Mɔgɔ kɔnɔnajɛlenw bɛ diinɛw bɛɛ kɔnɔ. O ye kibaru duman ye Ala bolo k’o mɔgɔ suguw ye ani k’a janto olu la. Nka dusukasi ko don, k’a ye ko baara bɛ ka kɛ ni diinɛ ye walasa ka kojugu kɛ. (2 Kɔrɛntekaw 4:3, 4; 11:13-15). Ni an ye kunnafoniw lajɛ, an bɛ a ye ko diinɛw sen bɛ hali terrorisme, siyakɛlɛw, kɛlɛw ani binkanniw na denmisɛnniw kan. I m’a dɔn k’o ye dusukasi kow ye Ala dannamɔgɔ lakikaw bolo.—Matiyu 24:3-5, 11, 12 kalan.

O la diinɛ lakika bɛ bonya da Ala kan, diinɛ nkalonma mandi a ye. Diinɛ nkalonma bɛ hakilinaw kalan minnu tɛ Bibulu kɔnɔ, ka fara kalansira nkalonmaw kan Ala ani saya ko la. Nka Jehova b’a fɛ mɔgɔw ka tiɲɛ dɔn a ko la.—Ezekiɛl 18:4; 1 Timote 2:3-5 kalan.

Nisɔndiya ko don, k’a dɔn ko diinɛ minnu b’a fɔ ko Ala ka di u ye, k’a sɔrɔ tiɲɛ yɛrɛ la Sitanɛ ka nin diɲɛ de ka di u ye, olu tɛ se ka Ala nɛgɛn. (Yakuba 4:4) Ala ka kuma bɛ diinɛ nkalonma bɛɛ wele ko “Babilɔnɛba”. Babilonɛ tun ye dugu kɔrɔ ye diinɛ nkalonma daminɛ na yɔrɔ min na Nuhun ka waati la, sanjiba kɔfɛ. Sɔɔni, Ala bɛna halakili cun diinɛ kan minnu bɛ ka Hadamadenw tɔɔrɔ ani ka u jigitigɛ.—Jirali 17:1, 2, 5, 16, 17; 18:8 kalan.

O kibaru duman diya tɛ fɔ ka ban. Jehova m’a ɲinɛ mɔgɔ kɔnɔnajɛlenw kɔ minnu jɛnsɛnnen bɛ diinɛ nkalonmaw kɔnɔ diɲɛ fan bɛɛ. A bɛ o mɔgɔ suguw fara ɲɔgɔn kan kelenya kɔnɔ, a kɛtɔ ka u kalan tiɲɛ ko la.—Mise 4:2, 5 kalan.

Jehova bɛ i janto mɔgɔw la, minnu bɛ koɲuman ani tiɲɛ kanu. A bɛ a ɲini u fɛ teliya la u ka bɔ diinɛ nkalonmaw kɔnɔ. Mɔgɔ minnu bɛ Ala kanu, olu bɛ se ka yɛlɛma kɛ minnu kadi a ye.—Jirali 18:4 kalan.

San kɛmɛ fɔlɔ la, mɔgɔ kɔnɔnajɛlenw kɛlen ka kibaru duman mɛn cidenw fɛ, u ye a jira ni nisɔndiya ye ko o kadi u ye. U ye u kalan ɲɛnamaya kɛcogo kura la Jehova ko la, ani ɲɛnamaya kɛcogo hɛrɛma ni kuntilenna ani jigiya ko la. Olu ye misali ɲuman ye an bolo bi, ka d’a kan u ye a jira ko kibaru duman kadi u ye u kɛtɔ ka Jehova bila u ka ɲɛnamaya kow bɛɛ ɲɛ.—1 Tesalonikekaw 1:8, 9; 2:13 kalan.

Jehova bɛ wele bila i ma a ka denbaya kɔnɔ, a batobaga minnu ye u kɔ don diinɛ nkalonma la, i bɛ olu sɔrɔ yɔrɔ min na. Ni i sɔnna Jehova ka wele ɲagalen ma, i bɛn’a ka teriya sɔrɔ, ani i bɛna Jehova batobagaw ka denbaya kura sɔrɔ, ka fara ɲɛnamaya banbali kan.—Marka 10:29, 30; 2 Kɔrɛntekaw 6:17, 18 kalan.

Kibaru duman ye ko a bɛna kiritigɛ diinɛ nkalonmaw kan. A bɛna lafiya di degunkow la diɲɛ bɛɛ kɔnɔ. Diinɛ nkalonmaw tɛna mɔgɔw lafili walima ka farafarali don mɔgɔw cɛ bilen. Bɛɛ bɛna ɲɛnamaya kɛ kelenya kɔnɔ u kɛtɔ ka Ala tiɲɛma kelen dɔrɔn bato.—Jirali 18:20, 21; 21:3, 4 kalan.