Sitanɛ ni jinɛw t’a fɛ i ka baara kɛ Ala ye. N’a se b’u ye, u b’a fɛ ka mɔgɔ bɛɛ de lamuruti Ala ma. U b’a ɲini k’o kɛ cogo di? A cogo dɔ ye nkalon diinɛ ye. (2 Kɔrɛntekaw 11:13-15) Diinɛ ye nkalon ye n’a tɛ mɔgɔw kalan tiɲɛ na, tiɲɛ min bɛ bɔ Bibulu kɔnɔ. Nkalon diinɛ bɛ iko wari yuruguyurugu dilannen. A bɛ iko fɛn lakika dɔ, nka nafa si t’a la. A bɛ se ka kunko camanba yɛrɛ lase i ma.

Ni nkalon bɛ diinɛ na, o tɛ se ka diya Jehowa, tiɲɛtigi Ala ye abada. Tuma min na Yesu tun bɛ dugukolo kan, diinɛ jɛkulu dɔ tun bɛ yen min tun b’a fɛ k’a faga. O jɛkulu mɔgɔw ka miiri la, u ka batocogo tun tilennen bɛ. U y’a fɔ ko: “Fa kelenpe de b’an fɛ, Ala don.” Nka, yali Yesu sɔnna o ma wa? Ayi. A y’a fɔ u ye ko: “Aw fa ye min ye Sitanɛ don.” (Yuhana 8:41, 44) Bi fana, mɔgɔ caman miiri la u bɛ ka Ala bato, nka tiɲɛ yɛrɛ la, u bɛ ka Sitanɛ n’a ka jinɛw de bato.—1 Kɔrɛntekaw 10:20.

 Iko jiri jugu bɛ den juguw di cogo min na, o cogo kelen na fana, nkalon diinɛ bɛ wolo mɔgɔ juguw la. Diɲɛ falen don tɔɔrɔw la bawo mɔgɔw bɛ ko juguw kɛ. Degunw bɛ mɔgɔw kan. Cɛw bɛ bin musow kan. Kakalaya, kɛlɛ, ni sonyɛni fana bɛ yen. Mɔgɔ minnu bɛ o ko juguw kɛ, u caman bɛ diinɛ dɔ la, nka u ka diinɛ m’u bila ka ko ɲuman kɛ. U tɛ se ka kɛ Ala teriw ye fo n’u ye ko juguw dabila.—Matiyu 7:17, 18.

Nkalon diinɛ bɛ mɔgɔw bila ka boliw deli. Ala ko an kana boliw deli. O ye hakilitigiyako ye. Ni mɔgɔ dɔ tɛ kuma i fɛ abada, nka a bɛ kuma i ka foto dɔrɔn fɛ, yali o bɛna diya i ye wa? Yali o tigi bɛna se ka kɛ i teri sɛbɛ ye wa? Cogo si la. Jehowa b’a fɛ mɔgɔw ka kuma ale de fɛ. A t’a fɛ mɔgɔ ka kuma ja dɛsɛlen, walima ja dɔ fɛ ɲɛnamaya tɛ min na.—Ekisode 20:4, 5.

Nkalon diinɛ bɛ mɔgɔw kalan k’a dagalen don ka mɔgɔ wɛrɛw faga kɛlɛtuma na. Yesu y’a fɔ ko kanuya bɛna kɛ Ala teriw ni ɲɔgɔn cɛ. An bɛ mɔgɔ minnu kanu, an t’u faga. (Yuhana 13:35) Hali mɔgɔ minnu man ɲi, k’olu faga o ye ko jugu ye an bolo. Tuma min na Yesu juguw nana a minɛ, a m’a to a ka kalandenw ka kɛlɛ kɛ walasa k’a lafasa.—Matiyu 26:51, 52.

Nkalon diinɛ bɛ mɔgɔw kalan ko mɔgɔ juguw bɛna tɔɔrɔ jahanama tasuma na. Bibulu bɛ mɔgɔw kalan ko jurumu de bɛ na ni saya ye. (Romɛkaw 6:23) Jehowa ye kanu Ala de ye. Kanuya bɛ Ala min na, yali o bɛna mɔgɔw tɔɔrɔ fo abada wa? Ayi dɛ. Diinɛ kelenpe dɔrɔn de bɛna kɛ alijinɛ kɔnɔ. O ye diinɛ ye Jehowa yɛrɛ bɛ sɔn min ma. Sitanɛ ka nkalonw ye diinɛ o diinɛ sababu ye, o diinɛ bɛna bɔ yen.