MƆGƆW KƐ KALANDENW YE
KALANSEN 11
Mɔgɔw kalan cogo nɔgɔnman na
Sariyakolo: “Ni aw ka kuma ma jɛya, aw ka fɔta na faamu cogo di?”—1 Kɔrɛntekaw 14:9.
Yesu ye min kɛ
1. WIDEYO lajɛ, walima Matiyu 6:25-27 kalan. O kɔ, nin ɲininkali ninnu sɛgɛsɛgɛ:
Yesu ka misali bɛ an kalan mun de la?
2. Ni an bɛ mɔgɔw kalan cogo nɔgɔnman na, o bɛ kɛ sababu ye an bɛ u kalan fɛn min na, u hakili ka to o la, wa an bɛ u dusukun sɔrɔ fana.
Yesu ladege
3. Kana kuma kojugu. Ni aw bɛ ka baro kɛ barokun dɔ kan, i kana fɛnw bɛɛ fɔ i bɛ minnu dɔn o barokun kan, nka fɛn minnu fɔlen bɛ o barokun kan kalankɛ gafe kɔnɔ, i sinsin olu kan. Ni i ye ɲininkali dɔ kɛ, i ka muɲu ka makɔnɔni kɛ walisa i ka kalanden ka jaabi di. Ni a tɛ o ɲininkali jaabi dɔn walima n’a ye fɛn dɔ fɔ min ni Bibulu kalansiraw tɛ bɛn, i ka baara kɛ ni ɲininkali farankanw ye walisa k’a dɛmɛ a k’a hakili jagabɔ o ko kan. Ni i ka kalanden ye yɔrɔ koloma faamu ka ban dɔrɔn, i ka taa ɲɛ ni aw ka kalan ye.
4. I ka kalanden bɛ fɛn minnu dɔn ka ban, baara kɛ ni olu ye walisa k’a dɛmɛ ka fɛn kuraw faamu. Misali la, sani aw ka kalansen dɔ daminɛ min bɛ su kununni kan, kalanden tun ye min kalan suw cogoya kan ka ban, i bɛ se ka seginnkanni kunkurunnin kɛ o kan.
5. Baara kɛ ni misaliw ye koɲuman. Sani i ka baara kɛ ni misali ye, i k’i yɛrɛ ɲininka:
-
‘Yala a bɛna ne ka kalanden dɛmɛ a k’a hakili to yɔrɔ koloma la, a hakili kana to o misali dɔrɔn na wa?’
NINNU FANA LAJƐ
Matiyu 11:25; Yuhana 16:12; 1 Kɔrɛntekaw 2:1