Ala bɛ wele bila mɔgɔ suguya bɛɛ ma, u ka gɛrɛ ale la deli sababu fɛ. (Zaburu 65:3) O la, a tɛ sɔn walima a tɛ deliliw bɛɛ lamɛn wa? Misali la, cɛ min tɛ a muso minɛ ka ɲɛ, o ka deliliw bɛ tigɛ. (1 Piɛrɛ 3:7) O cogo la, ni Israɛlikaw tun taara a fɛ ka kojugu kɛ, Ala tun tɛ sɔn k’u ka deliliw lamɛn. A jɛlen don, ko delili ye bonyaba de ye. Wa, hali mɔgɔ min ye jurumu jugu kɛ, Ala bɛ o ka deliliw lamɛn, ni a nimisara.—Esayi 1:15; 55:7 kalan.

Wideyo lajɛ min tɔgɔ ye ko Yala Ala bɛ deliliw bɛɛ lamɛn wa?

Delili ye an ka bato fan dɔ ye, o la delili ka kan ka kɛ an dabaga Jehova dɔrɔn de ye. (Matiyu 4:10; 6:9) O la, an ka dafabaliya kama an ka kan ka delili kɛ Yesu tɔgɔ la, ka d’a kan ale sara an ka jurumuw kosɔn. (Yuhana 14:6) Jehova t’a fɛ an ka to ka segin deliliw kelen kan tuma bɛɛ minnu sɛbɛnnen bɛ an bolo walima minnu maralen bɛ an kunkolo la, nka a b’a fɛ an ka deliliw ka bɔ an dusukun na.—Matiyu 6:7; Filipekaw 4:6, 7 kalan.

Hali delili minnu bɛ kɛ ka sɔrɔ kumakan tɛ mɛn, an dabaga bɛ se ka o mɛn. (1 Samuɛl 1:12, 13) A bɛ wele bila an ma an ka a deli tuma bɛɛ, i n’a fɔ tile daminɛ tuma walima a bantɔ la, dumuni kɛ tuma walima ni an bɛ gɛlɛya kɔnɔ.—Zaburu 55:23; Matiyu 15:⁠36 kalan.

Ka gɛrɛ Ala la o ma nɔgɔn, ka d’a kan an bɛ ɲɛnamaya kɛ mɔgɔw cɛ la minnu tɛ u ka dannaya da Ala kan ani minnu yɛrɛ b’u ɲagaribɔ a ka layidu talen na, min ye ka hɛrɛ sigi dugukolo kan. (2 Timote 3:1, 4; 2 Piɛrɛ 3:3, 13). An mago bɛ ka fara bato kɛ jama kan, an bɛ dusudon ɲɔgɔn kɔnɔ sɔrɔ yɔrɔ min na.—Heburuw 10:24, 25 kalan.

 Ka fara mɔgɔw kan minnu bɛ Ala kanu, o bɛ an dɛmɛ ka gɛrɛ Ala la. Jehova Seerew ka lajɛw sababu fɛ, mɔgɔ wɛrɛw ka dannaya bɛna dusudon i kɔnɔ.—Romɛkaw 1:11, 12 kalan.

I bɛ min kalan Jehova ka kuma kɔnɔ, ni i bɛ taasi o kan. I bɛ se ka gɛrɛ Ala la. I hakili jagabɔ a ka kɛwalew, a ka kalansiraw ani a ka layiduw kan. Hakilijakabɔ ni deliliw bɛna kɛ sababu ye ka i bila ka waleɲumandɔn jira Ala ka kanuya ani a ka hakilitigiya la.—Josue 1:8; Zaburu 1:1-3 kalan.

I bɛ se ka gɛrɛ Ala la ni i dalen bɛ a la dɔrɔn de ani ni i bɛ dannaya da a kan. I n’a fɔ Ni maa fɛnw, dannaya fana bɛ labalo. O bɛ kɛ, i kɛtɔ ka i ka dannaya jusigilan sɛgɛsɛgɛ tuma bɛɛ.—Matiyu 4:4; Heburuw 11:1, 6 kalan.

Mɔgɔ minnu bɛ Jehova kanu, a b’a janto olu la. A bɛ se ka olu lakana ka bɔ fɛn na, fɛn minnu bɛ se ka kɛ sababu ye k’u ka dannaya ani ɲɛnamaya banbali jigiya tiɲɛ. (Zaburu 91:1, 2, 7-10) A b’an ladɔnniya kɛwalew la, minnu bɛ se ka kunkow lase an ma kɛnɛya ani hɛrɛ ta fan fɛ. Jehova b’an kalan ɲɛnamaya kɛcogo ɲuman na.—Zaburu 73:27, 28; Yakuba 4:4, 8 kalan.