Ala jugu fɔlɔ ye Sitanɛ Sendonbaga ye. A ye danfɛn hakilima yebali ye min murutira Jehowa ma. Hali bi Sitanɛ bɛ ka Ala kɛlɛ. A kɛra hadamadenw ka tɔɔrɔbaw sababu fana ye. Sitanɛ ka jugu. Nkalontigɛla ni mɔgɔfagala don.—Yuhana 8:44.

Danfɛn hakilima yebali wɛrɛw farala Sitanɛ kan walasa ka muruti Ala ma. Bibulu bɛ o danfɛnw wele ko jinɛw. Sitanɛ ye hadamadenw jugu ye cogo min na, jinɛw fana ye u juguw ye ten. A ka di u ye ka kojugu kɛ mɔgɔw la. (Matiyu 9:32, 33; 12:22) Jehowa bɛna Sitanɛ ni jinɛw halaki fo abada. Waati min tora u bolo ka hadamadenw tɔɔrɔ, o tɔ man jan tun.—Jirali 12:12.

N’i b’a fɛ ka kɛ Ala teri ye, Sitanɛ b’a fɛ i ka min kɛ, i man kan k’o kɛ. Sitanɛ ni jinɛw bɛ Ala koniya. U ye Ala juguw ye, wa, u b’a fɛ k’i kɛ Ala jugu fana ye. I b’a fɛ k’i kodiya min ye, i ka kan k’o sugandi: Sitanɛ wa, walima Jehowa? N’i bɛ ɲɛnamaya banbali fɛ, i ka kan k’a sugandi ka Ala sago kɛ. Fɛɛrɛ caman bɛ Sitanɛ kɔnɔ walasa ka mɔgɔw lafili. A bɛ ka mɔgɔw fanba nɛgɛn.—Jirali 12:9.