Fɛn yetaw b’a to u lajɛbaga ka a tulomajɔ ka ɲɛ ani k’a to a ye fɛn minnu kalan a ka olu faamu ani k’a hakili jigin olu la. An ka Karamɔgɔba Jehova ye baara kɛ ni fɛn yetaw ye walasa ka mɔgɔw kalan kalansira nafamaw la. (Jenɛse 15:5; Jeremi 18:1-6) Karamɔgɔba Yesu fana y’o kɛ. (Matiyu 18:2-6; 22:19-21) Kɔsa in na fɛn yeta minnu kɛra fɛnw ye minnu bɛ an dɛmɛ kosɛbɛ, olu dɔ la kelen ye wideyo ye. Yala aw bɛ baara kɛ koɲuman ni wideyow ye ni aw bɛ aw ka Bibulukalandenw kalan wa?

Kalansen minnu bɛ Kibaru duman min bɔra Ala yɔrɔ gafenin kɔnɔ, wideyo tan dilanna walasa ka an dɛmɛ ka mɔgɔw kalan olu la. Tuma caman na, wideyo kelen kelen bɛɛ barokun bɛ bɛn ɲininkaliw dɔ la kelen ma minnu bɛ finman kirikiri la gafenin kɔnɔ. O gafenin min bɛ jw.org kan, fɛn dɔ bɛ o kɔnɔ min b’a jira an na an ka kan ka o wideyow kelen kelen jira waati min na. Ka fara o kan, kalankɛ minɛn caman minnu bɛ an ka baarakɛminɛnw na, minnu bɛ yɔrɔ koorilen na mɔgɔw kalanni kama, wideyo wɛrɛw fara la olu kan.

Yala aw bɛ ka baro kɛ Bibulu barokun dɔ kan min faamuyali bɛ se ka gɛlɛya aw ka Bibulukalanden ma wa? Walima aw ka Bibulukalanden bɛ kɔrɔbɔli kɛrɛnkɛrɛnnen dɔ kɔnɔna na wa? A’ye wideyo dɔ ɲinin jw.org® kan walima JW teleso® la min bɛ se k’a dɛmɛ. Aw ni aw ka Bibulukalanden bɛ se ka o wideyo lajɛ ɲɔgɔn fɛ ani ka baro kɛ a kan.

Wideyo kuraw bɛ bɔ kalo o kalo. Aw kɛtɔ ka u lajɛ, aw bɛ se ka baara kɛ ni u ye cogo min na walasa ka mɔgɔ wɛrɛw kalan, a’ye aw hakili jagabɔ o kan.