An bɛɛ mago bɛ wari la walasa k’an ka denbaya magoɲɛfɛnw di u ma. (Ntalenw 30:8) O bɛɛ kɔ, “nafolo bɛ mɔgɔ mara”. (Waajulikɛla 7:12) A ka gɛlɛn furuɲɔgɔnma dɔw bolo ka kuma wariko kan furu kɔnɔ, nka aw kan’a to wariko ka kɛ sababu ye ka gɛlɛya don aw ka furu kɔnɔ. (Efesekaw 4:32) Furuɲɔgɔnmaw ka kan ka da ɲɔgɔn na ani ka baara kɛ ɲɔgɔn fɛ u kɛtɔ ka kuma u ka wari dun cogo kan.

BIBULU BƐ NIN DE FƆ: “Aw la jumɛn, ni a b’a fɛ ka sankanso jan jɔ, a tɛna i sigi fɔlɔ k’a jɔ sɔngɔ jate k’a filɛ ni fɛn b’a bolo k’a laban wa?” (Luka 14:28) A nafa ka bon aw k’a latigɛ ɲɔgon fɛ aw bɛna aw ka wari don da min fɛ. (Amos 3:3) Aw mago bɛ ka min san, aw ye bɛn o kan ani aw bɛna wari min don o da fɛ aw ye o jate minɛ. (Ntalenw 31:16) Kana fɛn san ko wari bɛ i kun k’a sɔrɔ a mago tɛ i ye. A ɲini k’i yɛrɛ tanga juru ta ma. Wari min bɛ i bolo baara kɛ ni o dɔrɔn ye.—Ntalenw 21:5; 22:7.

I BƐ SE KA MIN KƐ:

• Kalo salen kɔ, ni wari dɔ tora aw bolo aw y’a latigɛ ɲɔgɔn fɛ aw bɛna min kɛ ni o ye

• N’a y’a sɔrɔ aw ka wari ma bɔli kɛ, aw ye ­fɛɛrɛ kɛrɛnkɛrɛnnen tigɛ walasa ka dɔ bɔ aw ka musaka kɛtaw la. Misali la, sani aw ka taa dumuni san kɛnɛma k’a dun, aw yɛrɛ ka dumuni tobi aw ka so kɔnɔ

BIBULU BƐ NIN DE FƆ: ‘An b’a fɛ ka ko ɲuman kɛ Jehova ɲɛ kɔrɔ, o dama tɛ, an b’a fɛ ka o kɛ mɔgɔw fana ɲɛ na.’ (2 Kɔrɛntekaw 8:21) I tilen i furuɲɔgɔn ye i ka sɔrɔta ni i ka dunta kan.

Kuma i furuɲɔgɔn fɛ tuma bɛɛ ni i bɛna latigɛlibaw kɛ wariko ta fan fɛ. (Ntalenw 13:10) Ka kuma ɲɔgɔn fɛ wariko kan o bɛna aw dɛmɛ ka bɛn to aw ka furu kɔnɔ. Kana i ka wari sɔrɔta jate i n’a fo i yɛrɛ ta, nka a jate i n’a fo denbaya ka wari. —1 Timote 5:8.

I BƐ SE KA MIN KƐ:

• Aw ye bɛn wari hakɛ dɔ kan aw kelen kelen bɛ se ka min ­dun k’a sɔrɔ a ma se aw ka ɲɔgɔn ɲininka

• Kana a to gɛlɛya ka na aw kan k’a sɔrɔ ka kuma wariko kan