ƝƐFƆLI FARANKANW 3
Baara bɛ kɛ cogo min na ni Ɲɛnamaya kɛ nisɔndiya la fo badaa! gafe ye ka Bibulukalanw ɲɛminɛ
Delilibaw ani ɲininibaw de kɛra walisa k’a dɔn fɛn minnu ka kan ka kɛ Ɲɛnamaya kɛ nisɔndiya la fo badaa! gafe kɔnɔ. Walisa ka nafaba bɔ o gafe la, kalankɛcogo minnu fɔlen bɛ dugumana na yan, olu waleya ni i bɛ Bibulukalanw ɲɛminɛ.
Sani kalan ka daminɛ
-
1. I labɛn koɲuman. I ka kalanden mago bɛ fɛn minnu na walisa ka ɲɛtaaw kɛ, a ka kow cogoya ye min ye, ani a ka dannayakow, i miiri olu bɛɛ la i ka labɛn kɔnɔna na. Fɛn o fɛn faamuyali walima fɛn o fɛn waleyali bɛ se ka gɛlɛya a ma, i k’i miiri olu bɛɛ la. Fɛn minnu bɛ “Ninnu lajɛ” yɔrɔ la, a lajɛ olu bɛ se ka i ka kalanden dɛmɛ cogo min na. I labɛnnen ka kɛ walisa i ka se ka kuma o yɔrɔ kan ni mago jɔra o yɔrɔ fɛn dɔ la aw ka kalan kɔnɔna na.
Kalan kɔnɔna na
-
2. Kalan daminɛ ni delili ye ani ka a kuncɛ ni delili ye ni i ka kalanden sɔnna o ma.
-
3. I jija i kana kuma kojugu. Aw bɛ ka kalan kɛ fɛn min kan, i sinsin o kan ani i k’a to kalanden ka a hakilinataw fɔ.
-
4. Ni aw bɛna gafe tilayɔrɔ kura daminɛ, o tilayɔrɔ barokun kalan, ani ka o tilayɔrɔ kalansenw barokun dɔw kofɔ.
-
5. Ni aw tilara tilayɔrɔ min kalanni na, i ka o tilayɔrɔ seginnkanni kɛ i ka kalanden kun walisa ka a dɛmɛ a k’a hakili jigin tiɲɛ kumaw la a ye minnu kalan.
-
6. Ka i to kalansen kelen-kelen bɛɛ kalanni na ni i ka kalanden ye:
-
A’ye kalansen yɔrɔ fɔlɔ kalan.
-
A fɔra ko ka tɛmɛsira minnu “kalan”, a’ye olu bɛɛ kalan.
-
Tɛmɛsira wɛrɛ minnu bɛ o kalansen kɔnɔ, a’ye olu dɔw kalan ni aw mago jɔra u la.
-
A fɔra ko ka wideyo minnu “lajɛ”, a’ye olu bɛɛ lajɛ (ni cogoya bɛ aw bolo ka o kɛ).
-
Ɲininkaliw kelen-kelen bɛɛ kɛ kalanden na.
-
A ɲini i ka kalanden fɛ a ka jaw lajɛ minnu bɛ “Dɔ fara i ka dɔnniya kan” yɔrɔ la, ani k’a ɲini a fɛ a ka ɲɛfɔli kɛ o jaw kan.
-
Baara kɛ ni “A ɲini ka nin kɛ” yɔrɔ ye walisa ka i ka kalanden dɛmɛ a k’a jateminɛ a bɛ ka ɲɛtaa minnu kɛ alako ta fan fɛ. I bɛ se ka dusu don a kɔnɔ a ka o yɔrɔ laɲinita waleya, walima ka dɔ wɛrɛw di a ma, walima yɛrɛ ka o yɔrɔ ta fara i yɛrɛ ta kan ka u di a ma, a k’u fila bɛɛ waleya.
-
Kalanden ɲininka n’a y’a sɔrɔ barokunw walima wideyo minnu bɛ “Ninnu lajɛ” yɔrɔ la, olu dɔ diyara a ye tuma min na a tun bɛ ka kalansen labɛn.
-
A ɲini ka kalansen kelen-kelen bɛɛ ban siɲɛ kelen.
-
Kalan kɛlen kɔ
-
7. Ta’a fɛ ka to ka miiri i ka kalanden na. Jehova deli a ka duba i ka kalanden ka ɲɛtaaw ye. Jehova deli fana a ka hakilitigiya di i ma walisa i k’a dɔn i bɛ se ka i ka kalanden dɛmɛ cogo min na.
