Ciden Paul ka lɛtɛrɛ kɔnɔ, a ye min sɛbɛn hakili senu barika la k’a ci Tite ma, a y’a fɔ ko kamalenw ka kan ka u seko bɛɛ kɛ walasa u ka ‘kɛ ɲɛjirabaaw ye kɛwale ɲumanw bɛɛ la’ wa o tun bɛ hali Tite yɛrɛ kun kan (Tite 2:6, 7) O tilayɔrɔba kelen in kɔnɔ, Paul y’a jira fana ko Ala ka mɔgɔw saniyara walasa u ka se ka ‘u jija kɛwale ɲumanw bɛɛ kɛli la’. (Tite 2:14) O kɛwale ɲumanw dɔ la kelen ye ka waajuli kɛ ani ka mɔgɔw kalan Ala ka Masaya ko la. Ni i ye funankɛ ye, fanga min bɛ i la, yala i bɛ se ka baara kɛ n’o ye walasa ka kɛ tutigɛbaga farankan ye walima tutigɛbaga basigilen ye wa?—Ntalenw 20:29.

N’i b’a fɛ ka kɛ tutigɛbaga ye, i ka kow boloda cogo bɛnnen na min b’a to i ka se ka kɛ tutigɛbaga ye. (Luka 14:28-30.) Misali la, i bɛna jɔ n’i ka musakaw ye cogo di ka i to waati dafalen cidenyabaara la? Tutigɛbaga ka kan ka lɛrɛ hakɛ minnu kɛ waajuli la, i bɛna olu sɔrɔ cogo di? A ɲini Jehova fɛ a k’i dɛmɛ. (Zaburu 37:5) I ye i ka kow boloda cogo min na, baro kɛ o kan ni i bangebagaw ye, baro kɛ o kan ni mɔgɔ wɛrɛw fana ye minnu ye ɲɛsɔrɔ tutigɛbagaya baara la. O kɔ, a ɲini ka i ka kuntilenna dafa. Siga t’a la ko Jehova bɛna duba i ka cɛsiriw ye i bɛ ka minnu kɛ a ka baara la!

WIDEYO LAJƐ MIN TƆGƆ YE KO DES JEUNES QUI HONORENT JÉHOVAH, O KƆ AW KA NIN ƝININKALI NINNU JAABI:

• Mɔgɔ dɔw ye se sɔrɔ gɛlɛya jumɛnw de kan walasa ka kɛ tutigɛbagaw ye? U sera ka o kɛ cogo di?

• Bangebagaw bɛ se ka u denw dɛmɛ cogo di u ka kɛ tutigɛbaga basigilenw ye?

• Mun na a nafa ka bon porogaramu ka kɛ i bolo waajuli kama?

• Jɛkulu kɔnɔmɔgɔw bɛ se ka dusu don tutigɛbagaw kɔnɔ ani k’u dɛmɛ cogo di?

• Tutigɛbagaw bɛ duba jumɛnw de sɔrɔ?