K’a daminɛ ɲinan na, an bɛna waati caman sɔrɔ walasa ka an labɛn Krisita ka saya Hakilijigin seli kama. Ni Hakilijigin seli bɛnna baarakɛdon dɔ ma, Ɲɛnamaya ani waajulibaara lajɛ tɛna kɛ o dɔgɔkun kɔnɔ. Ni Hakilijigin seli bɛnna wikɛni ma, foroba jɛmukan ani Kɔrɔsili Sangaso Kalan tɛna kɛ o wikɛni na. Waati min farala aw ka porogaramu kan, yala aw bɛna baara kɛ cogo ɲuman na ni o waati ye wa? I n’a fɔ a tun bɛ kɛ cogo min na an san kɛmɛ fɔlɔ la, labɛn jɔnjɔnw ka kan ka kɛ o ko kɛrɛnkɛrɛnnen kama. (Luka 22:7-13; km 3/15 1) Nka an bɛɛ kelen kelen ka kan ka an dusukun labɛn. An bɛ se ka o kɛ cogo di?

• Nafa min b’a la ka taa Hakilijigin seli la, a’ye aw hakili jagabɔ o kan.—1 Kɔrɛntekaw 11:23-26

• Jɛɲɔgɔnya min bɛ aw ni Jehova cɛ, a’ye o sɛgɛsɛgɛ koɲuman delili kɔnɔna na. —1 Kɔrɛntekaw 11:27-29; 2 Kɔrɛntekaw 13:5

• Bibulu tɛmɛsiraw ani sɛbɛn minnu sinsinnen bɛ Bibulu kan ni olu bɛ kuma Hakilijigin seli kɔrɔ kan, a’ye olu kalan ani ka aw hakili jagabɔ u kan.—Yuhana 3:16; 15:13

Bibulu yɔrɔ minnu ka kan ka kalan Hakilijigin seli waati la, ni olu bɛ sɔrɔ Examinons les Écritures chaque jour kɔnɔ, weleweledala dɔw bɛ olu kalan ani ka u hakili jagabɔ u kan. Tablo min bɛ dugumana na, Bibulu tɛmɛsira minnu bɛ o kɔnɔ, dɔ wɛrɛw bɛ olu kalan. Kɔrɔsili Sangaso barokun minnu bɛ kuma Hakilijigin seli kan ani minnu bɛ kuma Jehova ni Yesu ka kanuya kan u ye min jira an na, dɔw yɛrɛ fana bɛ segin ka olu kalan. Aw mana fɛn o fɛn sugandi kalan kama, o ka kɛ fɛn ye min bɛ aw gɛrɛ Jehova ni a Denkɛ la kosɛbɛ.