Maana 47nan

Nsonkɛ dɔ bɛ Israɛl

E K’A lajɛ cɛ bɛ ka fɛn minnu don dugu jukɔrɔ, a ka finiso kɔnɔ. A bɛ ka duloki cɛɲi ni sanu ni warijɛ de dogo. A ye o fɛnw ta Jeriko dugu kɔnɔ. Nka, mun tun ka kan ka kɛ ni Jeriko kɔnɔfɛnw ye? I hakili bɛ o la wa?

Jeriko dugu kɔnɔfɛnw bɛɛ tun ka kan ka halaki, nka sanu ni warijɛ tun ka kan ka bila Jehova ka finiso nafolo marayɔrɔ la. Nin mɔgɔw ma Ala kan minɛ. U ye Jehova ka fɛnw sonya. Cɛ tɔgɔ ko Akan. Ale ni a ka denbaya de bɛ ɲɔgɔn fɛ ja kan. A ko kɛra cogo min na, an k’o lajɛ ɲɔgɔn fɛ.

Akan ka sonyali kɔfɛ, Josue ye cɛ dɔw bila ka taa dugu dɔ kɛlɛ min tɔgɔ ye ko Ayi. Nka, Ayi dugu kɔnɔmɔgɔw sera u la. Israɛlkaw dɔw fagara, tɔw bolila. Josue dusu kasira kosɛbɛ. A y’i bin dugu ma, ka a ɲɛ biri duguma, ka Jehova deli. A ko: ‘Mun na i y’a to nin ko ka an sɔrɔ?

Jehova y’a jaabi ko: ‘I wuli. Israɛl ye jurumu kɛ. Fɛn minnu tun ka kan ka halaki, ani fɛn minnu tun ka kan ka bila nafolo marayɔrɔ la, Jehova ka finiso kɔnɔ, u ye o fɛn dɔw ta. U ye duloki cɛɲi dɔ sonyɛ, k’o dogo. Ne  tɛna aw dɛmɛ fo n’i ye o fɛnw halaki. Mɔgɔ min ye o fɛnw ta, k’o tigi fana halaki.’ Mɔgɔjugu min ye o kɛ, Jehova ko ale bɛna o jira Josue la.

O kosɔn, Josue ye jama bɛɛ fara ɲɔgɔn kan. Jehova ye mɔgɔjugu min jira jama cɛma, o kɛra Akan ye. Akan ko: ‘Ne ye jurumu kɛ. Ne ye duloki cɛɲi ni sanu ani warijɛ ye, ne ɲɛbɔra o fɛnw fɛ, fo ne ye u ta. Aw bɛna u sɔrɔ dugu jukɔrɔ, ne ka finiso kɔnɔ.

O fɛnw tara ka na u bila Josue ɲɛkɔrɔ tuma min na, Josue ko Akan ma: ‘Mun na i ye bɔnɛ lase anw ma? Jehova bɛna bɔnɛ lase e yɛrɛ fana ma.’ O la sa, jama bɛɛ wulila Akan ni a ka denbaya kama, k’u bon ni kabakurunw ye, k’u faga. Nin ko bɛ mun jira an na? A b’a jira an na ko an man kan abada ka fɛnw ta minnu tɛ an ta ye.

O kɔfɛ sa, Israɛl taara Ayi dugu kɛlɛ kokura. Jehova y’a ka jamakulu dɛmɛ. Israɛl sera Ayi dugu mɔgɔw la.

Josue 7:​1-26; 8:​1-29.