I hakili jagabɔ nin ko in kan: Heather ni Mike bɛ to ka ɲɔgɔn ye a bɛ kalo fila dɔrɔn bɔ, nka a kɛra Heather kɔnɔ iko a bɛ Mike dɔn kabini waati jan. U bɛ to ka mesaziw ci ɲɔgɔn ma tile kuuru bɛɛ kɔnɔ, u bɛ to ka kuma ɲɔgɔn fɛ lɛrɛ caman kɔnɔ telefoni na wa hali u bɛ se ka ɲɔgɔn ka kumaw dafa! Nka sisan Mike b’a fɛ u kana dan baro dɔrɔn ma.

Kalo fila tɛmɛnnen ninnu kɔnɔna na, Mike ni Heather ma fɛn wɛrɛ kɛ ka tɛmɛn ɲɔgɔn bolo minɛ ani ɲɔgɔn da susu kan. Heather t’a fɛ ka fɛn wɛrɛ kɛ ka tɛmɛn o kan. Nka a tɛ a fɛ fana Mike ka taa ka a dan cogo si la. Ni a bɛ Mike kɛrɛfɛ, o b’a nisɔndiya kosɛbɛ wa a fana b’a ye iko ale ɲɔgɔn tɛ yen. ‘Ka fara o kan’, a b’a fɔ ko ale ni ‘Mike bɛ ɲɔgɔn kanu de . . . ’

Ni i si sera mɔgɔ siralabɔ ye furu kama ani ni Heather ka ko ɲɔgɔnna bɛ i kan, i bɛna mun de kɛ?

E k’i miiri banni, n’i yɛlɛla jiri kan walasa ka pan iko kɔnɔ, o bɛ kɛ ko bɛnbali ye wa i tɛ taa ka o ko kɔlɔlɔw dan. O cogo kelen fana don ni i ye sariyaw sɔsɔ ka ɲɛsin jogo ɲumanw ma, i n’a fɔ sariya min b’a fɔ ko: “Aw kana jatɔya kɛ.”​​—⁠1 Tesalonikekaw 4:⁠3.

Ni i ye o sariya in sɔsɔ o kɔlɔlɔw bɛ kɛ mun ye? Bibulu b’a fɔ ko: “Min bɛ jatɔya kɛ, o bɛ a yɛrɛ farikolo hakɛ ta.” (1 Kɔrɛntekaw 6: 18) Mun na o kuma ye tiɲɛ ye?

 Ɲininikɛlaw y’a ye ko funankɛnin minnu ye cɛnimusoya kɛ k’a sɔrɔ u ma furu kɛ, a ka ca a la nin kɔlɔlɔ ninnu dɔ la kelen walima u caman ye olu sɔrɔ.

• YƐRƐ JALAKI. Funankɛnin minnu ye cɛnimusoya kɛ k’a sɔrɔ u ma furu, olu caman y’a fɔ ko u nimisara kɔfɛ.

• DANNABALIYA. Cɛnimusoya kɛlen kɔfɛ, a kɛbagaw bɛɛ bɛ u yɛrɛ ɲininka, ne ni mɔgɔ min bɔra ka cɛnimusoya kɛ, o tigi ni ‘jɔni wɛrɛ delila k’a kɛ?’

• JIGILATIGƐ. Cɛnimusoya kɛlen kɔfɛ, musomanin caman b’a fɔ u yɛrɛ kɔnɔ ko, cɛminsɛnnin min bɛ u lakana ko o de ko ka di u ye ka tɛmɛn cɛminsɛnnin kan, min bɛ a mago ɲɛ u la dɔrɔn. Ani cɛminsɛnnin caman b’a miiri ko musomanin min sɔnna u ka laɲini ma yɔrɔnin kelen ko u tɛ sama o tigi nɔfɛ kosɛbɛ.

• Kuma laban: Ni i ye cɛnimusoya kɛ k’a sɔrɔ i ma furu, i bɛ i yɛrɛ tiɲɛ i kɛtɔ ka fɛn ɲuman dɔ saraka. (Romɛkaw 1:24) I farikolo nafa ka bon o tiɲɛni sugu ma!

O de kama, a jira ko i bɛ se ka i yɛrɛ minɛ walasa i “kana jatɔya kɛ.” (1 Tesalonikekaw 4:3) O la, ni i nana furu don min na, i bɛ se ka cɛnimusoya kɛ. O la i na se ka o diyabɔ kosɛbɛ k’a sɔrɔ i ma jɔrɔ, i ma nimisa wa lakana baliya min bɛ sɔrɔ mɔgɔw ka cɛnimusoya kɛli la k’a sɔrɔ u ma furu kɛ, i bɛ kisi o ma.​​—⁠Ntalenw 7:​22, 23; 1 Kɔrɛntekaw 7:⁠3.

• Mɔgɔ min bɛ i kanu tigitigi, yala o tigi bɛ sɔn ka tɔɔrɔ lase i ma farikolo ani kɔnɔnamiiri ta fan fɛ wa?

• Mɔgɔ min bɛ a janto i la tigitigi, yala o tigi bɛ sɔn ka a ɲini ka i ni Ala ka jɛɲɔgɔnya bila farati la wa?​​—⁠Heburuw 13:⁠4.