Rebɛka tun ye muso ye, min tun bɛ Jehova fɛ. A cɛ tɔgɔ tun ye Isaka. Jehova ko tun ka di o fana ye. Rebɛka ni Isaka ye ɲɔgɔn dɔn cogo di? A ye a jira cogo di k’a tun b’a fɛ ka Jehova nisɔndiya? An k’a ɲini ka Rebɛka dɔn ka ɲɛ.

Isaka bangebagaw tun ye Ibrahima ani Saran ye. U tun sigilen bɛ Kanan jamana na, o yɔrɔ mɔgɔw tun tɛ Jehova bato. O n’a ta bɛɛ Ibrahima tun b’a fɛ a denkɛ ka furu muso ma, min tun bɛ Jehova bato. O la a ye a ka jɔnkɛ ci, o min tun bɛ sɔrɔ Eliezɛr ye, a ka taa muso ɲini Isaka ye dugu la min tɔgɔ tun ye Karan ye, ni Ibrahima somɔgɔ dɔw tun bɛ sɔrɔ yen.

Eliezɛr taara o jamana na ni Ibrahima ka jɔnkɛ wɛrɛw ye. O tun ye taama jan ye. U taara ni ɲaamɛ tan ye ani dumuni ni nilifɛnw ye. Muso min tun ka kan ka ta Isaka ye, Eliezɛr tun bɛna o dɔn cogo di? Eliezɛr ni jɔnkɛ tow sera Karan jamana na tuma min na, u ye u jɔ kɔlɔn da dɔ la, k’a masɔrɔ Eliezɛr tun b’a dɔn ko sɔɔni mɔgɔw bɛna ji ta. A ye Jehova deli ko: ‘Ni ne y’a ɲini npogotigi min fɛ k’o ka ji di ne ma, ni o ye ji di ne ani ne ka ɲaamɛw ma, ne bɛna a dɔn ko o de ye muso ye i ye min sugandi.’

O yɔrɔnin bɛɛ npogotigi Rebɛka nana kɔlɔn da la. Bibulu b’a fɔ k’a tun cɛ ka ɲi kosɛbɛ. Eliezɛr ye ji minta ɲini a fɛ, a y’a jaabi ko: ‘Baasi tɛ o la. Ne bɛna ji di i ma ani ka tila ka ji dɔ bɔ i ka ɲaamɛw fana  ye.’ E k’i miiri! Ɲaamɛ minnɔgɔbatɔw tan bɛ ji caman min, o la Rebɛka bolibato ye taa ka segin caman kɛ kɔlɔn da la. Yala i y’a jateminɛ ja kan, Rebɛka bɛ ka baara gɛlɛn kɛ cogo min na wa?— Jehova ye Eliezɛr ka delili jaabi cogo min na o y’a dabali ban.

Eliezɛr ye nilifɛn cɛɲuman caman di Rebɛka ma. Rebɛka ye Eliezɛr ni jɔnkɛ tow wele u ka taa u fɛ yen. Eliezɛr y’a ɲɛfɔ Rebɛka somɔgɔw ye kun min na Ibrahima y’a ci ani Jehova ye a ka delili jaabi cogo min na. A diyara Rebɛka somɔgɔw ye ka a di furu la Isaka ma.

Nka e ka miiri la Rebɛka tun b’a fɛ ka furu Isaka ma wa?— Rebɛka tun b’a dɔn ko Jehova de ye Eliezɛr ci. O la tuma min na Rebɛka somɔgɔw y’a ɲininka ni a b’a fɛ ka taa Kanan jamana na ani ka furu Isaka ma, a y’a fɔ ko: ‘ Ɔwɔ, ne bɛ taa.’ O yɔrɔnin bɛɛ a wulila ka taa ni Eliezɛr ye. Tuma min na u sera Kanan jamana na, a furu la Isaka ma.

Jehova dubara Rebɛka ye k’a masɔrɔ Jehova tun b’a fɛ a ka min kɛ, a ye o kɛ. San caman o kɔ, Yesu bangera a ka denbaya kɔnɔ! Ni i bɛ i ko Rebɛka ani ka Jehova nisɔndiya, a bɛna duba i fana ye.