Maana 48nan

Gabaonkaw ye hakili sɔrɔ

KANAN dugu caman tun bɛ ka u labɛn walisa ka Israɛl kɛlɛ. U hakili la u bɛ se Israɛl la. Nka, o tun tɛ Israɛl kɛrɛfɛdugu mɔgɔ dɔw hakilila ye. O mɔgɔw tun ye Gabaonkaw ye. Gabaonkaw tun dalen b’a la ko Ala de bɛ ka Israɛlkaw dɛmɛ. O kosɔn u tun t’a fɛ ka Ala kɛlɛ. I b’a dɔn Gabaonkaw ye min kɛ wa?

U y’a kɛ i n’a fɔ u tun sigilen bɛ yɔrɔ jan. U dɔw ye fini farafaralenw don u kan na, ka sanbara kolon don u sen na. U ye u ka faliw doni ni bɔrɛ kolonw ye, ka nburu kɔrɔ jalan dɔw ta u fɛ. O kɔfɛ, u taara Josue fɛ, k’a fɔ a ye ko: ‘An bɔra yɔrɔ jan. An ye Jehova, aw ka Alaba komɛn. A ye ko minnu bɛɛ kɛ aw ye Misira, an ye olu bɛɛ mɛn. O kosɔn, an ɲɛmɔgɔw ko an ka dumuni ta ka taamajan daminɛ, ka na i fɛ, walisa k’a fɔ i ye ko: “An ye aw ka jɔnw ye. I ka layidu ta an ye ko aw tɛna an kɛlɛ.” E yɛrɛ ɲɛ b’a la cogo  min na, taamajan ye an ka finiw kɔrɔ, an ka nburu fana kɔrɔla ka ja.’

Josue ni kuntigi tɔw dara Gabaonkaw la. U ye layidu ta ko u tɛna Gabaonkaw kɛlɛ. Nka, tile saba o ko kɔfɛ, u y’a mɛn ko Gabaonkaw sigilen bɛ u dafɛla yɛrɛ de la.

Josue ye u wele k’u ɲininka ko: ‘Mun na aw y’a fɔ an ye ko aw bɔra yɔrɔ jan na?’

Gabaonkaw y’a jaabi ko: ‘A fɔra an ye ko Jehova, aw ka Ala, ye layidu ta ko a bɛna Kanan jamana bɛɛ di aw ma. O la sa, an siranna aw ka na ka an faga.’ Israɛlkaw ye u ka layidu dafa. U ma Gabaonkaw faga, nka u ye Gabaonkaw kɛ u ka jɔnw ye.

Gabaonkaw ye bɛn kɛ ni Israɛl ye minkɛ, o ye Jerusalɛm masakɛ dusu bɔ. O kosɔn, Jerusalɛm masakɛ y’a fɔ masakɛ naani wɛrɛw ye ko: ‘Aw ka na, ka ne dɛmɛ an ka Gabaon kɛlɛ.’ O masakɛ duuru wulila ka taa Gabaon kɛlɛ. Gabaonkaw ye o hakili min sɔrɔ ka bɛn don u ni Israɛlkaw cɛ, yala o kɛra hakilitigiyako ye wa? An bɛna o ye maana nata la.

Josue 9:​1-27; 10:​1-5.