YƆRƆ 7NAN

Yesu lakununni fo ka na se paul ka kasoladon ma

Yesu sara don min na, tile saba o kɔfɛ, a lakununna. O don yɛrɛ la, a y’a yɛrɛ jira siɲɛ duuru a ka kalandenw na. Tile 40 kɔnɔ, Yesu tora k’a yɛrɛ jira u la. A ka kalanden dɔw tun bɛ k’a lajɛ tuma min na, Yesu yɛlɛnna ka taa sankolo la. Tile tan o kɔfɛ, tuma min na Yesu nɔfɛmɔgɔw tun bɛ makɔnɔni na Jerusalɛm, Ala ye hakili senu jigin u kan.

O kɔfɛ, Ala juguw ye cidenw fili kaso la, nka mɛlɛkɛ dɔ ye u labɔ. U ye kalanden Etiɛni fana bon ni kabakurunw ye k’a faga. An bɛna a ye ko mɔgɔ minnu ye Yesu kɛlɛ, Yesu ye olu dɔ la kelen ta k’a kɛ a ka baarakɛla kɛrɛnkɛrɛnnen ye. O ye ciden Paul ye. An bɛna a ye fana ko san saba ni tila Yesu salen kɔfɛ, Ala ye ciden Piɛrɛ ci ka taa mɔgɔw waaju minnu tɛ Yahutuw ye. O mɔgɔw tun ye Kɔrnɛye ni a ka dukɔnɔmɔgɔw ye.

San 13 ɲɔgɔn o kɔfɛ, Ciden Paul ye a ka taama fɔlɔ daminɛ waajuli kama. A ka taama filanan kɔnɔna na, Timote farala Paul kan. Paul ni a taamaɲɔgɔnw ye dakabana waati kɛ ɲɔgɔn fɛ cogo min na u ka baara la Ala ye, an bɛna o ye. A laban na, Paul bilala kaso la Romɛ. San fila o kɔfɛ, a bɔra kaso la. Nka, o kɔfɛ u tilala k’a bila kaso la kokura, k’a faga o la. Ko minnu kɛra san 32 ɲɔgɔn kɔnɔ, YƆRƆ 7NAN bɛ kuma o kow de kan.