Maana 107nan

Etiɛni bonna ka faga

CƐ MIN ɲɔngirilen bɛ yan, o ye Etiɛni ye. Yesu ka kalanden kantigi dɔ don. Nka e k’a filɛ u bɛ ka min kɛ a la sisan. Nin cɛw bɛ ka a bon ni kabakurunbaw ye. Mun na u bɛ Etiɛni koniya fo ka nin kojugu sugu kɛ a la? An ka o lajɛ ɲɔgɔn fɛ.

Ala ye Etiɛni dɛmɛ a ka dakabanakow kɛ, nka o ma diya nin cɛw ye. O kosɔn, u y’a daminɛ k’a sɔsɔ a ka kalan ko la. Nka, Ala ye hakilitigiyaba di Etiɛni ma. Etiɛni y’a jira u la ko u bɛ min kalan mɔgɔw ye, o tɛ tiɲɛ ye. O kumaw ye cɛw dusu bɔ ka taa a fɛ. O kosɔn, u ye Etiɛni minɛ, ka mɔgɔ dɔw wele u ka na ka nkalon da a la.

Sarakalasebagaw kuntigi ye Etiɛni ɲininka ko: ‘U bɛ ka kuma minnu fɔ, o ye tiɲɛ ye wa?’ Etiɛni y’a jaabi ni ɲɛfɔli ɲɛnama dɔ ye min bɔra Bibulu kɔnɔ. A laban na, Etiɛni y’a jira ko kabini fɔlɔfɔlɔ, mɔgɔjuguw ye Jehova ka kiraw koniya. A tilala k’a fɔ ko: ‘Aw bɛ tigitigi i ko o mɔgɔw. Aw ye Ala ka baaraden Yesu faga. Aw ma tugu Ala ka sariyaw kɔ.’

O kuma ye diinɛ ɲɛmɔgɔw dusu bɔ kosɛbɛ fo u ye u ɲinw ɲimi Etiɛni kama. Nka Etiɛni ye a kun kɔrɔta sanfɛ, k’a fɔ ko: ‘A filɛ, ne ɲɛ bɛ Yesu jɔlen na Ala kininbolo fɛ sankolo la.’ O yɔrɔnin bɛɛ la, o cɛw ye u tɛgɛw kɛ k’u tulow datugu, ka girin Etiɛni kan, k’a sama ka taa n’a ye dugu kɔfɛ.

O yɔrɔ la yen, u ye u ka forokiyaw bɔ u kan na, ka olu di kamalennin dɔ ma, min tɔgɔ ye ko Saul, walisa a ka u kɔlɔsi. I ɲɛ bɛ Saul la wa? O la sa, cɛ dɔw ye Etiɛni bonni daminɛ ni kabakurunw ye. Etiɛni ye a ɲɔngiri i ko i ɲɛ b’a la cogo min na, ka Ala deli ko: ‘Jehova, i kana u ɲangi nin kojugu ko la.’ Ni i y’a ye Etiɛni ye o fɔ, a tun b’a dɔn ko o cɛ dɔw tun lafilila diinɛ ɲɛmɔgɔw fɛ. Etiɛni ye o fɔ kaban tuma min na, a sara.

Ni mɔgɔ dɔ ye kojugu kɛ i la, yala i b’a ɲini ka i ta juru sara a tigi la wa? Yala i b’a ɲini Ala fɛ a ka kojugu kɛ o tigi la wa? Etiɛni ma o si kɛ, Yesu fana ma o kɛ. U tun ka ɲi hali mɔgɔw ma minnu tun ye juguya kɛ u la. An k’a ɲini ka Etiɛni ni Yesu ladege.

Kɛwalew 6:​8-15; 7:​1-60.