpɛrɛnnen fila wɛrɛw kan. O kabakurunw tun maralen bɛ layidu wagande kɔnɔ. Manɛ tun maralen bɛ daga min kɔnɔ, o daga fana tun bilala layidu wagande kɔnɔ. I hakili b’a la manɛ ye fɛn min ye wa?

Mɔgɔ minnu bɛ baara kɛ finiso kɔnɔ, olu bɛ wele ko sarakalasebagaw. Jehova ye Musa kɔrɔkɛ Aron de ta walisa a ka kɛ sarakalasebagaw kuntigi ye. Ale de tun bɛ mɔgɔw ɲɛminɛ Jehova batoli la. Jehova ye Aron denkɛw fana kɛ sarakalasebagaw ye.

E ka finiso soden belebele lajɛ sisan. A ka bon ni soden fitinin ye siɲɛ fila. Sisi bɛ ka bɔ kɛsu fitinin min na, i ɲɛ bɛ o la wa? O ye sarakabɔlan de ye. Sarakalasebagaw tun bɛ wusulan kasa duman jeni o kan. Fitinɛba dɔ fana tun bɛ o soden kɔnɔ, yeelen wolonwula tun bɛ min na. Fɛn sabanan min tun bɛ o soden kɔnɔ, o ye tabali ye, nburukun 12 tun bɛ bila min kan.

Finiso dukɛnɛ na, i tun bɛ minɛn belebeleba dɔ ye min falen bɛ ji la. Sarakalasebagaw tun bɛ o ji de ta walisa k’u bolow ni u senw ko. Sarakabɔlanba dɔ fana tun bɛ yen. Bagan minnu fagara, olu tun bɛ jeni o yɔrɔ de la Jehova ye. Ala ka finiso tun bɛ bugufyɛ cɛmancɛ la, Israɛlkaw tun sigilen bɛ u ka finiso kɔnɔ, k’a lamini.

Ekisode 25:8-40; 26:1-37; 27:1-8; 28:1; 30:1-10, 17-21; 34:1, 2; Heburuw 9:1-5.