Maana 46nan

Jeriko laminikogobaw

MUN ye Jeriko laminikogobaw bin? A bɛ i ko ni bɔnbu dɔ de binna u kan. Nka, o waati la, bɔnbu tun tɛ yen. Hali marifa tun tɛ mɔgɔw bolo. Jehova de ye kabako dɔ wɛrɛ kɛ tan. O ko kɛra cogo min na, an k’o lajɛ ɲɔgɔn fɛ.

Jehova ye min fɔ Josue ye, e k’o lamɛn. A ko: ‘E ani i ka sɔrɔdasiw, aw ka taama ka dugu lamini. Aw ka taama k’a lamini don o don siɲɛ kelen, tile wɔɔrɔ kɔnɔ. Aw ka layidu wagande ta aw fɛ. Sarakalasebaga wolonwula fana ka taama layidu wagande ɲɛfɛ, k’u ka buruw fyɛ.’

 ‘Tile wolonwulanan don, aw ka kan ka taama ka dugu lamini siɲɛ wolonwula. Aw ka tila ka burufyɛkan fɔ k’a janya. Aw kelen-kelen bɛɛ ka aw pɛrɛn, ka kɛlɛ kulekanba ci. Ni aw ye o kɛ, kogow na wurubata ka bin.’

Josue ni jama y’a kɛ i ko Jehova y’a fɔ cogo min na. U tun bɛ ka taama tuma min na ka dugu lamini, u bɛɛ tun makunnen don. Mɔgɔ si ma kuma hali kelen bɔ a da la. Burufyɛkan ni mɔgɔw senkan dɔrɔn de tun bɛ mɛn. Jeriko dugu kɔnɔmɔgɔ minnu ye Ala ka jamakulu juguw ye, olu siranna kosɛbɛ. I ɲɛ bɛ nin jurukisɛ bilenman dulonnen na fenɛtiri la wa? Jɔni ka fenɛtiri don? Rahab ka fenɛtiri don. Sɛgɛsɛgɛlikɛla fila minnu cira ka taa Jeriko cogo lajɛ, olu y’a fɔ Rahab ye a ka min kɛ, Rahab ye o kɛ. Rahab ni a somɔgɔ bɛɛ tun bɛ ɲɔgɔn fɛ a ka so kɔnɔ, ka nin kow kɔlɔsi.

Tile wolonwulanan don sera. Israɛlkaw kɛlen kɔ ka dugu lamini siɲɛ wolonwula, burufiyɛkan bɔra, sɔrɔdasiw ye kulekanba ci, laminikogobaw binna. Josue ko: ‘Aw ka dugu kɔnɔmɔgɔw bɛɛ faga. Aw ka dugu ni a kɔnɔfɛnw bɛɛ jeni, fo ni a kɛra warijɛ ni sanu ni nsiranɛgɛ ni nɛgɛfin ye. Aw ka o fɛnw bila Jehova ka finiso kɔnɔ, nafolo marayɔrɔ la.’

Sɛgɛsɛgɛlikɛla fila minnu tun nana Jeriko dugu cogo lajɛ, Josue y’a fɔ olu ye ko: ‘Aw ka taa Rahab ka so kɔnɔ, ka a labɔ, ale ni a somɔgɔw bɛɛ.’ Rahab ni a somɔgɔw kisira, i ko sɛgɛsɛgɛlikɛlaw tun ye layidu ta a ye cogo min na.

Josue 6:​1-25.