Sitanɛ bɛ mɔgɔw su walasa u ka ko juguw kɛ. Mɔgɔ min b’a fɛ ka kɛ Ala teri ye, Jehowa bɛ fɛn minnu koniya, o tigi fana ka kan k’o fɛnw koniya. (Zaburu 97:10) Ala teriw ka kan ka fɛn minnu koniya, olu dɔw filɛ nin ye:

Kakalaya. “I man kan ka jatɔya kɛ.” (Ekisode 20:14) Ka cɛnimusoya kɛ sanni furu ka kɛ, o fana man ɲi.—1 Kɔrɛntekaw 6:18.

Dɔlɔtɔya. “Dɔlɔtɔw . . . tɛna Ala ka Masaya sɔrɔ.”—1 Kɔrɛntekaw 6:10.

Mɔgɔfaga ni kɔnɔtiɲɛ. “I kana mɔgɔ faga.”—Ekisode 20:13.

Sonyɛni. “I kana sonyɛni kɛ.”—Ekisode 20:15.

Nkalontigɛ. Jehowa bɛ “nɛnkun nkalontigɛla” haramu.—Ntalenw 6:17.

 Dusuminɛbaliya ni farinya. Jehowa bɛ “mɔgɔ jugu ni farinyako kɛbagaw koniya.” (Zaburu 11:5) “Farisogo ka kɛwalew filɛ: . . . diminya.”—Galasikaw 5:19, 20.

Sobon. “Jɛ kana don aw ni mɔgɔ cɛ min ye . . . nataba ye.”—1 Kɔrɛntekaw 5:11, LK.

Siya wɛrɛ koniyali. “Aw ka aw juguw kanu. Minnu bɛ tugu aw nɔfɛ ka aw tɔɔrɔ, aw ka Ala deli olu ye.”—Matiyu 5:43, 44.

Ala bɛ fɛn minnu fɔ an ye, o fɛnw ka ɲi an ma. A man nɔgɔn tuma bɛɛ k’i yɛrɛminɛ ko juguw kɛli la. Jehowa ka dɛmɛ barika la, ani a Seerew ka dɛmɛ barika la, i bɛ se k’i yɛrɛminɛ walasa i kana fɛnw kɛ, fɛn minnu ka go Ala ye.—Esayi 48:17; Filipekaw 4:13; Heburuw 10:24, 25.