I bɛ se ka Jehowa dɔn n’i bɛ Bibulu kalan. Ala ye hadamaden dɔw sugandi a tuma mɛnna kosɛbɛ walasa u k’a ka miiriyaw sɛbɛn. O sɛbɛnniw bɛ wele ko Bibulu. Bi bi in na, an bɛ se ka Ala dɔn n’an bɛ Bibulu kalan. Ikomi Ala ka kuma, walima a ka cikan bɛ sɔrɔ Bibulu kɔnɔ, Bibulu bɛ wele fana ko Ala ka Kuma. Bibulu bɛ min fɔ, an bɛ se ka da o la bawo Jehowa tɛ nkalon tigɛ abada. “Ala tɛ se ka nkalon tigɛ.” (Heburuw 6:18) Tiɲɛ bɛ sɔrɔ Ala ka Kuma kɔnɔ.—Yuhana 17:17.

Ala ye nilifɛn ɲumanba minnu kɛ an ye, olu dɔ la kelen ye Bibulu ye. A bɛ iko fa ɲuman dɔ ka bataki cilen a denw ma. Bibulu b’a fɔ an ye ko Ala ye layidu ta k’a bɛna dugukolo yɛlɛma k’a kɛ dakabana sigiyɔrɔ ye, alijinɛ kɔni. Ala ye min kɛ ka kɔrɔ, a bɛ ka min kɛ sisan, an’a bɛna min kɛ don nataw la a den kantigiw ye, a b’o fɔ an ye. A b’an dɛmɛ fana k’an kunkow ɲɛnabɔ walasa an ka hɛrɛ sɔrɔ.—2 Timote 3:16, 17.

 Jehowa Seerew ye Ala teriw ye. Bibulu b’an kalan min na, u bɛna i dɛmɛ k’o faamuya. I dan ye k’a fɔ u ye k’i b’a fɛ ka Bibulu kalan. U tɛna wari minɛ o la. (Matiyu 10:8) Ka fara o kan, i bɛ se ka taa Krecɛn lajɛw la. O lajɛw bɛ kɛ u ka batokɛyɔrɔw la minnu bɛ wele ko Masaya Sow. N’i bɛ taa o lajɛw la, i ka Ala dɔnniya bɛna bonya joona.

I bɛ se ka Ala dɔn a ka fɛn dalenw fɛ. Misali la, Bibulu b’a fɔ ko: “Ala ye sankolow ni dugukolo da.” (Jenɛse 1:1) Tuma min na Jehowa ye “sankolow” da, a ye tile da. O bɛ mun jira an na Ala ko la? O b’a jira an na ko Jehowa ka sebagaya ka bon kosɛbɛ. Ale kelenpe de bɛ se ka fɛn da min barika ka bon i n’a fɔ tile. Ikomi tile bɛ funteni ni yeelen di, yeelen min tɛ ban abada, a dali ye hakilitigiya de wajibiya. O b’a jira an na fana ko Jehowa ye hakilitigi ye.

Jehowa ka fɛn dalenw b’a jira an na k’a b’an kanu. I ka miiri jiriden sifa caman na minnu bɛ sɔrɔ dugukolo kan. Jehowa tun bɛ se ka jiriden sifa kelen dɔrɔn di an ma, walima a bɛ se ka kɛ k’a tun tɛ fosi yɛrɛ di. Nka, Jehowa ye jiriden sifa caman di an ma minnu cogow, n’u bonyaw, n’u ɲɛw, an’u timinyaw tɛ kelen ye. O b’a jira ko Jehowa tɛ kanuya Ala dɔrɔn ye, nka fonisire Ala fana don, a ka ɲi, wa, ŋaniya ɲuman tigi don fana.—Zaburu 104:24.