Fɛn hakililamaw bɛ yen! Fɛn hakililamaw sigiyɔrɔ yebali la, fɛn hakililama ɲumanw ni jugumanw fila bɛɛ bɛ yen. Yali mɔgɔw tun don minnu balola dugukolo kan ka tila ka sa wa?

Ayi, u tɛ o ye. Ni mɔgɔ sara, a tɛ taa fɛn hakililamaw sigiyɔrɔ la, iko mɔgɔ caman b’a miiri cogo min na. An b’o dɔn cogo di? Katuguni Bibulu b’a fɔ ten. Bibulu ye tiɲɛ kitabu ye ka bɔ Ala lakika kelenpe yɔrɔ, min tɔgɔ ko Jehowa. Jehowa de ye hadamadenw da. A b’a dɔn cɔ u bɛ kɛ min ye n’u sara.—Zaburu 83:19; 2 Timote 3:16.

Bibulu b’a fɔ ko Ala ye cɛ fɔlɔ Hadama da ka bɔ “dugukolo buguri la.” (Jenɛse 2:7) Ala y’a bila alijinɛ kɔnɔ min tun ye Edɛn nakɔtu ye. Ni Hadama tun ye Jehowa ka sariya labato, a tun tɛna sa; a tun na kɛ ɲɛnamaya la hali bi dugukolo kan. Nka tuma min na Hadama y’a dabɔ a kama ka Ala ka sariya tiɲɛ, Ala y’a fɔ a ye ko: “I [na] kɔsegin dugukolo la, i tara ka bɔ min na. I ye buguri ye, i na kɔsegin buguri la.”—Jenɛse 3:19.

O kɔrɔ ye mun ye? Ayiwa, Hadama tun bɛ min sanni Jehowa k’a da ka bɔ buguri la? A tun tɛ yɔrɔ si la. A tun tɛ fɛn hakililama ye sankolo la min tun ka kan ka wolo. A tun tɛ yen. O la sa, tuma min na Jehowa y’a fɔ Hadama ye k’a na “kɔsegin dugukolo la,” a tun b’a fɛ k’a fɔ a ye, k’a na sa. A ma yɛlɛma fɛn hakililamaw  sigiyɔrɔ la. A salen, Hadama seginna ɲɛnamayantanya la, a ntanyana, a tun tɛ yen tuguni. Saya ye ɲɛnamayantanya de ye.

Fure tɔw dun? Olu fana ntanyana wa? Bibulu bɛ jaabi di o la, ko:

• “U bɛɛ [hadamadenw ni baganw] bɛ taa yɔrɔ kelen na. U bɛɛ bɔra buguri la, u bɛɛ bɛ kɔsegin buguri la.”—Waajulikɛla (Eklesiaste) 3:20.

• “Mɔgɔ salenw tɛ foyi dɔn.”—Waajulikɛla 9:5

• “U ka kanuya ni u ka koniya ni u ka keleya, o bɛɛ bana ka kɔrɔ.”—Waajulikɛla 9:6.

• “Katuguni i bɛ taa Seyɔl [kaburu] kɔnɔ, baara ni dabali ni ko dɔnniya ni hakilitigiya, olu si tɛ yen.”—Waajulikɛla 9:10, NW.

• “[Mɔgɔ] bɛ segin buguri la, o don yɛrɛ la a miirili kow bɛ ban.”—Zaburu 146:4.

 Yali a ka gɛlɛn i ma ka sɔn nin tɛmɛsiraw la wa? N’o de don, i miiri nin na: Du caman kɔnɔ, cɛ de bɛ na ni wari ye walisa k’a ka denbaya magow ɲɛ n’o ye. Ni cɛ sara tuma min na, a ka denbaya bɛ gɛlɛyaw sɔrɔ tuma caman na. Tuma dɔw la, wari bɛrɛ tɛ a muso n’a denw bolo ka suman san. A dɔ rɔ, cɛ jugu dɔw b’u tɔɔrɔ. Sisan i yɛrɛ ɲininka: ‘Ni cɛ bɛ balo la fɛn hakililamaw sigiyɔrɔ la, mun na a tɛ t’a fɛ k’a ka denbaya magoɲɛfɛnw d’a ma? Mun na a t’a ka denbaya tanga mɔgɔ juguw ma?’ Katuguni Sɛbɛnniw de ta ye tiɲɛ ye. Cɛ in tɛ balo la bilen, se t’a ye ka foyi kɛ.—Zaburu 115:17.

Yali o kɔrɔ ye ko furew tɛna segin ɲɛnamaya la bilen wa? Ayi, o tɛ. An na kuma su lakununi ko la kɔfɛ. Nka, o kɔrɔ ye ko furew t’i ka kɛtaw kala ma. U tɛ se k’i ye, walima k’i lamɛn janko ka kuma i fɛ. I man kan ka siran u ɲɛ. U tɛ se k’i dɛmɛ, u tɛ se ka juguman k’i la.—Waajulikɛla 9:4; Esayi 26:14.