1, 2. (a) Nilifɛn nafa ka bon i bolo kosɛbɛ tuma jumɛn de la? (b) Mun na an bɛ se k’a fɔ ko kunmabɔsara ye nilifɛn ye min nafa ka bon ni nilifɛn tɔw bɛɛ ye i ma deli ka min sɔrɔ?

I MA deli ka nilifɛn bɛɛ la nafama jumɛn sɔrɔ? Walisa nafa ka kɛ nilifɛn na, a wajibiyalen tɛ nilifɛn ka kɛ fɛn sɔngɔ gɛlɛn ye. Tiɲɛ na, nilifɛn nafa yɛrɛ-yɛrɛ tɛ jate tuma bɛɛ wari fɛ. Ni nilifɛn bɛ hɛrɛ lase i ma, walima ni a bɛ mago yɛrɛ ɲɛ i ka diɲɛlatigɛ kɔnɔ, o tuma de la i bɛ se k’a fɔ ko nilifɛn nafa ka bon kosɛbɛ i bolo.

² Nilifɛn bɛɛ cɛ la, i bɛ se ka minnu sɔrɔ, kelen bɛ olu la min ka fisa n’a tɔw bɛɛ ye. O ye nilifɛn ye Ala ye min kɛ hadamadenw ye. Jehova ye fɛn caman di an ma, nka a ye nilifɛn bɛɛ la belebele min kɛ an ye, o ye ko a y’a Denkɛ Yesu Krisita di an ma k’o kɛ kunmabɔ saraka ye. (Matiyu 20:28) I ko an bɛn’a ye cogo min na nin tilayɔrɔba kɔnɔna na, kunmabɔsara ye nilifɛn ye min nafa ka bon ni nilifɛn tɔw bɛɛ ye i bɛ se ka minnu sɔrɔ, bawo a bɛ hɛrɛ min lase i ma, o hɛrɛ ka bon fo a tɛ se ka fɔ. Hadamaden mago minnu ka gɛlɛn ni tɔw bɛɛ ye, kunmabɔsara bɛ olu ɲɛnabɔ. Tiɲɛ na, kunmabɔsara ye fɛn bɛɛ la belebele ye min b’a jira ko Jehova b’i kanu.

3. Kunmabɔsara ye mun ye? An ka kan ka mun faamu walisa kunmabɔsara ka kɛ nilifɛn nafamaba ye an bolo?

³ N’an b’a fɔ k’a nɔgɔya, kunmabɔsara ye Jehova ka fɛɛrɛ tigɛlen ye walisa ka hadamadenw kunmabɔ ka bɔ jurumu ni saya la. (Efesekaw 1:7) Walisa an ka o kalansira kɔrɔ faamu min bɛ Bibulu kɔnɔ, fo an ka miiri ko la min kɛra Edɛn nakɔ kɔnɔ. An tɛna se k’a faamu kun min na kunmabɔsara ye nilifɛn nafamaba ye min kɛra an ye, fo n’an y’a dɔn Hadama bɔnɛna min na tuma min na a ye jurumu kɛ.

4. Hadamaden ɲɛnamaya dafalen kɔrɔ tun ye mun ye Hadama bolo?

⁴ Jehova ye Hadama da tuma min na, a ye fɛn dɔ di a ma min nafa ka bon kosɛbɛ: O ye ɲɛnamaya dafalen ye, mɔgɔya la. O kɔrɔ tun ye min ye Hadama bolo, e ka miiri o la: Ala ye Hadama da ka farikolo dafalen ni hakili dafalen di a ma. A tun tɛna bana abada, walima ka kɔrɔ, walima ka sa. Ikomi Hadama tun ye mɔgɔ dafalen ye, jɛɲɔgɔnya kɛrɛnkɛrɛnnen tun bɛ ale ni Jehova cɛ. Bibulu b’a fɔ ko “Hadama ye Ala den ye.” (Liki 3:38, LK) O la sa, jɛɲɔgɔnya kɛrɛnkɛrɛnnen min tun bɛ Hadama ni Jehova Ala cɛ, o tun bɛ i n’a fɔ jɛɲɔgɔnya kɛrɛnkɛrɛnnen min bɛ denkɛ dɔ ni a fa cɛ, fa min bɛ a kanu kosɛbɛ. Jehova tun bɛ kuma a denkɛ fɛ min bɛ dugukolo kan. A tun ye nisɔndiya baaraw di a ma ka kɛ. Jehova tun bɛ min ɲini Hadama fɛ, a y’o fana fɔ a ye.—Jenɛse 1:28-30; 2:16, 17.

5. Ni Bibulu b’a fɔ ko Hadama dara “Ala ja la,” o kɔrɔ ye mun ye?

⁵ Hadama dara “Ala ja la.” (Jenɛse 1:27) O kɔrɔ tɛ ko Hadama bɔlen bɛ Ala fɛ farikolo la. I ko an y’a kalan cogo min na nin gafe tilayɔrɔba fɔlɔ la, Jehova ye hakili yebali ye. (Zan 4:24, LK) O kosɔn, farisogo ni joli tɛ Jehova la. O la sa, n’a fɔra ko Hadama dara Ala ja la, o kɔrɔ ye ko tuma min na Jehova ye Hadama da, jogo ɲuman minnu bɛ Jehova yɛrɛ la, a ye o jogo ɲumanw ɲɔgɔnw kɛ Hadama la, i n’a fɔ kanuya, hakilitigiya, tilennenya ani sebaaya. Hadama tun bɛ i ko a Fa sira wɛrɛ fana fɛ min nafa tun ka bon kosɛbɛ. O ye nin ye: Se tun bɛ Hadama ye ale yɛrɛ k’a sugandi a b’a fɛ ka min kɛ. O la sa, Hadama  tun tɛ i n’a fɔ masin min tɛ se ka fɛn wɛrɛ kɛ fo a dilanna walima a bolodala min kama. Hadama tun bɛ se ka kow latigɛ a yɛrɛ ye. A tun bɛ se fana k’a sugandi ka koɲuman kɛ walima ka kojugu kɛ. Ni Hadama tun y’a sugandi ka Ala kan minɛ, a tun bɛna to ɲɛnamaya la kudayi Alijinɛ kɔnɔ dugukolo kan yan.

6. Hadama ye Ala kan bila tuma min na, a bɔnɛna mun de la? O ko ye mun lase a bɔnsɔnw ma?

⁶ A jɛlen don ko Hadama ye Ala kan bila tuma min na, ni Ala y’a ɲangi ni saya ye, o da goyara a la kojugu. A ka jurumu kosɔn Hadama bɔnɛna a ka ɲɛnamaya dafalen na ani koduman tɔw bɛɛ la minnu ni a ka ɲɛnamaya dafalen tun bɛ taa ɲɔgɔn fɛ. (Jenɛse 3:17-19) Nka, dusukasiko don ko Hadama kelenpe dɔrɔn ma bɔnɛ o ɲɛnamaya la min nafa ka bon fo a tɛ se ka fɔ. A bɔnsɔn minnu tun ma wolo fɔlɔ, a ye olu bɛɛ fana bɔnɛ o ɲɛnamaya la. Ala ka kuma b’a fɔ ko: “Jurumu donna diɲɛ la mɔgɔ kelen [Hadama] barika la, saya fana donna jurumu barika la. Saya sera Hadamadenw bɛɛ ma ten, k’a masɔrɔ u bɛɛ ye jurumu kɛ.” (Romɛkaw 5:12) Tiɲɛ na, an bɛɛ ye jurumu sɔrɔ ciyɛn ye ka bɔ Hadama yɔrɔ. O de kosɔn, Bibulu b’a fɔ ko Hadama ye ale yɛrɛ ani a bɔnsɔnw ‘feere’ jurumu ma, ka an bɛɛ lajɛlen kɛ jurumu ni saya ka jɔnw ye. (Romɛkaw 7:14) Jigiya si tun tɛ Hadama walima Hawa ye bilen bawo u y’a dabɔ a kama k’a sugandi ka Ala kan bila. Nka, mun dun bɛ se ka fɔ u bɔnsɔnw ko la, an sen bɛ minnu na?

7, 8. Kunmabɔsara kɔrɔ ye fɛn fila ye kɛrɛnkɛrɛnnenya la. O fɛnw ye jumɛnw ye?

⁷ Jehova ma hadamadenw to jurumu ni saya ka jɔnya la. A ye fɛɛrɛ min tigɛ walisa k’an kisi ka bɔ o jɔnya la, o ye kunmabɔsara ye. Kunmabɔsara ye mun de ye? Kunmabɔsara bɛ fɛn fila de jira kɛrɛnkɛrɛnnenya la. A fɛn fɔlɔ ye sara ye min bɛ di walisa mɔgɔ minɛnen dɔ ka bila walima wari don min bɛ di walisa ka fɛn dɔ san kokura. Kunmabɔsara bɛ i ko fɛn min bɛ di walisa sɔrɔdasi min minɛna kɛlɛkɛyɔrɔ la a juguw fɛ, o ka se ka bila. Kunmabɔsara bɛ fɛn filanan min jira, o ye wari hakɛ  ye min bɛ bɛn fɛn dɔ sɔngɔ ma. A bɛ i ko wari min bɛ sara walisa tɔɲɔ min bɔra joginda dɔ la, ka o wo datugu. Misali la, ni mɔgɔ dɔ kɛra kasaara sababu ye, o tigi ka kan ka wari hakɛ sara min bɛ bɛn fɛn tiɲɛnen sɔngɔ ma tigitigi.

⁸ Mun tun bɛ se ka kɛ walisa Hadama ye bɔnɛ belebele min lase an ma, ka o datugu ani k’an hɔrɔnya ka bɔ jurumu ni saya ka jɔnya la? Jehova ye kunmabɔsara min di, ani o bɛ se ka nafa minnu lase i ma, an ka o kow lajɛ sisan.

9. Kunmabɔsara sugu jumɛn de tun wajibiyalen bɛ?

⁹ Ikomi an bɔnɛna hadamaden ka ɲɛnamaya dafalen de la, hadamaden ka ɲɛnamaya dafabali si tun tɛ se ka o kunmabɔ. (Zaburu 49:8, 9) Fo kunmabɔsara tun ka sɔrɔ min nafa ni hadamaden ka ɲɛnamaya dafalen nafa bɛɛ tun ye kelen ye. O bɛ bɛn tilennenya dafalen sariyakolo ma min bɛ Ala ka Kuma kɔnɔ. O sariyakolo b’a fɔ ko: “Ni ka kɛ ni sara ye.” (Dutɛrɔnɔmɛ 19:21) O la sa, Hadama bɔnɛna ni walima ɲɛnamaya dafalen min na, nafa min tun bɛ o la, fɛn jumɛn tun bɛna se ka o datugu? O fɛn ye hadamaden ka ɲɛnamaya dafalen wɛrɛ ye. O de tun wajibiyalen bɛ walisa ka kɛ kunmabɔsara ye min bɛnnen don.—1 Timote 2:6.

10. Jehova ye kunmabɔsara di cogo jumɛn na?

¹⁰ Jehova y’o kunmabɔsara di cogo jumɛn na? A y’a denkɛ hakilimaalama dafalenw dɔ la kelen de ci ka na dugukolo kan. Nka, Jehova ma danfɛn hakilimaalama dɔ ci ten dɔrɔn. A Denkɛ bangelen kelenpe min tun ko ka di a ye ka tɛmɛ tɔw bɛɛ kan, a ye o de ci ka na. (1 Yuhana 4:9, 10) O denkɛ in sɔnna ka bɔ a ka yɔrɔ la, n’o ye sankolo ye, ka na dugukolo kan. (Filipekaw 2:7) I ko an y’a kalan nin gafe tilayɔrɔba tɛmɛnen na cogo min na, Jehova ye kabako kɛ tuma min na a ye o Denkɛ in ka ɲɛnamaya ta ka na o bila Mariyama wolonugu la. Ala ka hakili senu sababu fɛ, Yesu wolola i ko hadamaden dafalen. Jurumu tun tɛ a la.—Luka 1:35.

11. Mɔgɔ kelen sera ka kɛ mɔgɔ miliyɔn caman kunmabɔsara ye cogo jumɛn na?

 ¹¹ Mɔgɔ kelen tun bɛ se ka kɛ mɔgɔ miliyɔn caman kunmabɔsara ye cogo jumɛn na? Walisa ka o jaabi sɔrɔ, an ka nin jateminɛ: Mɔgɔ miliyɔn caman kɛra jurumutɔw ye cogo jumɛn na? An k’a to an hakili la ko Hadama ye jurumu kɛ tuma min na, fɛn nafamaba min tun b’a bolo, n’o ye ɲɛnamaya dafalen ye, a bɔnɛna o la. O kosɔn, a ma se ka ɲɛnamaya dafalen di a bɔnsɔnw ma. A sera ka fɛn minnu di u ma dɔrɔn, o kɛra jurumu ni saya de ye. Bibulu b’a fɔ Yesu min ma ko “Hadama laban,” hadamaden ka ɲɛnamaya dafalen tun bɛ ale de fɛ. A ma jurumu kɛ abada. (1 Korɛntikaw 15:45, LK) Sira dɔ la, Yesu tun y’a yɛrɛ bila Hadama nɔ na walisa k’an kisi. Yesu ye Hadama ka jurumu sara di. O kɛra cogo di? A kɛlen k’a ka ɲɛnamaya dafalen kɛ saraka ye. O sen fɛ, a ye Ala kan minɛ k’a dafa. O cogo la, Yesu ye jigiya di Hadama bɔnsɔnw bɛɛ ma.—Romɛkaw 5:19; 1 Kɔrɛntekaw 15:21, 22.

12. Yesu ka tɔɔrɔ ye mun jira?

¹² Tɔɔrɔ minnu dara Yesu kan sani a ka sa, Bibulu ye o tɔɔrɔw kelen-kelen bɛɛ fɔ an ye. U y’a nijuguya gosi, k’a gengen jiri la. A sara dimin juguba kɔnɔ. (Yuhana 19:1, 16-18, 30; Ɲɛfɔli farankanw ɲɛ 204nan fo 206nan) Mun na a tun ka kan Yesu ka tɔɔrɔ kosɛbɛ nin cogo la? An bɛna a ye kɔfɛ, nin gafe yɛrɛ kɔnɔ, ko Sitanɛ ye siga don a la ni batobagaw bɛna sɔrɔ Jehova bolo hadamadenw na minnu bɛna to kantigiya la a fan fɛ kɔrɔbɔli la. Ikomi Yesu tora kantigiya la k’a sɔrɔ a tɔɔrɔla kosɛbɛ, a ye sitanɛ ka kuma jaabi cogo bɛɛ la fisaman na. A y’a jira ko se bɛ hadamaden dafalen min ye k’a sugandi a b’a fɛ ka min kɛ, o bɛ se ka kantigiya dafalen mara Ala fan fɛ, Sendonbaga mana fɛn o fɛn kɛ. A jɛlen don ko a Denkɛ kanulen ka kantigiya ye Jehova nisɔndiya kosɛbɛ.—Ntalenw 27:11.

13. Kunmabɔsara kɛra cogo jumɛn na?

¹³ Kunmabɔsara kɛra cogo jumɛn na? Yahutuw ka Nisankalo tile 14, san 33 Krisita tile la, Ala y’a to a Denkɛ dafalen jurumuntan ka faga. O cogo la, Yesu y’a ka hadamaden  ɲɛnamaya dafalen saraka “siɲɛ kelenpe.” (Heburuw 10:10) Yesu salen tile sabanan, Jehova y’a su kunu walisa a ka kɔsegin ka taa ɲɛnamaya kɛ sankolo la. Sankolo la, a y’a ka hadamaden ɲɛnamaya dafalen sɔngɔ min saraka k’o kɛ Hadama bɔnsɔnw kunmabɔsara ye, a ye o jira Ala la. (Heburuw 9:24) Jehova sɔnna Yesu ka saraka la i ko kunmabɔsara min tun ka kan walisa ka hadamadenw kisi ka bɔ jurumu ni saya ka jɔnya la.—Romɛkaw 3:23, 24.

14, 15. Walisa ka “jurumuw yafa sɔrɔ,” fo an ka mun kɛ?

¹⁴ K’a sɔrɔ an ye jurumutɔw ye, kunmabɔsara sababu fɛ, n’o ye Ala ka nilifɛn bɛɛ la belebele ye, kabini sisan ani don nataw la, an bɛ se ka dugawuw sɔrɔ minnu nafa ka bon fo a tɛ se ka fɔ. An ka o dugawu dɔw lajɛ ɲɔgɔn fɛ.

¹⁵ An bɛ jurumuw yafa sɔrɔ. An ye dafabaliya min sɔrɔ ciyɛn ye ka bɔ Hadama yɔrɔ, o kosɔn an bɛ kɛlɛ yɛrɛ-yɛrɛ de kɛ walisa ka se ka kow kɛ minnu tilennen don. An bɛɛ bɛ jurumu kɛ an ka kuma fɔtaw ni an ka kɛwalew la. Nka, an bɛ se ka “jurumuw yafa” sɔrɔ Yesu ka kunmabɔ saraka kosɔn. (Kolosekaw 1:13, 14) Nka, walisa ka jurumuw yafa sɔrɔ, fo an k’a jira tiɲɛ na k’an nimisara an ka jurumuw la. An ka kan fana ka Jehova deli ni majiginnenya ye a ka yafa an ka jurumuw ma, k’an ka dannaya da a Denkɛ ka kunmabɔ saraka la.—1 Yuhana 1:8, 9.

16. Mun b’a to an bɛ se ka Ala bato ni dusukun jɛlen ye? Nafa jumɛn b’a la ka o dusukun jɛlen sugu sɔrɔ?

¹⁶ An bɛ dusukun jɛlen sɔrɔ Ala ɲɛkɔrɔ. N’an dusukun b’an jalaki, o ka teli ka jigitigɛ lase an ma, k’an bila an k’an yɛrɛ ye mɔgɔw ye minnu tɛ fosi ye. Nka, ikomi an bɛ se ka jurumu yafa sɔrɔ kunmabɔsara sababu fɛ, Jehova ka ɲumanya kɔnɔ, a y’a yamaruya an k’a bato ni dusukun jɛlen ye, k’a sɔrɔ an ye mɔgɔ dafabaliw ye. (Heburuw 9:13, 14) O b’a to an bɛ se ka kuma Jehova fɛ ni kɔnɔnajɛya ye an ka deliliw la. O la sa, an bɛ se k’a deli k’a sɔrɔ fɛn fosi t’an degun. (Heburuw 4:14-16) Ni an bɛ dusukun jɛlen mara, o b’an hakili sigi. O bɛ dɔ fara  bonya kan, an yɛrɛ bɛ bonya min da an yɛrɛ kan ani k’an ka nisɔndiya bonya.

17. An bɛ se ka koduman jumɛnw sɔrɔ katuguni Yesu sara an kosɔn?

¹⁷ An bɛ jigiya sɔrɔ ka ɲɛnamaya banbali kɛ alijinɛ kɔnɔ dugukolo kan yan. Bibulu b’a fɔ Romɛkaw 6:23 na ko “Jurumu sara ye saya ye.” O tɛmɛsira kelen b’a fɔ ka fara a kan ko: “Nka Ala ka nilifɛn ye ɲɛnamaya banbali de ye Yesu Krisita an Matigi la.” Nin gafe in Tilayɔrɔba 3nan na, an kumana kodumanw kan minnu bɛna kɛ Alijinɛ kɔnɔ dugukolo kan yan. (Jirali 21:3, 4) Nin koduman nataw, ɲɛnamaya banbali ni kɛnɛya dafalen sen b’a la, olu bɛɛ bɛna se ka kɛ katuguni Yesu sara an kosɔn. Walisa an ka se ka o kodumanw sɔrɔ, fo an k’an ka waleɲumandɔn jira nilifɛn ko la min ye kunmabɔsara ye.

18. Mun na an ka kan ka Jehova waleɲumandɔn kunmabɔsara ko la?

¹⁸ Mun na an ka kan ka Jehova waleɲumandɔn kosɛbɛ kunmabɔsara ko la? Nilifɛn bɛ kɛ fɛn nafamaba ye kɛrɛnkɛrɛnnenya la, ni a kɛbaga ye waati walima cɛsiri caman kɛ walima ka wari caman don o da fɛ walisa k’o kɛ. N’an y’a ye k’o tigi ye o kɛ an ye walisa k’a jira an na ko a b’an kanu tiɲɛ na, o bɛ don an na kosɛbɛ. O la sa, kunmabɔsara de nafa  ka bon ka tɛmɛ nilifɛn tɔw bɛɛ kan, bawo Ala ye fɛn min di an ma, o gɛlɛyara a ma tigitigi fo k’a dama tɛmɛ. Yuhana 3:16 b’a fɔ ko “Ala ye diɲɛ kanu haali, fo a ye a Denkɛ kelenpe di.” Kunmabɔsara ye fɛn ye min b’a jira ka tɛmɛ fɛn tɔw bɛɛ kan ko Jehova b’an kanu. A b’a jira fana ko Yesu b’an kanu, bawo a sɔnna ka a ka ɲɛnamaya di an kosɔn. (Yuhana 15:13) O la sa, kunmabɔsara ye nilifɛn ye min ka kan k’a to an bɛ da a la ko Jehova ni a Denkɛ b’an kelen-kelen bɛɛ kanu.—Galasikaw 2:20.

19, 20. I bɛ se k’a jira cogo jumɛnw na ko waleɲumandɔn b’i la Ala ka nilifɛn ko la, n’o ye kunmabɔsara ye?

¹⁹ I dun bɛ se k’a jira cogo jumɛn na ko waleɲumandɔn b’i la Ala ka nilifɛn ko la, n’o ye kunmabɔsara ye? A fɔlɔ ye ka dɔ fara i ka dɔnniya kan Jehova ko la, ale min ye Dibagaba ye. (Yuhana 17:3) N’i bɛ Bibulukalan kɛ ni nin gafɛ ye, o bɛna i dɛmɛ ka o kɛ. N’i ka dɔnniya bɛ bonya ka taa a fɛ Jehova ko la, a kanuya bɛ bonya i dusukun na fana ka taa a fɛ. Kɔfɛ, Jehova b’a fɛ i ka min kɛ, kanuya bɛna i bila k’o kɛ.—1 Yuhana 5:3.

²⁰ I k’a jira ko i dalen bɛ Yesu ka kunmabɔ saraka la. A fɔra Yesu ko la ko: “Min dara a Denkɛ la, ɲɛnamaya banbali bɛ o tigi fɛ.” (Yuhana 3:36) An bɛ se k’a jira cogo jumɛn na ko an dalen bɛ Yesu la? O dannaya sugu tɛ jira kuma dama dɔrɔn fɛ. Yakuba 2:26 b’a fɔ ko: “Dannaya salen don ni kɛwalew tɛ.” Tiɲɛ na, dannaya lakika bɛ jira “kɛwalew” de fɛ. Walisa k’a jira ko an dalen bɛ Yesu la, a cogo dɔ ye k’an seko damajira kɛ walisa k’a ladege an ka kuma fɔta la. Nka o dɔrɔn tɛ. An k’a ladege fana an ka ko kɛtaw la.—Yuhana 13:15.

21, 22. (a) Mun na san o san, an ka kan ka ye Matigi ka surɔfana labatoli kɛnɛ kan? (b) Mun bɛna ɲɛfɔ Tilayɔrɔba 6nan ni 7nan na?

²¹ Matigi ka surɔfana labatoli min bɛ kɛ san o san, i ka ye o kɛnɛ kan. San 33 Krisita tile la, Nisankalo tile 14, Yesu ye ko kɛrɛnkɛrɛnnen dɔ sigi. Bibulu bɛ o wele ko “Matigi ka surɔfana.” (1 Kɔrɛntekaw 11:20, NW; Matiyu 26:26-28) O ko kɛrɛnkɛrɛnnen bɛ wele fana ko Krisita ka saya Hakilijigin. Yesu ye o sigi walisa ka a ka cidenw dɛmɛ ani Krecɛn sɛbɛ tɔw  bɛɛ minnu fana bɛna na olu kɔfɛ, walisa u ka u hakili to a la ko ale ka saya fɛ i ko hadamaden dafalen, a ye a ni walima a ka ɲɛnamaya kɛ kunmabɔsara ye. O ko la, Yesu y’a fɔ ko: “A’ ye nin kɛ walisa ka aw hakili to ne la.” (Luka 22:19) Yesu ka saya Hakilijigin labatoli b’an hakili jigin Jehova ni Yesu ka kanuyaba la, u ye min jira kunmabɔsara sababu fɛ. An bɛ se ka an ka waleɲumandɔn jira kunmabɔsara ko la, ni an bɛ na san o san Yesu ka saya Hakilijigin la. *

²² Jehova ye kunmabɔsara min di an kosɔn, siga si t’a la ko nilifɛn don min nafa ka bon fo a tɛ se ka fɔ. (2 Kɔrɛntekaw 9:14, 15) O nilifɛn nafa bɛ se mɔgɔ salenw yɛrɛ fana ma. Kunmabɔsara nafa bɛ se olu ma cogo min na, Tilayɔrɔba 6nan ni 7nan bɛna o ɲɛfɔ.