Jehowa tɛn’a to mɔgɔ juguw ka Alijinɛ tiɲɛ. A teriw dɔrɔn de bɛna sigi a kɔnɔ. Mun bɛna mɔgɔ juguw sɔrɔ? Walasa k’o jaabi dɔn, an ka Nuhun ka maana lakika lajɛ. Nuhun tun ye fɔlɔ mɔgɔ dɔ de ye. Mɔgɔ ɲuman tun don. A y’a ɲini tuma bɛɛ ka Jehowa sago kɛ. Nka, dugukolo kan mɔgɔ tɔw tun bɛ ko juguw kɛ. O la sa, Jehowa y’a fɔ Nuhun ye k’a bɛna sanjiba lana walasa k’o mɔgɔ jugu bɛɛ halaki. A y’a fɔ Nuhun ye k’a ka kurunba dɔ dilan walasa ale n’a ka denbaya kana sa sanjiba natuma na.—Jenɛse 6:9-18.

Nuhun n’a ka denbaya ye kurunba dilan. Nuhun tun ye mɔgɔw lasɔmi ko sanjiba bɛna na, nka u m’a ka kuma lamɛn. U ye ko juguw kɛ ka t’a fɛ. Kurunba bannen kɔfɛ, Nuhun ye dantanfɛnw ladon kurunba kɔnɔ. Ale n’a ka denbaya fana donna a kɔnɔ. O la sa, Jehowa ye sanjiba lana. San nana tile 40 ni su 40. Ji ye dugukolo yɔrɔ bɛɛ tunun.—Jenɛse 7:7-12.

 Mɔgɔ juguw bɔnɛna u niw na, nka Nuhun n’a ka denbaya kisira. Jehowa y’a kɛ u ka sanjiba latɛmɛ hɛrɛ la. A y’u bila dugukolo saniyalen kan. Kojugu bɛɛ tun bɔra yen. (Jenɛse 7:22, 23) Mɔgɔ minnu b’u ban ka koɲuman kɛ, Jehowa bɛna olu fana halaki. Bibulu b’a fɔ k’o waati setɔ don. Mɔgɔ ɲumanw tɛna halaki. U bɛna balo kudayi Alijinɛ kɔnɔ dugukolo kan.—2 Piɛrɛ 2:5, 6, 9.

Bi bi in na, mɔgɔ caman bɛ ko juguw kɛ. Diɲɛ falen don kɔnɔgankow la. Walasa ka mɔgɔw lasɔmi, Jehowa b’a ka Seerew ci, k’u ci. Nka, mɔgɔ fanba t’a fɛ ka Jehowa ka kumaw lamɛn. U t’a fɛ k’u ka siraw yɛlɛma. Ala ko fɛn min ka ɲi, ani fɛn min man ɲi, u t’a fɛ ka sɔn o ma. Mun bɛna o mɔgɔw sɔrɔ? Yali u bɛna yɛlɛma don dɔ la wa? Caman tɛna yɛlɛma abada. Mɔgɔ juguw halakituma setɔla don. U tɛna segin ɲɛnamaya la tun.—Zaburu 92:8.

Dugukolo tɛna halaki, a bɛna yɛlɛma ka kɛ alijinɛ ye. Mɔgɔ minnu kɛra Ala teriw ye, olu bɛna balo kudayi Alijinɛ kɔnɔ dugukolo kan.—Zaburu 37:29.