Ka teriya don e ni mɔgɔ dɔ cɛ, o tɛ ta timinandiya kɔ. Ka to teriya la mɔgɔ dɔ fɛ, o tɛ ɲɛ timinandiya fana kɔ. I bɛ cɛsiri minnu kɛ walasa ka kɛ Ala teri ye, ani ka to a ka teriya la, olu bɛna duba caman lase i ma. Yesu y’a fɔ mɔgɔw ye minnu dara a la, ko: “Tiɲɛ na aw hɔrɔnya.” (Yuhana 8:32) O kɔrɔ ye mun ye?

I bɛ se ka hɔrɔnya kabini sisan. Sitanɛ ye nkalonw ni kalansira fu minnu jɛnsɛn, i bɛ se ka hɔrɔnya ka bɔ olu la. I bɛ se k’i tanga jigintanya ma, jigintanya min bɛ mɔgɔ miliyɔn caman na minnu tɛ Jehowa dɔn. (Romɛkaw 8:22) Ala teriw hɔrɔnyalen don ka bɔ “saya ɲɛsiran” yɛrɛ la.—Heburuw 2:14, 15.

I bɛ se ka hɔrɔnya diyabɔ Ala ka diɲɛ kura kɔnɔ. I bɛ se ka hɔrɔnyaba dɔn don nataw la. Mɔgɔw bɛna kisi ka bɔ kɛlɛw ni banaw ni kojuguw la Alijinɛ kɔnɔ, dugukolo kan yan. U bɛna hɔrɔnya ka bɔ faantanya ni kɔngɔ la. U bɛna hɔrɔnya ka bɔ kɔrɔya ni saya la. U bɛna hɔrɔnya ka bɔ siran ni degunkow ni tilenbaliyakow la. Bibulu b’a fɔ Ala ko la ko: “I bɛ i tɛgɛ dayɛlɛ ka fɛn ɲɛnamaw bɛɛ wasa u sago la fɛnw na.”—Zaburu 145:16.

 Ala teriw bɛna ɲɛnamaya kɛ fo abada. Ɲɛnamaya banbali ye nilifɛn ye min sɔngɔ ka bon kosɛbɛ. Ala bɛna o di mɔgɔw bɛɛ ma minnu y’a ka teriya ɲini. (Romɛkaw 6:23) Dan tɛ ɲɛnamaya min na, o kɔrɔ bɛ se ka kɛ min ye i bolo, i ka miiri o la bani!

I bɛna waati sɔrɔ ka fɛn caman kɛ. Laala a bɛna diya i ye ka fɔlifɛn dɔ dege, walima ka jaw ɲɛgɛn fɛn dɔw kan, walima ka jiribaara dege. A dɔ rɔ, a bɛna diya i ye ka fɛnw kalan dantanfɛnw walima falenfɛnw kan. Walima a bɛ se ka kɛ fana k’i b’a fɛ ka taama walasa ka yɔrɔ caman ye, walima ka yɔrɔ wɛrɛw mɔgɔw dɔn. N’i ye ɲɛnamaya banbali sɔrɔ, o bɛn’a to o fɛnw bɛɛ ka se ka kɛ.

I bɛna waati sɔrɔ ka teriya don e ni mɔgɔ caman cɛ. Ka ɲɛnamaya kɛ kudayi, o bɛn’a to i ka Ala teri caman wɛrɛw dɔn. I bɛna u dɔnkow n’u jogo ɲumanw dɔn. Olu fana bɛna kɛ i teriw ye. I bɛna kɛ u fɛ, olu fana bɛna kɛ i fɛ. (1 Kɔrɛntekaw 13:8) Ka ɲɛnamaya banbali sɔrɔ, o bɛna waati di i ma ka kɛ mɔgɔ kelen-kelen bɛɛ teri ye dugukolo kan. Fɛn min ka fisa n’o bɛɛ ye, o ye ko sanw kɔnɔna na, e ni Jehowa ka teriya bɛna sinsin ka t’a fɛ. O la sa, Ala ma a tora i ka kɛ a teri ye fo abada.