Maana 109nan

Piɛrɛ nana Kɔrnɛye fɛ

CIDEN Piɛrɛ de jɔlen filɛ yan yɔrɔ la. Mɔgɔ minnu bɛ a kɔfɛ, olu ye a teri dɔw ye. Nka, mun na nin cɛ y’i bin Piɛrɛ sen kɔrɔ? Yala a ka kan ka o kɛ wa? I bɛ o cɛ dɔn wa?

O cɛ tɔgɔ ko Kɔrnɛye. Ale ye Romɛkaw ka sɔrɔdasi kuntigi dɔ ye. Kɔrnɛye tɛ Piɛrɛ dɔn, nka a fɔra a ye ko a ka Piɛrɛ wele ka na a ka so. O kɛra cogo min na, an ka o lajɛ ɲɔgɔn fɛ.

Mɔgɔ fɔlɔ minnu tugura Yesu kɔ, olu tun ye Yahutuw ye, nka Kɔrnɛye tɛ Yahutu ye. O bɛɛ n’a ta, Kɔrnɛye bɛ Ala kanu, a bɛ Ala deli, ani a bɛ fɛn caman kɛ mɔgɔw ye. Don dɔ wuladafɛ, mɛlɛkɛ dɔ y’i  jira a la k’a fɔ a ye ko: ‘I ko diyara Ala ye. A bɛna i ka deliliw jaabi. Mɔgɔ dɔw ci ka taa cɛ nɔfɛ min tɔgɔ ye ko Piɛrɛ. A bɛ Jope dugu kɔnɔ, Simɔn ka so, min sigilen bɛ kɔgɔji da la.’

O yɔrɔnin bɛɛ la, Kɔrnɛye ye cɛ dɔw ci ka taa Piɛrɛ nɔfɛ. O dugujɛ, tuma min na o cɛw tun bɛ ka surunya Jope la, Piɛrɛ tun bɛ Simɔn ka so sanfɛ. O yɔrɔ la, Ala y’a kɛ Piɛrɛ ka finiba dɔ ye min bɛ ka jigin ka bɔ sankolo la. Dantanfɛn sugu bɛɛ tun bɛ o fini kɔnɔ. Ka kɛɲɛ ni Ala ka sariya ye, o dantanfɛnw tun saniyalen tɛ, u tun man kan ka dun. Nka kumakan dɔ ko: ‘Wuli, Piɛrɛ. U faga k’u dun.’

Piɛrɛ y’a jaabi ko: ‘Ayi!’ ‘Ne ma deli ka fɛn dun min saniyalen tɛ.’ Nka kumakan y’a fɔ Piɛrɛ ye ko: ‘Ala y’a fɔ sisan ko fɛn minnu saniyalen bɛ, e kana a fɔ o fɛnw ma k’olu saniyalen tɛ.’ O ko kɛra fo siɲɛ saba. Piɛrɛ bɛ ka miiri o kow bɛɛ kɔrɔ la tuma min na, Kɔrnɛye ye cɛ minnu ci, olu sera Simɔn ka so, ka Piɛrɛ ko ɲininka.

Piɛrɛ jiginna ka bɔ so sanfɛ. A ko: ‘Aw bɛ ka cɛ min ɲini, ne don. Aw nana mun na?’ Cɛw y’a fɔ tuma min na ko mɛlɛkɛ dɔ de y’a fɔ Kɔrnɛye ye k’a ka Piɛrɛ wele ka na a ka so, Piɛrɛ sɔnna ka taa u fɛ. O dugujɛ, Piɛrɛ ni a teri dɔw taara bɔ Kɔrnɛye ye Sesare.

Kɔrnɛye ye a somɔgɔw ni a teri sɛbɛw bɛɛ lajɛ a ka so. Piɛrɛ sera yen tuma min na, Kɔrnɛye nana a kunbɛn. A binna Piɛrɛ senkɔrɔ, k’a bato, i ko i ɲɛ b’a la cogo min na ja kan. Nka Piɛrɛ ko: ‘Wuli, ne fana ye mɔgɔ gansan de ye.’ Ɔwɔ, Bibulu b’a jira ko a bɛnnen tɛ ka bin mɔgɔ senkɔrɔ, k’a bato. An ka kan ka Jehova kelenpe de bato.

Mɔgɔ minnu tun lajɛlen bɛ yen, Piɛrɛ bɛ ka olu waaju sisan. A ko: ‘Ne y’a ye ko mɔgɔ minnu b’a fɛ ka baara kɛ Ala ye, Ala bɛ sɔn olu bɛɛ la.’ Piɛrɛ bɛ ka o kuma fɔ tuma min na, Ala ye a ka hakili senu jigin o mɔgɔw bɛɛ kan. U y’a daminɛ ka kuma kan caman na. Yahutu kalanden minnu ni Piɛrɛ tun nana ɲɔgɔn fɛ, olu kabakoyara kosɛbɛ, bawo u hakili la, Ala sɔnna Yahutuw dɔrɔn de la. O ko ye u kalan ko Ala bolo, siya dɔ mɔgɔw man fisa ni siya dɔ wɛrɛ mɔgɔw ye. Yala nin tɛ fɛn ɲuman ye an bɛɛ ka kan ka min to an hakili la wa?

Kɛwalew 10:​1-48; 11:​1-18; Jirali 19:⁠10.