I hakili jagabɔ nin ko in kan: Ka a to tulonkɛ la ni a teriw ye, Tim ye balon tan fo o taara u sigiɲɔgɔn ka mɔbili vitiri ci.

Ni e de tun ye Tim ye, e tun bɛna mun de kɛ?

COGOYA SABA DE BƐ I BOLO:

1. Ka boli.

2. Ka mɔgɔ wɛrɛ jalaki.

3. K’a fɔ i sigiɲɔgɔn ye ko min kɛra, ani k’a ɲini ka fɛn tiɲɛnnen dilan.

A bɛ se ka kɛ ko i bɛ a ɲini ka cogoya A de waleya. Nka kun jɔnjɔnw bɛ yen tuma bɛɛ, minnu na i ka kan ka jɔ i ka filiw la​​—⁠a kɛra ko i ye vitiri ci o walima i ye fɛn wɛrɛ tiɲɛ.

1. O kɛli ye ko ɲuman ye.

   Bibulu b’a fɔ ko: “An b’a fɛ ka taama cogo bɛnnen na ko bɛɛ la.”​​—⁠Heburuw 13:18.

2. Mɔgɔw ka teli ka yafa mɔgɔ ma min bɛ jɔ a ka filiw la.

   Bibulu b’a fɔ ko: “Mɔgɔ min bɛ a ka hakɛw dogo, o ka kɛtaw tɛ ɲɛ, nka min bɛ i jɔ u la ka u dabila, makari na kɛ o la.”​​—⁠Ntalenw 28:13.

3. Min nafa ka bon ni a bɛɛ ye, o ye ko o bɛ Ala nisɔndiya.

   Bibulu b’a fɔ ko: “K’a masɔrɔ Matigi bɛ ɲigin mɔgɔ tilenbaliw la, nka mɔgɔ tilennenw teri don.”​​—⁠Ntalenw 3:32.

Karina min si bɛ san 20 la, y’a ɲini ka mɔbili bolicogo jugu ɲangili sɛbɛn dogo a fa la. Nka a tun tɛ se ka o dogo kudayi. “San kelen o kɔ,” Karina y’a fɔ ko, “ne fa bɔra a kalama ko mɔbili bolicogo jugu ɲangili sɛbɛn dira ne ma. O ye ne halikili ɲagami kosɛbɛ!”

Kalansira ye jumɛn ye? Karina y’a fɔ ko: “Ni i ye i ka filiw dogo, o bɛ kow tiɲɛ ka ta’a fɛ. A mɛn o mɛn, i tɛ taa ka o kɔlɔlɔw dan!”

Bibulu b’a fɔ ko: “An bɛɛ bɛ fili cogo caman na.” (Yakuba 3:⁠2) Wa iko an ye a ye cogo min na, ka jɔ i ka filiw la, a yɔrɔnin bɛɛ la, o ye majiginnenya ani basigi taamashyɛn ye alako ta fan fɛ.

I ka kan ka min kɛ o kɔfɛ, o ye ka kalansira bɔ i ka filiw la. Npogotigi dɔ min tɔgɔ ko Vera y’a fɔ ko: “Filiw bɛ iko mɔgɔ bɛ kalan fɛn minnu sababu fɛ, ne b’a ɲini ka kalansiraw bɔ u bɛɛ la, o min bɛ ne dɛmɛ ka ɲɛtaa kɛ walasa ka se ka kow kɛ cogo wɛrɛ la don nataw la.” An k’a lajɛ i bɛ se ka o kɛ cogo min na.

I ye i fa ka nɛgɛso singa, o kɔfɛ a tiɲɛnna i bolo. I bɛna mun de kɛ o kɔfɛ?

• Ka ban ka fɛn fɔ i fa ye ani ka i jigi da a kan ko i fa tɛna bɔ foyi kalama.

• Ko min kɛra tiɲɛna ka o fɔ i fa ye.

• Ko min kɛra ka o fɔ i fa ye nka ka mɔgɔ wɛrɛ jalaki.

I ma pase examen dɔ la k’a sababu kɛ kalankɛ baliya ye. I bɛna mun de kɛ o kɔfɛ?

• I b’a fɔ ko examen kɛcogo ma ɲɛ.

• Ka sɔn a ma ko i ka noti ɲuman sɔrɔbaliya bɔra e de la.

• K’a fɔ ko e ko man di karamɔgɔ ye.

 An bɔra ka kuma ko min kan, segin ka o lajɛ kokura, ani k’a ɲini ka i yɛrɛ bila (1) i fa ani (2) i ka karamɔgɔ nɔ na. I fa ni i ka karamɔgɔ bɛna mun de miiri ni i sɔnna ka jɔ i ka filiw la? U bɛna mun miiri ni i ye i ka filiw dogo?

Sisan i hakili jigin fili dɔ la i ye min kɛ salon ani o kɔ nin ɲininkali ninnu jaabi.

O fili tun ye jumɛn ye? I ye o fili in ɲɛnabɔ cogo di?

• Ne ye o dogo.

• Ne ye mɔgɔ wɛrɛ jalaki o ko la.

• Ne jɔra o fili la yɛrɛ de.

Ni o y’a sɔrɔ ko i ma sɔn ka jɔ o fili la, i kɛra cogo di o kɔfɛ?

• Ne nisɔndiyara​​—⁠ka d’a kan o gɛlɛya bɔra ne da la!

• Ne ye ne yɛrɛ jalaki​​—⁠ka d’a kan ne tun ka kan ka tiɲɛ fɔ.

I tun bɛ se ka o ko in ɲɛnabɔ cogo bɛɛ la ɲuman la cogo di?

I ye kalansira jumɛn bɔ i ka o fili la?

Mun na mɔgɔ dɔw tɛ sɔn ka jɔ u ka fili kɛlenw na?

Mɔgɔw bɛna mun de miiri e ko la, ni i b’a ɲini tuma bɛɛ ka i ka filiw dogo?

U bɛna mun miiri i ko la ni i bɛ jɔ i ka filiw la?​​—⁠Luka 16:10.