Jehova ye nisɔndiya Ala ye, a b’a fɛ an ka nisɔndiya sɔrɔ waajulibaara la. (1 Timote 1:11) An ka nisɔndiya bɛ bonya ka ta’a fɛ ni an bɛ an seko bɛɛ kɛ. Ɲininkaliw kɛli bɛ se ka baro nege don mɔgɔw la ani o ye cogo ɲuman ye min fɛ, an bɛ se ka baro daminɛ. Ɲininkaliw bɛ mɔgɔw bila ka miiri ani ka hakilijagabɔ kɛ. (Matiyu 22:41-45) Ni an bɛ ɲininkaliw kɛ ani ka an tulo majɔ u jaabiw la, o bɛ iko an bɛ k’a fɔ a tigi ye ko: ‘I ko ka bon ne bolo’. (Yakuba 1:19) A tigi ka jaabiw bɛ se ka an dɛmɛ an k’a dɔn an bɛ se ka baro kɛ cogo ɲuman min na.

WIDEYO LAJƐ MIN TƆGƆ YE KO, KA MƆGƆW KƐ KALANDENW YE NISƆNDIYA MIN B’O LA, A ƝINI KA O SƆRƆ—AW KA AW SEKO BƐƐ KƐ, AW KƐTƆ KA—ƝININKALIW KƐ, O KƆ AW KA NIN ƝININKALI NINNU JAABI:

• Jade ye jogo ɲuman jumɛnw de jira?

• Neeta ye baara kɛ ni ɲininkaliw ye cogo di walasa k’a jira ko a b’a mago don a barokɛɲɔgɔn na?

• Neeta ye baara kɛ ni ɲininkaliw ye cogo di walasa kibaru duman nege min bɛ Jade la, o nege ka bonya ka ta’a fɛ?

• Neeta ye baara kɛ ni ɲininkaliw ye cogo di walasa ka Jade dɛmɛ a ka miiri ani ka hakilijagabɔ kɛ?