Musa ye farakurun gosi
Maana 40nan
Musa ye farakurun gosi
SAN caman tɛmɛna: San 10, san 20, san 30, san 39! Israɛlkaw bɛ kungokolon kɔnɔ halisa. Nka, o sanw bɛɛ kɔnɔna na, Jehova y’a mago don a ka mɔgɔw la. A ye u balo ni manɛ ye. A ye u ɲɛminɛ tilefɛ ni kabasen ye, ka u ɲɛminɛ sufɛ ni kabasen tasumama ye. O sanw bɛɛ kɔnɔna na, u ka finiw ma tiɲɛ, u senw fana ma funun.
Nin ye a san 40nan ye sisan ko Israɛlkaw bɔra Misira jamana na. An bɛ o san kalo fɔlɔ de la. Israɛlkaw seginna ka na kokura Kadɛs. Ka u to o yɔrɔ de la, Musa tun ye sɛgɛsɛgɛlikɛla 12 ci walisa ka taa Kanan jamana cogo lajɛ, ka na o fɔ a ye. O ko kɛra a san 40 ɲɔgɔn de filɛ nin ye. Musa kɔrɔmuso Mariyama sara Kadɛs. Nka, i ko an bɛna a ye cogo min na, kow ɲagamina yen yɔrɔ la kokura tun, i n’a fɔ a tun kɛra cogo min na san caman o ɲɛ.
Mɔgɔw ma se ka ji sɔrɔ. U diminnen nana Musa ma ko: ‘Hali ni an tun sara, o ka fisa ni nin ye. Mun na aw ye an labɔ Misira ka na ni an ye nin yɔrɔ jugu la, fɛn fosi tɛ falen yɔrɔ min na? Sumankisɛ tɛ yan, toro tɛ yan, rezɛn tɛ yan, gerenati tɛ yan. Hali ji tɛ yan k’a min.’
Musa ni Aron taara finiso la tuma min na ka Jehova deli, Jehova y’a fɔ Musa ye ko: ‘Jama dalajɛ. O kɔfɛ, jama bɛɛ ɲɛna, i ka kuma farakurun fɛ. Ji bɛna bɔ farakurun na min bɛna jama ani baganw bɛɛ bɔ.’
O la sa, Musa ye jama lajɛ, k’a fɔ ko: ‘Aw bɛɛ ka lamɛnni kɛ, aw minnu ma da Ala la. Yala Aron, ani ne ka kan ka ji bɔ nin farakurun na ka a di aw ma wa?’ A kɛlen k’o fɔ, Musa ye farakurun gosi ni a ka bere ye siɲɛ fila. Jiba sinna ka bɔ farakurun na. Jama bɛɛ ani baganw ye ji sɔrɔ k’a min, k’u fa.
Nka, Jehova diminna Musa ni Aron kɔrɔ. I b’a dɔn mun na wa? Musa ni Aron ko olu de bɛna ji bɔ farakurun na. Nka, tiɲɛ yɛrɛ la, Jehova de ye ji bɔ farakurun na, olu tun tɛ. Ikomi Musa ni Aron ma tiɲɛ fɔ o ko la, Jehova ko ale bɛna u ɲangi. A ko: ‘Aw tɛna ne ka jamakulu ɲɛminɛ ka don Kanan.’
A ma mɛn Israɛlkaw bɔra Kadɛs. Waati dɔɔnin o kɔfɛ, u sera kulu la min tɔgɔ ye ko Hor. Aron sara kulu kunna yen, k’a si to san 123 la. Israɛlkaw ɲɛnasisira kosɛbɛ. U y’a su kasi tile 30 kɔnɔ. Aron denkɛ Eleazar kɛra Israɛl sarakalasebagaw kuntigi ye Aron nɔ na.
Nɔnburuw 20:1-13, 22-29; Dutɛrɔnɔmɛ 29:5.
