Teriya sinsinnen bɛ kanuya de kan. N’i bɛ caman dɔn Jehowa ko la, i ka kanuya bɛna bonya fana ka ɲɛsin a ma. N’i ka kanuya bɛ ka bonya Ala fan fɛ, dɔ fana bɛ fara i ŋaniya kan ka baara kɛ a ye. O bɛna i bila ka kɛ Yesu Krista ka kalanden ye. (Matiyu 28:19) Jehowa Seerew ye balimaw ye minnu nisɔn ka di. N’i farala u kan ka teriyasira taama ni Ala ye, i bɛna o diya dɔn fo abada. Nka, i ka kan ka mun kɛ?

Walasa k’a jira ko Ala kanuya b’i la, i ka kan k’a ka sariyaw mara. “Ka Ala kanu, o ye nin de ye, k’a ka ci fɔlenw mara. A ka ci fɔlenw man gɛlɛn.”—1 Yuhana 5:3.

I bɛ min kalan, i k’o sirataama. Yesu ye maana dɔ fɔ min b’o jira. A ko cɛ hakilitigi dɔ y’a ka so jɔ fara kan, cɛ hakilintan y’a ta jɔ cɛncɛn kan. Sanjiba nana tuma min na, so min tun jɔra fara kan, o ma bin, nka so min jɔra cɛncɛn kan o binna ni mankanba ye. Yesu y’a fɔ ko mɔgɔ minnu b’a ka kalansiraw lamɛn, k’u sirataama, k’o mɔgɔw bɛ iko cɛ hakilitigi min y’a ka so jɔ fara kan. Nka, a ko mɔgɔ minnu b’a ka kalansiraw lamɛn, n’u tɛ tila k’u sirataama, k’o mɔgɔw bɛ iko cɛ hakilintan min y’a ka so jɔ cɛncɛn kan. I b’a fɛ ka kɛ cɛ jumɛn ɲɔgɔn ye?— Matiyu 7:24-27.

 Yɛrɛbakun dili. O kɔrɔ ye k’i b’a fɔ Jehowa ye, delili la, k’i b’a fɛ k’a sago kɛ fo abada. N’i bɛ Ala sago kɛ, o b’a jira k’i ye Yesu Krista ka kalanden ye.—Matiyu 11:29.

Batiseli. “Wuli ka batise k’i ka jurumu ko ka bɔ i la, ka Matigi tɔgɔ wele.”—Kɛwalew 22:16.

I k’i yɛrɛ bɛɛ di baara ma Ala ye. ‘Aw bɛ fɛn o fɛn kɛ, a’ ye o kɛ n’aw dusukun bɛɛ ye i n’a fɔ n’aw b’a kɛ Jehowa ye; aw t’a kɛ mɔgɔw ye.’—Kolosekaw 3:23.