Maana 52nan

Jedeɔn ni a ka cɛ 300

I ƝƐ b’a la ko min bɛ ka kɛ yan yɔrɔ la wa? Nin cɛw ye Israɛl sɔrɔdasiw de ye. Cɛ minnu birilen bɛ, u bɛ ka ji de min. Cɛ min jɔlen bɛ u kɛrɛfɛ, o ye Jedeɔn ye. Kiritigɛla don. Jedeɔn bɛ ka u jimincogo lajɛ.

Ni i ye cɛw lajɛ koɲuman, e b’a ye ko u ka jimincogo tɛ kelen ye. Saba ye u ɲɛda biri ji la, nka, kelen ye ji ta a tɛgɛ kɔnɔ k’a min, bawo  a b’a fɛ ka yɔrɔ bɛɛ lajɛ walisa k’a ye fɛn min bɛ ka kɛ. O tun ye ko ye min nafa ka bon kosɛbɛ, bawo Jehova y’a fɔ Jedeɔn ye ko cɛ minnu jimintɔ mana to kɔlɔsili la, a ka o cɛw dɔrɔn de ta. Nka, ko a ka tɔw to u ka taa u ka so. Mun na Ala ye o fɔ? An ka o lajɛ ɲɔgɔn fɛ.

Israɛlkaw bɛ gɛlɛyaba kɔnɔ kokura. O kɛra bawo u ma Jehova ka kuma mɛn. Madiyankaw sera Israɛlkaw la ka u tɔɔrɔ kosɛbɛ. O la sa, Israɛlkaw kulela ka Jehova wele walisa a k’u dɛmɛ. Jehova ye u kulekanw mɛn.

Jehova y’a fɔ Jedeɔn ye a ka mɔgɔ dow ta sɔrɔdasiw cɛma ka olu kɛ kɛlɛbolo ye. Jedeɔn ye sɔrɔdasi 32 000 sugandi, nka sɔrɔdasi minnu tun nana Israɛl kɛlɛ, olu tun ye cɛ 135 000 ye. O bɛɛ n’a ta, Jehova y’a fɔ Jedeɔn ye ko: ‘Aw ka ca kojugu.’ Mun na Jehova ye o fɔ?

Jehova ye o fɔ bawo ni Israɛlkaw sera u juguw la, u bɛ se k’a miiri ko olu yɛrɛ ka fanga de y’a to u sera Madiyankaw la. U bɛ se k’a miiri fana ko u mago yɛrɛ tun tɛ Jehova ka dɛmɛ la. O kosɔn, Jehova y’a fɔ Jedeɔn ye ko: ‘A fɔ u ye ko mɔgɔ minnu bɛ siran, olu ka segin u ka so.’ Jedeɔn ye o fɔ tuma min na, a ka sɔrɔdasi 22 000 seginna u ka so. Cɛ 10 000 dɔrɔn tora Jedeɔn bolo ka taa sɔrɔdasi 135 000 kɛlɛ.

Nka, Jehova ye min fɔ, e k’o lamɛn! A ko: ‘I ka cɛw ka ca halisa.’ A ko Jedeɔn ka taa ni u ye jida la. Mɔgɔ minnu mana u ɲɛda biri ji la, Jedeɔn ka olu to u ka segin u ka so. Jehova ye layidu ta Jedeɔn ye ko: ‘Mɔgɔ minnu jimintɔ tora ka yɔrɔw filɛ-filɛ, ne bɛna se di i ma o cɛ 300 fɛ.’

Kɛlɛkɛwaati sera tuma min na, Jedeɔn ye a ka cɛ 300 tila kulu saba ye. A ye mɔɲɔn mɛnɛnen kɛ bɔgɔdaga kɔnɔ, ka o ni buru fyɛta di a ka cɛ kelen-kelen bɛɛ ma. Dugutila fɛ, Jedeɔn ni a ka sɔrɔdasiw bɛɛ ye ɲɔgɔn lajɛ ka taa u juguw ka yɔrɔ lamini. U bɛɛ ye u ka buru fyɛ, k’u ka dagaw ci, ka kule ko: ‘Jehova ka npan, ani Jedeɔn ka npan!’ U juguw girinna ka wuli, u m’a dɔn fɛn min kɛra. U siranna kosɛbɛ. U bɛɛ ye boli daminɛ. Israɛlkaw sera u la.

Kiritigɛlaw tilayɔrɔba 6 ka na tilayɔrɔba 8 la.