Maana 112nan

Kurunba tora ji la

E K’A lajɛ fɛn min ye kurunba sɔrɔ! A yɔrɔ caman kari-karila. Mɔgɔ minnu ye u cun ji la, i ɲɛ bɛ olu la wa? Dɔw ye jida sɔrɔ kaban. Yala Paul de bɛ yan yɔrɔ la wa? An bɛna a don fɛn min y’a sɔrɔ.

I kana ɲinɛ ko Paul tora kaso la san fila Sesare. Kɔfɛ, ale ni kasoden dɔw bilala kurunba kɔnɔ ka taa Romɛ. U tɛmɛna Krete gun kɛrɛfɛ tuma min na, sanfiɲɛba dɔ cira. Fiɲɛ barika bonyara fo kurunba ye kurunbolilaw kɛɲɛ. U ye kurunba to fiɲɛ bolo. Ikomi don caman kɔnɔ, u ma tile ni dolo si fana ye, kurunba kɔnɔmɔgɔw jigi tun t’a la tuguni ko u bɛna kisi.

 O la sa, Paul y’i jɔ k’a fɔ ko: ‘Aw ka aw ja gɛlɛya, katuguni aw si tɛna tunun, fɔ kurunba dɔrɔn, bawo surɔ, Ala ka mɛlɛkɛ dɔ nana a fɔ ne ye ko: “I kana siran Paul. I ka kan ka jɔ Romɛ kuntigiba, Sesar ɲɛkɔrɔ. Mɔgɔ minnu bɛ i fɛ kurunba kɔnɔ, Ala bɛna olu bɛɛ fana kisi.’’’

A tile 14 nan de ye nin ye ko fiɲɛba daminɛna. Miniwi surunyara tuma min na, kurunbolilaw y’a ye ko dɔ tun bɛ ka bɔ ji dunya la ka t’a fɛ. Ikomi u siranna kurunba kana na taa tuu kabakurun dɔw la dibi la, u ye nɛgɛkurunw fili ji la minnu bɛ kurunba minɛ a ka to yɔrɔ kelen na. O dugujɛ sɔgɔma, u ye ji dogodogo dɔ ye. U y’a latigɛ ka kurunba ɲɛsin o yɔrɔ la.

Nka u bɛ ɲini ka surunya jida la tuma min na, kurunba coronna cɛncɛn na. Jikuruw ye kurunba gosi fo k’a yɔrɔw kari ka bɔ ɲɔgɔn na. Sɔrɔdasi kuntigi min tun bɛ kow kunna, o ko: ‘Aw fɛn o fɛn bɛ se ji la, aw fɔlɔ ka aw cun ji la ka jida sɔrɔ. Tɔw ka cun olu kɔfɛ, ka u yɛrɛ dɛmɛ ni kurunba jiri karilenw ye walisa ka jida sɔrɔ.’ U ye o de kɛ. O cogo la, mɔgɔ 276 minnu tun bɛ kurunba kɔnɔ, olu bɛɛ sera hɛrɛ la jida la, i ko mɛlɛkɛ tun y’a fɔ cogo min na.

O gun tɔgɔ ko Malte. Mɔgɔ minnu bɛ o gun kan, olu tun ka ɲi kosɛbɛ. U ye kurunba kɔnɔmɔgɔw ladon koɲuman. Waati cogoya ɲɛna tuma min na, Paul bilala kurunba wɛrɛ kɔnɔ ka taa Romɛ.

Kɛwalew 27:​1-44; 28:​1-14.