Maana 53nan

Jefite ye layidu min ta

YALA i delila ka layidu ta, ka tila k’a ye ko i ye min fɔ, a ka gɛlɛn i bolo k’o kɛ wa? O de ye cɛ sɔrɔ min bɛ nin ja kan. O de y’a to a ɲɛsisilen bɛ kosɛbɛ nin cogo la. Cɛ ye Israɛl kiritigɛla dɔ de ye. A ja tun ka gɛlɛn. A tɔgɔ ye ko Jefite.

Jefite ka waati la, Israɛlkaw tun ye Jehova ka bato bila. U tun bɛ ka kojugu kɛ kokura. O kosɔn, Jehova y’a to Amɔn ka jamakulu ka u tɔɔrɔ kosɛbɛ. O ko ye Israɛlkaw bila ka kule ka Jehova wele. U ko: ‘An ye jurumu kɛ i la. An b’i deli, na an tila ka bɔ Amɔn ka jamakulu bolo.’

Israɛlkaw nimisara kosɛbɛ u ka kɛwale juguw la. U ye Jehova bato kokura walisa k’a jira ko u nimisara. O kosɔn, Jehova y’u dɛmɛ tuguni.

Israɛlkaw ye Jefite sugandi walisa ka Amɔn ka jamakulujugu kɛlɛli ɲɛminɛ. Jefite tun b’a fɛ tiɲɛ na Jehova ka a dɛmɛ kɛlɛ la. O de y’a to, a ye layidu ta Jehova ye ko: ‘Ni i ye ne dɛmɛ ne ka se Amɔn ka jamakulu la, mɔgɔ fɔlɔ min bɛna bɔ ne ka so da fɛ, ka na ne kunbɛn, ne natɔ ka bɔ kɛlɛkɛyɔrɔ la, ne bɛna o tigi di i ma.’

Jefite ye layidu min ta, Jehova ye o mɛn. A ye Jefite dɛmɛ a ka se u juguw la. Jefite natɔ ka bɔ kɛlɛkɛyɔrɔ la, i b’a dɔn mɔgɔ fɔlɔ min bɔra ka na a kunbɛn wa? O kɛra a denmuso ye, o min  kelenpe dɔrɔn b’a bolo. Jefite kulela. A ko: ‘E, ne denmuso! I ye ɲɛnasisiba lase ne ma! Ne ye layidu ta Jehova ye, ne tɛ se ka ne fori ka bɔ o kɔrɔ.’

Jefite denmuso ye a fa ka layidu mɛn tuma min na, a ɲɛnasisira a daminɛ na, bawo o kɔrɔ ye ko a ka kan ka taa, ka a Fa ni a teriw to yen, ani ka a ka ɲɛnamaya tɔ kɛ baara la Jehova ka finiso la, Silo. O kosɔn, Jefite denmuso y’a fɔ a fa ye ko: ‘N’i ye layidu ta Jehova ye, i ka kan k’o kɛ.’

O la sa, Jefite denmuso taara Silo, ka a ka ɲɛnamaya tɔ kɛ Jehova ka baara la, Jehova ka finiso la. San o san, tile naani kɔnɔ, Israɛlmusow bɛ taa bɔ a ye yen yɔrɔ la, walisa ka Jefite denmuso fo. U tun bɛ nisɔndiya ɲɔgɔn fɛ. Israɛlkaw kɛra Jefite denmuso fɛ kosɛbɛ, bawo a kɛra Jehova batobaga ɲuman ye.

Kiritigɛlaw 10:​6-18; 11:​1-40.