Nka, mun na Sitanɛ n’a ka jinɛw b’u magan ka mɔgɔw nɛgɛn? Katuguni u b’a fɛ an n’u ka jɛ u ka murutili la. U b’a fɛ an k’u bato, ka da u ka nkalon kumaw na. Ko minnu man di Jehowa ye, u b’a fɛ an k’olu kɛ. Laadala ko caman minnu ɲɛsinnen bɛ furew ma, olu sen b’o kow la.

Mɔgɔ diyanyebaga ka saya ye himihimiko ni dusukasikoba ye. A ka kan mɔgɔ k’a ka dusukasi jira, wa o bɛnnen don fana. A terikɛ Lazare sara tuma min na, Yesu “kasira.”—Yuhana 11:35.

Laadalako sifa caman de bɛ diɲɛ kɔnɔ ka ɲɛsin furew ma, wa danfaraba bɛ u ni ɲɔgɔn cɛ. U caman tɛ Bibulu sariyakolow kɛlɛ. O n’a ta bɛɛ, kɛcogoya dɔw sigilen bɛ hakilina min kan, o ye ko furew bɛ balo la, ani ko se bɛ u ye ka ɲɛnamaw ye. Ka siɲɛnaw kɛ sangabonda la, ka sukojamabaw lajɛ, ani ka janajabaw kɛ, nin bɛɛ dili ye furew ka mangoya ɲɛsiran de ye. Nka, ikomi suw tɛ “foyi dɔn,” minnu bɛ o kow kɛ, olu bɛ Sitanɛ ka nkalonw de kɔkɔrɔdon.—Waajulikɛla 9:5.

 Laadaw walima sukojama wɛrɛw bɛ bɔ dannako la min b’a fɔ ko furew mago bɛ dɛmɛ na, ani k’u na ko-jugu kɛ ɲɛnamaw na n’u ma u dusu mada. Jamana dɔw la, tile 40 walima san kelen mɔgɔ salen kɔfɛ, laadala seliw bɛ kɛ, sarakaw bɛ bɔ. U b’a miiri k’o bɛ fure dɛmɛ ka furancɛ ‘cɛtigɛ’ fo ka se fɛn hakililamaw sigiyɔrɔ la. Laada dɔnnen wɛrɛ ye ka fure sɔn dumunifɛn ni minfɛn na.

Nin fɛnw man ɲi katuguni u bɛ Sitanɛ ka nkalonw kɔkɔrɔdon, nkalon minnu ɲɛsinnen bɛ furew ma. An sen ka ye, hali dɔɔnin na, laadaw la minnu sigilen bɛ jinɛw ka kalansiraw kan, yali Jehowa bɛ sɔn o ma wa? Abada!—2 Kɔrɛntekaw 6:14-18.

Ala lakika ka baarakɛlaw sen tɛ laadaw si la minnu bɛ Sitanɛ ka nkalonw sinsin. O nɔ na, u b’u cɛsiri ni kanuya ye ka ɲɛnamaw dɛmɛ, k’u dusu saalo. U b’a dɔn ko Jehowa kelenpe de bɛ se ka mɔgɔ salen dɛmɛ.—Job 14:14, 15.

Mɔgɔ dɔw bɛ jinɛw kumaɲɔgɔnya, u kelen ni jinɛw, walima jinɛkilila dɔ sababu fɛ. O de bɛ wele jinɛweleli. Jinɛweleli sifa dɔw ye wodu ni subagaya ni jinɛmoriya ni filɛli ani furew kumaɲɔgɔn yali ye.

Bibulu b’o fɛnw haramu. A b’a fɔ ko: “Buguridala ni filɛlikɛla ni basidilabaa ni subaga ni kilisifɔla ni jinɛkilila ani donbaa ani sukilila, olu si kana sɔrɔ aw cɛma, katuguni o kow kɛbaaw haramulen bɛ Jehowa fɛ.”—Dutɛrɔnɔmɛ 18:10-12.

Mun na Jehowa b’an lasɔmi nin kow la ni barika ye?

 An yɛrɛw ka hɛrɛ kama, Jehowa b’an lasɔmi walasa an k’an kɔlɔsi jinɛweleli sifaw bɛɛ la. A bɛ mɔgɔw kanu, a bɛ hami u la. A b’a dɔn ko mɔgɔ minnu ni jinɛw bɛ jɛɲɔgɔnya kɛ, ko tɔɔrɔ bɛna olu sɔrɔ.

O misali dɔ ye Nilda ye, min tun ye jinɛwelela ye Brezil jamana na. Jinɛw ye a ka diɲɛnatigɛ gɛlɛya a bolo kosɛbɛ. A ko: “Jinɛw . . . tun sera ne na, u tun bɛ ne bila ci la. A tɔ kɛra sa, tuma dɔ la n bɛ bɔ fɛn kala ma, tuma wɛrɛ la n tɛ bɔ foyi kala ma. N ladara kɛnɛyaso kɔnɔ kunkolo bana kosɔn. Jinɛw tun ye ne tɔɔrɔ fo ka fasa dimi bila ne na. Ne tun bɛ furaw ta walasa ka dimi mada. N y’a daminɛ fana ka dɔlɔ ni sigarɛti min tuma bɛɛ. O mɛnna sen na, ka san caman kɛ.”

Tagalen ɲɛ, Jehowa n’a ka dugukolo kan Seerew ka dɛmɛ barika la, Nilda hɔrɔnyara ka bɔ jinɛw ka fanga kɔrɔ. Sisan a ka ɲɛnamaya saniyalen don, wa a falen bɛ wale ɲumanw na. A ko: “Ne bɛ bɛɛ laadi: aw ni fɛn hakililama [juguw] kana don jɛ la, hali waati kunkurunni kɔnɔ.”