Sini kabakoma
Sitanɛ n’a ka jinɛw tɛna waati jan kɛ bilen hadamadenw lafilili la. Jehowa y’u kerun kaban ka bɔ sankolo la. (Jirali 12:9) Yan ni dɔɔnin cɛ, Ala na wuli ko kura Sitanɛ n’a ka jinɛw kama. Yeli fɛn dɔ la ka bɔ Ala yɔrɔ, ciden Yuhana ko: “Ne ye mɛlɛkɛ jigintɔ ye ka bɔ sankolo la, dingɛ dandɔnbali konnɛgɛ ni nɛgɛ jɔlɔkɔ b’a bolo. A ye dragɔn, sa kɔrɔ, minɛ, o de ye Sendonbaga ye, Sitanɛ don. A y’a siri, a ka san waa kelen kɛ yen. A y’a kerun dingɛ dandɔnbali kɔnɔ, ka a da sɔgɔ, ka taamasiyɛn da a kan, walasa a kana na siyaw lafili tun, sanni ka o san waa kelen dafa.” (Jirali 20:1-3) O kɔfɛ, Sendonbaga n’a ka jinɛw na halaki fo abada. —Jirali 20:10.
Dugukolo kan mɔgɔ juguw fana na halaki ka ban pewu.—Zaburu 37:9, 10; Luka 13:5.
Furew bɛna ɲɛnamaya ko kura!
Sitanɛ ni jinɛw bilalen kɔfɛ u danma yɔrɔ la, Jehowa bɛna koduman caman kɛ hadamadenw ye. I hakili b’a la ko furew ntanyalen don, k’u tɛ yen tun. Yesu ye saya sanga ni sunɔgɔ ye—sunɔgɔ dunba, sugo tɛ min na. (Yuhana 11:11-14) A y’o kɛ katuguni a tun b’a dɔn ko waati bɛ na, waati min na mɔgɔ minnu bɛ saya sunɔgɔ la, olu bɛna segin ɲɛnamaya la. A y’a fɔ ko: “Waati bɛ na, kaburu kɔnɔ mɔgɔw bɛɛ . . . na bɔ yen.”—Yuhana 5:28, 29; a sanga ni Kɛwalew 24:15 ye.
U bɛna segin ɲɛnamaya la yan dugukolo kan. Sangaciw nɔ na, nisɔndiya kibaruw na fɔ mɔgɔw ko la, mɔgɔ minnu bɛna segin ɲɛnamaya la! K’i diyanyemɔgɔw kunbɛn u bɔtɔ kaburu kɔnɔ, o na kɛ sewako ye dɛ!