Maana 49nan

Tile tora a nɔ na

E KA Josue lajɛ. A bɛ k’a fɔ ko: ‘Tile, to i nɔ na!’ Tile tora sankolo cɛmancɛ la o don bɛɛ la. Jehova de ye o ko kɛ. Nka, mun na Josue tun b’a fɛ tile ka to a nɔ na? An ka o lajɛ ɲɔgɔn fɛ.

Kanan jamana masakɛjugu duuru wulila tuma min na  ka Gabaonkaw kɛlɛ, Gabaonkaw ye cɛ dɔ ci Josue ma walisa a ka na ka u dɛmɛ. A ko: ‘I teliya ka na an dɛmɛ, ka an bɔ bolo la. Masakɛ minnu sigilen bɛ kuluw kan, olu bɛɛ nana i ka jɔnw kɛlɛ.’

Josue ni a ka sɔrɔdasiw bɛɛ wulila o yɔrɔnin bɛɛ la ka taa. U ye su bɛɛ kɛ taama na. U sera tuma min na Gabaon, masakɛ duuru ka sɔrɔdasiw siranna. U ye boli daminɛ. Jehova y’a kɛ sanbɛlɛ kunbabaw bɔra sanfɛ ka bin o sɔrɔdasiw kan. Sanbɛlɛ ye mɔgɔ minnu faga, olu cayara ka tɛmɛ Josue ni a ka sɔrɔdasiw ka mɔgɔfagalenw kan.

Josue y’a ye ko tile bɛna bin sɔɔnin. Su bɛna ko, masakɛjugu duuru ka sɔrɔdasi caman bɛna boli. O la sa, Josue ye Jehova deli ko: ‘Tile, to i nɔ na!’ Tile tora a nɔ na minkɛ, Israɛlkaw ye kɛlɛ kɛ ani u sera u juguw la.

Masakɛjugu caman wɛrɛ tun bɛ Kanan jamana na, minnu bɛ Ala ka jamakulu koniya. Josue ni a ka sɔrɔdasiw ye san wɔɔrɔ ɲɔgɔn de kɛ masakɛ 31 kɛlɛli la, ka se u la. O ko kɛra ka ban tuma min na, Israɛl ka kabila minnu tun ma dugukolo sɔrɔ fɔlɔ, Josue ye Kanan jamana tɔ tila o kabilaw ni ɲɔgɔn cɛ.

San caman tɛmɛna, Josue sara k’a si to san 110 na. Ka Josue ni a teriw to balo la, Israɛlkaw ye Jehova ka kumakan mɛn. Nka, o mɔgɔ ɲumanw bɛɛ salen kɔfɛ, jamakulu ye kojugukɛ daminɛ, ka bɔnɛ lase u yɛrɛ ma. U mago tun bɛ Ala ka dɛmɛ la kosɛbɛ o waatiw la.

Josue 10:​6-15; 12:​7-24; 14:​1-5; Kiritigɛlaw 2:​8-13.