A MIIRI ko dɔkɔtɔrɔ dɔ nana i ka sigida la. A yeko fɔlɔ la, a bɛ se ka kɛ i ma sɔn a ye kosɛbɛ. Nka ni a ye i teri bananen dɔw furakɛ ka ɲɛ, yali i fana tɛna taa a fɛ yen wa?

O cogo kelen na, Ala ka Kuma bɛ iko dɔkɔtɔrɔ. Dɔw bɛ siga a la. Nka n’u sɔnna ka a ka laadilikan ɲumanw sira taama, u ka ɲɛnamaya bɛ nɔgɔya kosɛbɛ. An ka o misali dɔw lajɛ.

Sumiatun ye gɛlɛya dɔw sɔrɔ a ka furu kɔnɔ. A ko: “A ma mɛ ne furulen kɔ fɛ, ne y’a jateminɛ ko ne cɛ Dumas tɛ a mako don ne la kosɛbɛ. Ne dusu tiɲɛnen tun bɛ pɛrɛn a kun na k’a neni, ka fɛnw fili a ma k’a jogin. Tuma dɔw la, o tun bɛ ne sɛgɛn fo ne bɛ kirin.

“Dumas ye Ala ka Kuma kalan daminɛ tuma min na, ne tun bɛ ne ɲagaribɔ a la. Nka ne tun bɛ n dɛn k’a ka kalan lamɛn. Don dɔ la, ne ye Ala ka Kuma yɔrɔ dɔw kalantɔ mɛn, ko: ‘Musow, a’ ye kolo aw yɛrɛw cɛw ye, i ko aw bɛ kolo Matigi ye cogo min na . . . Muso ka a cɛ bonya.’ (Efesekaw 5: 22, 33) O kumaw ye ne dusukun minɛ. Ne ye Ala deli o la, a ka yafa ne ma k’a masɔrɔ ne tun bɛ ne cɛ neni. Ne y’a ɲini Ala fɛ fana, a ka ne dɛmɛ ka kɛ furumuso ɲuman ye. A ma mɛn, ne ni Dumas y’a daminɛ ka Ala ka kuma kalan ɲɔgɔn fɛ.”

Ala ka Kuma b’a fɔ fana ko: “Cɛw fana ka kan ka u musow kanu i ko u yɛrɛw farikolow.” (Efesekaw 5:28) Sumiatun tilara k’a fɔ ko: “An ye nin kow kalan tuma min na, o ye yɛlɛma don an fila bɛɛ la. Ne y’a daminɛ ka kuma a fɛ ni bonya ye, ka té wuli a ye, n’a seginna ka bɔ baarayɔrɔ la. Dumas fana ye a mako don ne la kosɛbɛ ka ne dɛmɛ sokɔnɔbaaraw la. An fila bɛɛ y’an jija ‘ka ko ɲuman kɛ ɲɔgɔn ye, ka hinɛ ka yafa ɲɔgɔn ma.’ (Efesekaw 4:32) O y’a to dɔ farala an ka bonya ni kanuya kan ka ta’a fɛ. Nin ye an ka furu san 40 ye, bɛn kɔnɔ. Ala ka Kuma de y’an ka furu dilan!”

Tayib ye cɛ dɔ ye, min tun tɛ se ka a dusu minɛ. A yɛrɛ ko: “Ne tun ka farin kojugu. Tuma bɛɛ ne tun bɛ kɛlɛ la. Ne tun bɛ mɔgɔw bagabaga ni marifa ye. Ne tun bɛ ne muso Kustriyah bugɔ, k’a  bugɔ fo k’a bin duguma. Mɔgɔ caman tun bɛ siran ne ɲɛ.

“Don dɔ, ne ye Yesu ka kuma dɔ kalan, ko: ‘Ne bɛ ci kura fɔ aw ye ko, aw ka ɲɔgɔn kanu. A’ ye ɲɔgɔn kanu i ko ne ye aw kanu cogo min na.’ (Yuhana 13:34) O kuma donna ne la kosɛbɛ, fo ne y’a latigɛ ka yɛlɛma don ne jogo la. Ni ne bɛ ka dimi tuma min na, ne tun bɛ Ala deli a ka ne dɛmɛ ka ne dusu minɛ. O la ne ka dimi tun bɛ ban. Ne ni ne muso ye nin laadilikan sɔrɔ Efesekaw 4:26,27 la, ka o sira taama, ko: ‘Tile kana bin ka aw diminnen to. Aw kana yɔrɔ si di Sitanɛ ma.’ An tun bɛ to ka Ala ka Kuma kalan su o su ani k’a deli. O la, ko o ko bɛ se ka na ni dimi ye, o tun tɛ sira sɔrɔ. O ye an magɛrɛ ɲɔgɔn na.

“Sisan ne dɔnnen don mɔgɔ ye, bɛn ka di min ye. Ne ye kanuya ni bonya sɔrɔ ka bɔ ne muso ni ne denw yɔrɔ. Ne ye teri caman sɔrɔ, wa ne ni Ala cɛ ka di. Tiɲɛ yɛrɛ la, ne ye hɛrɛ sɔrɔ.”

Goin ye cɛ dɔ ye, min tun ye dɔrɔgutala ye. Ale ko: “Ne ni kamalennin dɔw tun bɛ bandiya kɛ, ne tun bɛ sigarɛti min kojugu. Tuma caman na, ne tun bɛ si sirada la, ne falen dɔlɔ la. Nka o t’a bɛɛ ye. Ne tun bɛ dɔrɔgu sifa caman ta, k’a feere fana. O dogolen tun bɛ kɛ ne ka dulɔki jukɔrɔ. Ne kɛcogo ni ne ka walew tun b’a jira ko ne ja ka gɛlɛn, k’a sɔrɔ ne tun sirannen don tuma bɛɛ.

“Nka dɔ nana Ala ka Kuma yɔrɔ dɔ jira ne la, ko: ‘Ne denkɛ, i kana ɲinɛ ne ka kalan kɔ . . . k’a masɔrɔ u na si tile jan di i ma, i ɲɛnama na san caman kɛ hɛrɛ la.’ (Ntalenw 3:1, 2) Si jan ni hɛrɛ tun ka di ne ye haali! Ne ye nin fana kalan, ko: ‘O layiduw tara an ye,  balima kanulenw. O de y’a to an ka an saniya farisogo nɔgɔlenya ani dusukun nɔgɔlenya bɛɛ ma, ka saniyali dafa ni Ala ɲɛsiran ye.’ (2 Kɔrɛntekaw 7:1) O de la ne ye minfɛn juguw bɛɛ bila, ka bɔ bandiw cɛ ma, ani ka Ala batoli daminɛ.

“Nin ye ne san 17 ye, ne tɛ minfɛn juguw ta. Sisan ne ka kɛnɛ kosɛbɛ, hɛrɛ bɛ ne ka denbaya kɔnɔ, teri sɛbɛw bɛ ne bolo, wa ne hakili tɛ ne tɔɔrɔ. Ka fara o kan, ne tɛ si sirada la bilen dɔlɔmin fɛ, nka ne bɛ si ne ka so hɛrɛ la, su o su.”

Bambang ye cɛ dɔ ye, siya wɛrɛ kɔniya tun bɛ min na. A ko: “Ne tun ye kamalennin ye tuma min na, ne tun bɛ kojugubaw kɛ siya wɛrɛ mɔgɔw la. U tun man ca ne ka yɔrɔ la, nka ne tun bɛ u kɔniya kosɛbɛ.

“Nka o sen fɛ, ne nana a ɲini ka Ala dɔn. O de la ne ye mɔgɔ dɔw ye minnu bɛ to ka jɛ ka Ala ka Kuma kalan ɲɔgɔn fɛ. Ne tun bɛ siya min kɔniya sa, u ye ne kunbɛn ka ɲɛ o lajɛw la! Ne y’a ye fana ko siya caman tun bɛ sigi ɲɔgɔn fɛ o lajɛw la, bɛn kɔnɔ. Ne kabakoyara haali! Kɔ fɛ de, ne ye Ala ka nin kuma faamu, ko: ‘Ala tɛ mɔgɔ bɔ mɔgɔ la, nka siya o siya la, mɔgɔ min bɛ siran a ɲɛ ka ko tilennen kɛ, o de ko ka di a ye.’—Kɛwalew 10:34-35.

“Sisan ne hɔrɔnyara ka bɔ siya wɛrɛ kɔniya bolo. Ne tun bɛ siya min kɔniya, ne teri sɛbɛ dɔw ye o siya mɔgɔw ye sisan. Ala ye kanuya kɔrɔ jira ne la a ka Kuma sababu fɛ.”

Garoga ye cɛ dɔ ye, min tun ka farin kojugu. A yɛrɛ ko: “Ne tun ye kamalennin ye tuma min na, ne donna kaso la siɲɛ saba. Siɲɛ fila kɛra sonyali kosɔn, siɲɛ kelen ne ye cɛ dɔ nijuguya bugɔ. Kɔ fɛ, ne farala mɔgɔ murutilenw kan ka jamana fanga kɛlɛ. Ne ye mɔgɔ caman de faga o la. Kɛlɛ bannen  kɔ, ne kɛra kojugukɛla dɔw kuntigi ye, ka mɔgɔw bagabaga k’u ka fɛnw minɛ. Ne tun ye cɛ minnu ta ka ne kɔlɔsi, u tun bɛ ne kɔ ka taa yɔrɔ bɛɛ. Ne tun ni ka jugu kosɛbɛ, wa ne tun ye faratimɔgɔ ye.

“Nka don dɔ, ne ye nin kalan Ala ka Kuma kɔnɔ, ko: ‘Muɲuli bɛ kanuya la, a falen bɛ ɲumaya la, keleya t’a la. Kanuya tɛ waso, kuncɛbaya t’a la. Kanuya tɛ ko bɛnbali kɛ, a t’a yɛrɛ nafa ɲini. A tɛ dimin joona, a tɛ ko jugu miiri.’ (1 Kɔrɛntekaw 13:4, 5) Nin kumaw ye ne dusukun minɛ. Ne yɛlɛmana yɔrɔ wɛrɛ la, ka Ala ka Kuma kalan, k’a laadilikanw sira taama ne ka ɲɛnamaya kɔnɔ.

“Sisan, nijuguya tɛ ne la bilen. Ne ye bonya sɔrɔ, k’a d’a kan ne bɛ mɔgɔw kalan Ala ko la. Ne ye kun ɲɛnama sɔrɔ ne ka ɲɛnamaya la.”

Mɔgɔ minnu ka kuma fɔlen filɛ, o b’a jira ko “Ala ka kuma ɲɛnama don, a ka teli.” (Heburuw 4:12) A ka laadilikan man gɛlɛn, a bɛ mɔgɔ nafa, a bɛ mɔgɔ dusu suma.

Ala ka Kuma bɛ se ka e fana dɛmɛ, i kɔnɔgankow mana kɛ fɛn o fɛn ye. “Kitabu kuma bɛɛ kɛra a sɛbɛnnikɛlaw kɔnɔ Ala dafiɲɛ fɛ. Nafa b’a la kalanni ni kɔrɔfɔli ni latilenni kama, ani kololi, tilennenya ko la, walisa Ala ka mɔgɔ ka dafa, a selen kɛwale ɲumanw bɛɛ la.”—2 Timote 3:16, 17.

O la sa, an ka Kitabu kɔnɔ kalansira dɔw lajɛ ɲɔgɔn fɛ.