1. An bɛna delili jumɛn kɔnɔkuma sɛgɛsɛgɛ, n’o dɔnnen don kosɛbɛ?

DIƝƐ yɔrɔ bɛɛ la, mɔgɔ miliyɔn caman bɛ delili dɔn min tɔgɔ ye ko An Fa walima ko Matigi ka delili. O welecogo fila ɲɛsinnen bɛ o delili kelen de ma. Yesu yɛrɛ de ye o delili in kumaw fɔ walisa k’a jira a ka kalandenw na, delili ka kan ka kɛ cogo min na. Hakilila minnu fɔlen bɛ o delili kɔnɔ, olu nafa ka bon kosɛbɛ. Fɛn saba kɔnna ka fɔ o delili la. N’an ye olu lajɛ, o bɛna an dɛmɛ ka dɔ fara an ka dɔnniya kan Bibulu ka fɛn fɔlenw ko la.

2. Yesu y’a fɔ a ka kalandenw ye ko u ka delili kɛ fɛn saba jumɛnw ko la?

² O delili daminɛ na, Yesu y’a fɔ a lamɛnbagaw ye ko: “I ka kan ka Ala deli tan ko: ‘An Fa min bɛ sankolo la, i tɔgɔ ka saniya. I ka masaya ka na. I sago ka kɛ dugukolo kan i ko a bɛ kɛ sankolo la cogo min na.’ ” (Matiyu 6:9-13) O fɛn saba minnu bɛ delili la, olu kɔrɔ ye mun ye?

3. An ka kan ka mun dɔn Ala ka Masaya ko la?

³ An ye fɛn caman kalan kaban Ala tɔgɔ ko la, n’o ye Jehova ye. An ye dɔ fana fɔ Ala sagonata kan: A ye min kɛ ani a bɛna min kɛ hadamadenw ye. Nka, Yesu miiri tun bɛ mun de la tuma min na a y’a fɔ ko an ka delili kɛ tan ko: “I ka masaya ka na”? Ala ka Masaya ye mun de ye? O Masaya  nali bɛna Ala tɔgɔ saniya walima k’o kɛ fɛn senuma ye cogo jumɛn na? Cɛsira jumɛn bɛ Ala ka Masaya nali ni Ala sago kɛli cɛ?

4. Ala ka Masaya ye mun ye? A Masakɛ ye jɔni ye?

⁴ Ala ka Masaya ye gofɛrɛnaman ye Jehova ye min sigi, ale yɛrɛ fana de ye o masakɛ sugandi. Jɔni de ye Ala ka Masaya Masakɛ ye? Yesu Krisita don. A ye Masakɛba ye ka tɛmɛ diɲɛ kɔnɔ masakɛw bɛɛ kan. Yesu bɛ wele ko: “masakɛw ka Masakɛ, matigiw ka Matigi.” (1 Timote 6:15) Se b’a ye ka koɲumanw kɛ minnu ni hadamaden masakɛw ka koɲumanw cɛ ka jan ɲɔgɔn na kosɛbɛ, a mana kɛ masakɛ o masakɛ ye, hali masakɛ min ka fisa.

5. Ala ka Masaya bɛna mara kɛ k’a to yɔrɔ jumɛn na, ani a bɛna mun mara?

⁵ Ala ka Masaya bɛna mara kɛ k’a to yɔrɔ jumɛn na? Ayiwa, Yesu bɛ min sisan? Laala i hakili b’a la ko an y’a ye ka tɛmɛ ko u ye Yesu faga tɔɔrɔjiri kan, ko a sara, nka o kɔfɛ, a lakununna. A ma mɛn o kɔfɛ, a yɛlɛnna sankolo la. (Kɛwalew 2:33) O la sa, Ala ka Masaya bɛ sankolo de la. O kosɔn, Bibulu b’a fɔ o masaya ma ko “sankolo masaya.” (2 Timote 4:18) Ikomi Ala ka Masaya bɛ sankolo la, a bɛna to o yɔrɔ la walasa ka dugukolo mara.—Jirali 11:15.

6, 7. Mun b’a to Yesu ye masakɛ ye min ɲɔgɔn tɛ?

⁶ Mun b’a to Yesu ye masakɛ ye min ɲɔgɔn tɛ? A kun dɔ ye ko a tɛna sa abada. Ni Yesu ni hadamaden masakɛw sangara ɲɔgɔn na, Bibulu b’a fɔ Yesu ko la ko: “Ale kelenpe ye sabali ye. Mɔgɔ si tɛ se ka gɛrɛ kɛnɛ min na, a sigilen bɛ o de la.” (1 Timote 6:16) O kɔrɔ ye ko a bɛna hɛrɛ minnu lase mɔgɔw ma, olu bɛɛ bɛna mɛn. Wa, a bɛna kobaw ni kodumanba caman de kɛ.

⁷ An ka nin kirayakuma lajɛ min fɔra Yesu ko la: “Matigi Ni na to o kan, a na hakilitigiya ni faamuli Ni sɔrɔ ani laadili  Ni ni barika Ni ani Matigi dɔnniya ni a ɲɛsiran Ni. Matigi ɲɛsiran na diya a ye. A tɛna kiri tigɛ ka kɛɲɛ ni a ɲɛ ka ko yetaw ye, a tɛna kow latigɛ ka kɛɲɛ ni a tulo ka mɛntaw ye, nka a na faantanw ka kiri tigɛ ni tilennenya ye, ka dugukolo kan mɔgɔ sabalilenw ka ko ɲɛnabɔ ni tilennenya ye.” (Esayi 11:2-4) O kumaw b’a jira ko Yesu bɛna kɛ Masakɛ ye min tilennen don, min bɛ hinɛ dugukolo kan mɔgɔw la. Yala i b’a fɛ ka o masakɛ sugu sɔrɔ wa?

8. Yesu ni jɔni bɛna jɛ ka mara kɛ ɲɔgɔn fɛ?

⁸ Nin ye tiɲɛ wɛrɛ fana ye Ala ka Masaya ko la: Yesu kelen tɛna mara kɛ. A ni mɔgɔ wɛrɛw bɛna mara kɛ nɔgɔn fɛ. Misali la, ciden Paul y’a fɔ Timote ye ko: “Ni an bɛ muɲuli kɛ fo a laban, an na sigi masaya la a fɛ.” (2 Timote 2:12) Paul, Timote ani kantigi wɛrɛ minnu sugandira Ala fɛ, olu ni Yesu bɛna jɛ ka masaya kɛ ɲɔgɔn fɛ sankolo Masaya la. Mɔgɔ joli bɛna o bonya sɔrɔ?

9. Mɔgɔ joli ni Yesu bɛna mara kɛ ɲɔgɔn fɛ? Ala ye olu sugandili daminɛ waati jumɛn na?

⁹ I ko a jirala cogo min na nin gafe Tilayɔrɔba 7nan na, ciden Yuhana ye yelifɛn dɔ sɔrɔ min kɔnɔna na Yuhana ye “Sagaden [Yesu Krisita] jɔlen ye Sion kulu kan [a ka masakɛ jɔyɔrɔ la sankolo la]. Mɔgɔ waa kɛmɛ ni binaani ni waa naani bɛ a fɛ. Sagaden tɔgɔ ni a Fa tɔgɔ sɛbɛnnen tun bɛ o mɔgɔw tenw na.” O mɔgɔ waa kɛmɛ ni waa binaani ni waa naani ye jɔni ye? Yuhana yɛrɛ ye o fɔ an ye. A ko: “Sagaden bɛ taa yɔrɔ o yɔrɔ, olu bɛ tugu a nɔfɛ. U kunmabɔra ka bɔ mɔgɔw cɛma. U ye Ala ni Sagaden ka fɛn fɔlɔw de ye.” (Jirali 14:1, 4) O la sa, mɔgɔ waa kɛmɛ ni waa binaani ni waa naani ye Yesu ka kalanden kantigiw ye minnu sugandira kɛrɛnkɛrɛnnenya la walisa olu ni Yesu Krisita ka mara kɛ ɲɔgɔn fɛ sankolo la. U lakununnen kɔfɛ ka bɔ suw cɛ ma ɲɛnamaya kama sankolo la, olu “na sigi masaya la dugukolo kan” Yesu kɛrɛfɛ. (Jirali 5:10) Kabini cidenw ka waati  la, Ala ye Krecɛn kantigi dɔw sugandi walisa mɔgɔ 144 000 hakɛ ka dafa.

10. Mun na Ala ye kanuya yɛrɛ de jira a kɛlen ka fɛɛrɛ tigɛ walisa Yesu ni mɔgɔ 144 000 ka hadamadenw mara?

¹⁰ Ala ye kanuya yɛrɛ de jira a kɛlen ka fɛɛrɛ tigɛ walisa Yesu ni mɔgɔ 144 000 ka hadamadenw mara. Mun na? K’a da ko kelen kan. Yesu b’a dɔn a kɔrɔ ye min ye ka kɛ hadamaden ye ani ka tɔɔrɔ. Paul y’a fɔ Yesu ko la ko “Sarakalasebaaw kuntigi min tɛ se ka hinɛ an na an ka barikantanya kow la, o tɛ an fɛ. Nka an ka sarakalasebaa kuntigi kɔrɔbɔra fɛn bɛɛ la i ko an yɛrɛw, jurumu kɔni sen t’a la.” (Heburuw 4:15; 5:8) Yesu marakɛɲɔgɔnw fana ka hadamadenya kɔnɔna na, u ye tɔɔrɔ dɔn ani u ye kow muɲu. Ka fara o kan, u ye u ka dafabaliya kɛlɛ. U ye bana sugu bɛɛ fana muɲu. A jɛlen don ko gɛlɛya minnu bɛ hadamadenw da la, u bɛna olu faamu.

11. Mun na Yesu y’a fɔ ko a ka kalandenw ka delili kɛ walisa Ala sago ka kɛ sankolo la?

¹¹ Yesu y’a fɔ tuma min na ko a ka kalandenw ka delili kɛ walisa Ala ka Masaya ka na, a y’a fɔ fana ko u ka delili kɛ walisa Ala sago ka kɛ “dugukolo kan i ko a bɛ kɛ sankolo la cogo min na.” Ala bɛ sankolo la. Mɛlɛkɛ kantigiw tun bɛ a sago kɛ tuma bɛɛ o yɔrɔ la. Nka, an y’a ye nin gafe Tilayɔrɔba 3 nan na ko mɛlɛkɛjugu dɔ ye Ala sago kɛli dabila, ka Hadama ni Hawa fana su u ka jurumu kɛ. Bibulu bɛ min fɔ o mɛlɛkɛjugu kan min bɛ wele ko Sitanɛ-Sendonbaga, an bɛna fɛn caman wɛrɛ kalan a ko la nin gafe Tilayɔrɔba 10 nan na. Sitanɛ ni mɛlɛkɛ minnu y’a sugandi ka tugu Sitanɛ kɔ (n’olu bɛ wele ko jinɛw), Ala y’a yamaruya u ka to sankolo la waati dɔ kɔnɔ. O de y’a to o waati kɔnɔna na, Ala sago tun tɛ ka kɛ sankolo la bɛɛ fɛ. Nka, yɛlɛma tun ka kan ka don o la tuma min na Ala ka Masaya bɛna mara daminɛ. Masakɛ sigilen kura Yesu Krisita tun bɛna kɛlɛ kɛ Sitanɛ fɛ.—Jirali 12:7-9.

12. Koba fila jumɛnw ɲɛfɔlen bɛ Jirali 12:10 na?

 ¹² Nin kirayakumaw b’a jira min bɛna kɛ: “Ne ye kumakanba mɛn ka bɔ sankolo la ko: ‘An ka Ala ka kisili ni a ka sebaaya ni a ka masaya sera sisan, ani a ka Krisita ka kuntigiya, katuguni an balimaw sendonbaa [Sitanɛ] kerunna dugukolo kan, o min tun bɛ Ala ɲɛ kɔrɔ ka u sendon su fara tile kan.’ ” (Jirali 12:10) Koba fila minnu ɲɛfɔlen bɛ o Bibulu tɛmɛsira kɔnɔ, yala i ye olu jateminɛ wa? A ko fɔlɔ ye ko Ala ka Masaya y’a ka mara daminɛ Yesu Krisita ka kuntigiya kɔrɔ. A ko filanan ye ko Sitanɛ gɛnna ka bɔ sankolo la ka na dugukolo fan fɛ.

13. Ikomi Sitanɛ gɛnna ka bɔ sankolo la, o kɔ kɛra mun ye?

¹³ O koba fila kɔ kɛra mun ye? Ka ɲɛsin o kow ma minnu kɛra sankolo la, an b’a kalan ko: “O de kosɔn, sankolow ani u kɔnɔ fɛnw, aw ka ɲagali.” (Jirali 12:12) Tiɲɛ na, mɛlɛkɛ kantigi minnu bɛ sankolo la, olu bɛ ɲagali bawo Sitanɛ ni a ka jinɛw tɛ sankolo la tun minkɛ, fɛn o fɛn bɛ sankolo la, olu bɛɛ ye kantigi ye Jehova Ala fan fɛ. Bɛn ni hɛrɛ dafalen de bɛ sankolo la sisan. Ala sago bɛ ka kɛ sankolo la sisan.

14. Ikomi Sitanɛ gɛnna ka bɔ sankolo la ka na dugukolo fan fɛ, mun kɛra?

¹⁴ Nka, dugukolo dun? Bibulu b’a fɔ ko: “Bɔnɛ bɛ dugukolo ni kɔgɔji ye, k’a masɔrɔ Sitanɛ jiginna ka taa aw yɔrɔ. A diminnenba don, katuguni a y’a dɔn ko a ka waati tɔ man jan tun.” (Jirali 12:12) Sitanɛ diminnenba don a gɛnni ko la ka bɔ sankolo la, ani fana ko a ka waati tɔ man jan tun. A ka dimin kɔnɔna na, a bɛ tɔɔrɔ walima “bɔnɛ” lase mɔgɔw ma dugukolo kan. An bɛna fɛn caman kalan o “bɔnɛ” ko la tilayɔrɔba nata la. Nka, k’a sɔrɔ o ko b’an hakili la, an bɛ se k’an yɛrɛ ɲininka ko: Ala sago bɛna kɛ dugukolo kan Masaya sababu fɛ cogo jumɛn de la?

15. Ala sagonata ye mun ye ka ɲɛsin dugukolo ma?

¹⁵ I hakili to a la, Ala sagonata ye min ye ka ɲɛsin dugukolo ma. I ye kunnafoni sɔrɔ o kan Tilayɔrɔba 3 nan na. Edɛn nakɔ kɔnɔ, Ala y’a jira ko a sago ye dugukolo ka kɛ alijinɛ ye  min falen bɛ hadamaden tilennenw na minnu tɛna sa. Sitanɛ ye Hadama ni Hawa su ka jurumu kɛ. Ala sagonata ye min ye ka ɲɛsin dugukolo ma, a ye nɔ bila a la, nka a ma Ala sagonata yɛlɛma. Jehova sagonata ye halisa ko ‘dugukolo ka kɛ mɔgɔ tilennenw ciyɛn ye. U ka sigi a kan badaa.’ (Zaburuw 37:29) Ala ka Masaya de bɛna o ko tiimɛ. Cogo jumɛn na?

16, 17. Daniɛl 2:44 bɛ mun jira an na Ala ka Masaya ko la?

¹⁶ An k’a lajɛ sisan kirayakuma min bɛ Daniɛl 2:44 na. An b’a kalan o yɔrɔ la ko: “O masakɛw ka masaya waatiw la, sankolola Ala na masaya wɛrɛ lawuli. O tɛna se ka tiɲɛ. O masaya tɛna don siya wɛrɛ bolo. O masaya na masaya tɔw tiɲɛ ka u halaki. Ale yɛrɛ na sigi masaya la badaa.” O kuma bɛ mun jira an na Ala ka Masaya ko la?

¹⁷ O kuma bɛ fɛn fɔlɔ min jira an na, o ye ko Ala ka Masaya tun ka kan ka sigi “o masakɛw ka masaya waatiw la,” walima tuma min na masaya wɛrɛw bɛ fanga la. A bɛ fɛn filanan min jira an na, o ye ko Ala ka Masaya bɛna to yen badaa. Gofɛrɛnaman wɛrɛ tɛna a bin, gofɛrɛnaman wɛrɛ fana tɛna sigi a nɔ na. A bɛ fɛn sabanan min jira an na, o ye ko kɛlɛ bɛna kɛ Ala ka Masaya ni nin diɲɛ masayaw cɛ. Ala ka Masaya bɛna se sɔrɔ. A laban na, o masaya de bɛna kɛ gofɛrɛnaman kelenpe ye hadamadenw bɛɛ kunna. O tuma na, hadamadenw bɛna mara kuntigiya bɛɛ la fisaman fɛ u ma deli ka min ɲɔgɔn dɔn abada.

18. Kɛlɛ laban min bɛna kɛ Ala ka Masaya ni nin diɲɛ gofɛrɛnamanw cɛ, o bɛ wele cogo di?

¹⁸ Bibulu ye fɛn caman fɔ an ye o kɛlɛ laban ko la min bɛna kɛ Ala ka Masaya ni diɲɛ gofɛrɛnamanw cɛ. Misali la, a b’a fɔ ko ni nin diɲɛ kow sigicogo laban bɛ ka surunya tuma min na, mɛlɛkɛjuguw bɛna nkalonw jɛnsɛn walisa ka “dugukolo kan masakɛw” lafili. Kun jumɛn na? ‘Walisa ka u [masakɛw] lajɛ Ala Sebaayabɛɛtigi ka donba kɛlɛ kama.’ Dugukolo kan masakɛw bɛna u lajɛ “yɔrɔ min na, o tɔgɔ  ko Harmagedɔn heburukan na.” (Jirali 16:14, 16) Ka kɛɲɛ ni o tɛmɛsira fila ye, kɛlɛ laban min bɛna kɛ hadamadenw ka gofɛrɛnamanw ni Ala ka Masaya cɛ, o kɛlɛ bɛ wele ko Harmagedɔn.

19, 20. Mun b’a to Ala sago tɛ ka kɛ dugukolo kan kabini sisan?

¹⁹ Ala ka Masaya bɛna mun tiimɛ Harmagedɔn sababu fɛ? I ka miiri kokura Ala sagonata kan ka ɲɛsin dugukolo ma. Jehova Ala tun b’a fɛ ko dugukolo ka fa hadamaden tilennen dafalenw na minnu tun bɛna a bato Alijinɛ kɔnɔ. Mun dun b’a to o tɛ se ka kɛ kabini sisan? A fɔlɔ ye ko an ye jurumutɔw ye ani ko an bɛ bana, an bɛ sa. An y’a ye Tilayɔrɔba 5nan na ko Yesu sara an kosɔn walisa an ka se ka ɲɛnamaya kɛ badaa-badaa. A ka ca a la ko i hakili bɛ nin kumaw la minnu sɛbɛnnen bɛ Yuhana ka kitabu kɔnɔ, ko: “Ala ye diɲɛ kanu haali, fo a ye a Denkɛ kelenpe di, walisa mɔgɔ o mɔgɔ dara a Denkɛ la, o kana halaki, nka o ka ɲɛnamaya banbali sɔrɔ.”—Yuhana 3:16.

²⁰ A kun dɔ wɛrɛ ye ko mɔgɔ caman bɛ kojuguw kɛ. U bɛ nkalonw tigɛ, u bɛ nanbaraw kɛ, u bɛ jɛnɛya fana kɛ. U t’a fɛ ka Ala sago kɛ. Mɔgɔ minnu bɛ kojuguw kɛ, u bɛna halaki Harmagedɔn kɛlɛ kɛtuma na. (Zaburu 37:10) Kun min fana kosɔn Ala sago tɛ ka kɛ dugukolo kan, o ye ko gofɛrɛnamanw tɛ dusu don mɔgɔw kɔnɔ ka o kɛ. Gofɛrɛnaman caman ka fanga dɔgɔyara wala u ka jugu wala yuruguyurugu bɛ u la. Bibulu b’a fɔ k’a jɛya ko: “Mɔgɔ dɔ bɛ sigi kuntigiya la dɔ kun na ka bɔnɛ lase o ma.”—Waajulikɛla 8:9.

21. Masaya sababu fɛ, Ala sago bɛna kɛ dugukolo kan cogo jumɛn na?

²¹ Harmagedɔn kɔfɛ, hadamadenw bɛna mara gofɛrɛnaman kelen dɔrɔn de fɛ, n’o ye Ala ka Masaya ye. O Masaya bɛna Ala sago kɛ, ka hɛrɛba caman lase mɔgɔw ma. Misali la, a bɛna Sitanɛ n’a ka jinɛw bɛɛ bɔ yen. (Jirali 20:1-3) Se min bɛ Yesu ka saraka ye, o baara bɛna dafa walisa hadamaden kantigiw kana bana ani u kana sa tun. O Masaya ka fanga  kɔrɔ, u bɛna se ka ɲɛnamaya kɛ kudayi. (Jirali 22:1-3) Dugukolo bɛna kɛ alijinɛ ye. O la sa, Masaya sababu fɛ, Ala sago bɛna kɛ dugukolo kan, a tɔgɔ bɛna saniya. O kɔrɔ ye mun ye? O kɔrɔ ye ko a laban na, Ala ka Masaya ka fanga kɔrɔ, mɔgɔ o mɔgɔ bɛ ɲɛnamaya la, o kelen-kelen bɛɛ bɛna bonya da Jehova tɔgɔ kan.

22. Kun jumɛnw na an b’a dɔn ko Ala ka Masaya ma na tuma min na Yesu tun bɛ dugukolo kan, walima yɔrɔnin kelen a lakununnen kɔfɛ?

²² Yesu y’a fɔ tuma min na a ka kalandenw ye k’u ka delili kɛ ko “I ka masaya ka na”, a tun jɛlen don ko Masaya tun ma na o waati la. Yesu yɛlɛnna sankolo la tuma min na, yala Masaya nana o waati la wa? Ayi, bawo Piɛrɛ ni Paul fila bɛɛ y’a fɔ ko Yesu lakununni kɔfɛ, kirayakuma min bɛ Zaburu 110:1, BS la, o tiimɛna Yesu la. O kirayakuma ko: “Jehova y’a fɔ ne Matigi ye, ko: I sigi ne kini bolo fan fɛ, fo ne ka i juguw kɛ i sen kɔrɔ dalan ye.” (Kɛwalew 2:32-35; Heburuw 10:12, 13) O la sa, Yesu ye waati dɔ kɛ makɔnɔni na.

23. (a) Ala ka Masaya ye fanga daminɛ tuma jumɛn na? (b) An bɛna kuma mun kan tilayɔrɔba nata kɔnɔ?

²³ O makɔnɔni tun ka kan ka kɛ waati joli? San minnu tɛmɛna sani san 1900 ka se ani san minnu tɛmɛna a kɔ, o sanw kɔnɔ, Bibulu kalanden kɔnɔjɛlenw y’a faamu dɔɔnin-dɔɔnin ko makɔnɔni waati tun bɛna ban san 1914. (O san ko la, i ka Ɲɛfɔli farankanw ɲɛ 215nan fo 218nan lajɛ.) Ko  minnu daminɛna diɲɛ kɔnɔ san 1914, olu b’a jira ko Bibulu kalanden kɔnɔjɛlenw ka faamuyalicogo tun tilennen don. Bibulu kirayakumaw tiimɛni b’a jira ko Krisita kɛra Masakɛ ye san 1914 ani ko Ala ka sankolola Masaya ye fanga daminɛ. O la sa, waati min tora Sitanɛ bolo, n’o ‘man jan tun,’ an bɛ balola o waati kɔnɔna de la. (Jirali 12:12; Zaburu 110:2) An bɛ se k’a fɔ fana k’a sɔrɔ an ma siga ko yan ni dɔɔnin cɛ, Ala ka Masaya bɛna wale kɛ walisa Ala sago ka kɛ dugukolo kan. Yala o tɛ kibaru dumanba ye wa? I dalen bɛ o la wa? Tilayɔrɔba nata bɛna i dɛmɛ k’a faamu ko Bibulu bɛ o kow de fɔ tigitigi.