BETƐLI BAARA Weleweledala minnu batisera, n’u si bɛ san 35 la walima minnu si ka dɔgɔ ni o ye, n’u b’a fɛ ka taa Betɛli la, u ka kan k’a boloda ka taa lajɛ la min bɛ kɛ u kama Sibiridon wulada fɛ. Ni o lajɛ bolodala, o kɛyɔrɔ n’o kɛwaati bɛna kɔn ka fɔ.

TUTIGƐBAGAW KA LAKƆLI Tutigɛbaga minnu si bɛ san 23 la ka taa san 65 la ni u b’a fɛ ka dɔ fara u ka tutigɛbagaya baara kan, olu welelen don ka na lajɛ la min ɲɛsinnen bɛ mɔgɔw ma minnu b’a fɛ ka taa tutigɛbagaw ka lakɔli la, sibiridon tilegan fɛ. O lajɛ kɛyɔrɔ ni a waati bɛna kɔn ka fɔ aw ye.

MƆGƆ KUNBƐNBAGAW Mɔgɔ kunbɛnbagaw ka baara ye ka aw dɛmɛ. U bɛ fɛn minnu fɔ aw ye mobiliw jɔyɔrɔ ko la, sigiyɔrɔ minɛni ko la, aw ka kan ka don da min fɛ ani ka bɔ da min fɛ, o ko la ani ko wɛrɛw ko la, an b’aw deli aw ka olu kɛ.

BATƐMU Mɔgɔ minnu bɛna batise Sibiridon sɔgɔma, olu ka kan ka sigi yɔrɔ la min bilala olu kama, sani batɛmu jɛmu ka daminɛ. U bɛ don ji la ni fini min ye, n’o ka kan ka kɛ fini ɲɛnama ye min bɛ u sutura, ani u b’u yɛrɛ susa ni fini min ye n’u bɔra ji la, u kelen-kelen bɛɛ ka kan ka na ni o fɛnw ye. Sigiyɔrɔ minnu bɛna bila batɛmukɛbagaw kama, olu bɛna bila ka ɲɛsin banbali ma.

BOLOMAFARAW Wariba de bɔra walisa sigiyɔrɔw ka sɔrɔ minnu bɛ bɔli kɛ, kumakɛlaw ka kuma ka mɛn ka ɲɛ, wideyow ka lajɛ ani baara wɛrɛw ka se ka kɛ. O kow bɛɛ kɛra walisa jamalajɛ ka diya ani ka an dɛmɛ an ka gɛrɛ Jehova la. Aw b’a bɔ aw yɛrɛ la ka bolomafara minnu kɛ, o bɛ dɛmɛ don walisa ka o musakaw kɛ ani ka diɲɛ bɛɛ kɔnɔ baara kɔkɔrɔdon. Walisa ka o kow nɔgɔya aw bolo, taamasyɛn jɛlen kɛra buwatiw la, ka u bila yɔrɔw ɲɛfɛ jamalajɛ kɛyɔrɔ la. Bolomafara o bolomafara bɛ kɛ, o nafa ka bon an bolo kosɛbɛ. Wa, Ɲɛmɔgɔ Kulu b’a fɛ ka aw fo aw ka fɛn dilenw na Masaya baara kɔkɔrɔdonni ko la.

DƐMƐ KUN FƆLƆ An b’aw deli, aw ka to aw hakili la ko o baaradaw bɛ yen KƆRƆTƆKƆW DƆRƆN de kama.

FƐN TUNUNENW SƆRƆYƆRƆ Fɛn o fɛn yera mɔgɔw kɔ, o fɛnw ka kan ka ta ka taa di Fɛn tununenw Sɔrɔyɔrɔ la. N’aw ka fɛn o fɛn tununna, aw ka taa o baarada la k’a lajɛ n’aw ka fɛn tununen bɛ yen. N’aw ye den tununnen dɔ ye, aw bɛ se ka taa ni o ye o yɔrɔ la. Nka, aw k’a dɔn ko o baarada tɛ den marayɔrɔ ye. An b’aw deli aw k’aw denw kɔlɔsi ani ka u to aw kɛrɛfɛ.

SIGIYƆRƆ An b’aw deli, aw ka tɔw gasi sigi. Sigiyɔrɔ bɛ se ka mara mɔgɔ minnu dɔrɔn ye, o ye aw ka denbaya kɔnɔmɔgɔw ye ani mɔgɔ minnu ni aw bɛ na ɲɔgɔn fɛ mobili kelen na, walima aw ni minnu bɛ so kelen kɔnɔ, walima aw bɛ ka Bibulukalan kɛ minnu kun. Aw kana fɛn fosi bila sigilan wɛrɛw kan aw kɛrɛfɛ walisa sigiyɔrɔ lankolo minnu tora, mɔgɔ wɛrɛw ka se ka olu ye.

MINNU B’A FƐ KA BAARA DƆ KƐ Baara minnu bɛ kɛ jamalajɛ la, n’aw b’a fɛ k’a bɔ aw yɛrɛ la ka baara dɔ kɛ, an b’a ɲini aw fɛ aw ka taa kunnafoniw diyɔrɔ la ani baarada la, min dabɔlen bɛ mɔgɔw kama minnu b’a fɛ ka baara dɔ kɛ.