Maana 45nan

Jurdɛn baji tigɛli

E KA Israɛlkaw lajɛ ka Jurdɛn tigɛ. A ji taara min? Ikomi sanji caman bɛ na o waati la, ba tun falenba don a miniti damadɔw de filɛ nin ye. Nka, a ji bɛɛ taara sisan. Israɛlkaw bɛ ka ba tigɛ dugukolo jalan kan, i n’a fɔ u y’a kɛ cogo min na Kɔgɔji Bilen na. Ji bɛɛ dun taara min? An k’o lajɛ ɲɔgɔn fɛ.

Israɛlkaw tun bɛna Jurdɛn tigɛ tuma min na, ka kɛɲɛ ni Jehova ka ci fɔlen ye, Josue y’a lase jama ma ko: ‘Sarakalasebagaw ka layidu wagande ta, ka tɛmɛ an ɲɛ. Ni u ye u sen don ji la dɔrɔn, jiwoyo bɛna jɔ.’

O la sa, Sarakalasebagaw ye layidu wagande ta, k’u bila jama ɲɛfɛ ka taa. U sera bada la tuma min na, sarakalasebagaw sinna ka don ji la. Ji tun bɛ ka woyo ni barika ye. Ba tun ka dun fana. Nka, sarakalasebagaw senw sera ji ma tuma min na, jiwoyo jɔra. O ye Ala ka kabako dɔ ye. Ji bɛ woyo ka bɔ fan min fɛ, Jehova ye o yɔrɔ ji lajɔ. Sɔɔni dɔrɔn, ji fosi tun tɛ ba la tun.

Sarakalasebaga minnu ye layidu wagande  ta, olu taara u jɔ ba cɛmancɛ la, ji tun tɛ min na tun. Yala i ɲɛ bɛ u la yan ja kan wa? U jɔlen tora yen fo Israɛlkaw bɛɛ ye ba tigɛ ka ban tuma min na dugukolo jalan kan.

Mɔgɔ bɛɛ ye ba tigɛ ka ban tuma min na, Jehova ye Josue bila k’a fɔ cɛ barikama 12 ye ko: ‘Sarakalasebagaw jɔlen bɛ yɔrɔ min na ni layidu wagande ye, aw ka taa kabakurun 12 ta yen. Ni aw sera aw si yɔrɔ la bi ka u bila yen. O la sa, don dɔ la, ni aw denw ye aw ɲininka o kabakurunw kɔrɔ la, aw k’a fɔ u ye ko tuma min na sarakalasebagaw ye Jurdɛn baji tigɛli daminɛ ni Jehova ka layidu wagande ye u kan na, jiwoyo jɔra. Nin kabakurunw bɛna aw hakili jigin o kabako la.’ Sarakalasebagaw tun jɔlen bɛ yɔrɔ min na badingɛ kɔnɔ, Josue ye kabakurun 12 fana da ɲɔgɔn kan, o yɔrɔ la yen.

Josue labanna k’a fɔ layidu wagande tabagaw ye ko: ‘Aw ka bɔ badingɛ kɔnɔ.’ U bɔlen kɔ yen dɔrɔn, ji ye woyoli daminɛ kokura.

Josue 3:​1-17; 4:​1-18.