Lɛtɛrɛ min bɔra Ɲɛmɔgɔ kulu yɔrɔ
“Aw kɛra karamɔgɔw ye” (Heburuw 5:12) A’ye a jateminɛ! Jehova—o min ye Karamɔgɔw bɛɛ la ɲuman ye diɲɛ bɛɛ kɔnɔ—o b’a ɲini an fɛ an ka tɔw kalan ale ko la! Baara dilen o baara dilen min bɛ tiɲɛ kalanni kan Jehova ko la—denbaya kɔnɔ, jɛkulu kɔnɔ, walima foro baara la—o ye bonyaba ani jɔyɔrɔba ye. An bɛ se ka ɲɛ sɔrɔ o la cogo di?
O jaabi bɛ sɔrɔ kumaw kɔnɔ ciden Paul ye minnu sɛbɛn Timote ye: “I ka i jija ka Ala ka kuma kalan mɔgɔw ɲɛ na, ka u waaju ka u kalan.” Paul ko fana: “O cogo la i na i yɛrɛ kisi ka i lamɛnbaaw fana kisi.” (1 Timote 4:13, 16) Cikan min bɛ mɔgɔw kisi o de bɛ aw bolo ka lase mɔgɔw ma. O de la, a nafa ka bon aw ka dɔ fara aw ka kalanjɛ ani mɔgɔw kalanni kɛcogo ɲɛli kan. Nin gafenin dilanna walasa ka aw dɛmɛ o kɛli la. Fɛn minnu bɛ nin gafenin in kɔnɔ aw ye olu dɔw lajɛ.
Tɛmɛsira dilen min bɛ ɲɛ kelen kelen bɛɛ kɔnɔ, o bɛ se ka Bibulu sariyakolo jira min bɛ taa ni o yɔrɔ barokun ye baara ka kan ka kɛ min kan walima o bɛ se ka kɛ misali dɔ ye min bɛ o barokun waleya cogo kan
Karamɔgɔ si tɛ yen min bɛ i n’a fɔ Jehova. (Job 36:22) Kalanjɛ kɛcogo ani mɔgɔw kalanni seko min bɛ aw la, nin gafenin kɛtɔ ka aw dɛmɛ ka dɔ fara o kan, aw kana ɲinɛ fewu ko Jehova de ye an ka cikan Sun ye ani ko ale de bɛ mɔgɔw sama ka na a ma. (Yuhana 6:44) O la, aw ye delili kɛ tuma caman walasa ka hakili senu sɔrɔ. Aw ye baara kɛ ni Ala ka Kuma ye tuma bɛɛ. Aw kana aw yɛrɛw hakilinata di tuma si nka aw ye tɔw dɛmɛ tuma bɛɛ u k’a ye Jehova hakilinata ye min ye kow kan. Aw ye aw jija ka aw lamɛnbagaw dɛmɛ Jehova kanuyaba ka kɛ u dusukun na.
A ɲinina aw fɛ aw ka mɔgɔw kalan cikan bɛɛ la nafama la min ɲɔgɔn ma deli ka di hadamadenw ma. An dalen b’a la ko ni aw sinsinnen tora “Ala ka barika dilen” kan, aw bɛna ɲɛtaa kɛ.—1 Piɛrɛ 4:11.
Aw baarakɛɲɔgɔnw,
Jehova Seerew ka Ɲɛmɔgɔ kulu
